1 Pajikaamulikwa kubhee tujaulange ku Italia kupetela ku bahali, Apaulo pamo na akaatabhwa bhangi bhakabhekwanga pahi ja ujemelei gwa akolo bha lilubhalo lya manyemba jwaakemitwa Ajuliasi jwaakibha pakati ja lilubhalo lilikemitwa, "Lilubhalo lya amwenye akolo bha ku Loma." 2 Tukajemeka ulendo kwa kukweela meeli jijibhokela chilambo cha ku Aadilamito jijikibha jitendakujenda na kupetela bandali hihibhile kumbwani ja Asia, na Aalisitako mundu jwa ku Makedonia jwabhokile ku Tesalonike akibha na twenga mu ulendo. 3 Malabhi jakwe tukahika ku bandali ja ku Sidoni. Ajuliasi akaatendela Apaulo maha kwa kwaalekelela bhalole akaaganja bhabhe na kupata hilebhe hibhakaipala. 4 Kubhoka konokwe tukaendelea na ulendo, nambo kwa kubhee mboongo jitenditakutuhibhila nnongi jitu. Tukapetela upande gwa chining'ina cha ku Kupulo, upande gugukibha na mboongo kachoko. 5 Patukajomboka bahali jijikibha upande gwa ku Kilikia na ku Pamfilia, tukahika kuchilambo cha Mila, gugubhile nkati ja chilambo cha Lukia. 6 Penapo tukakolela meeli jimo ja Alekizandilia jijijaula ku Italia na jonijola akolo jwa lilubhalo lya Ajuliasi akatukweleha nkati ja meeli jenejo.

7 Kwa machobha gajingi tujeendita mbolembole, na kwa kulimba tukaika kubhandikila na ku Nido. Ligongo mboongo jikibha tangu gutendakutuhibhila, henela tukajaula tukapeta upande gwa kuulabho ja ku Kilete kubhandikila ku lasi ja Salumone tukaendelea na ulendo kwa kulimba nngulugulu ya bahali. 8 Tukajenda kwa kulimba nngulugulu jakwe mbolembole tukaika mahali papakemwa, "Bandali Jambone," kubhandikila na chilambo cha ku Lasea.

9 Muda nnyingi gukibha guhobhite, na hata lichobha lya kutabha likibha lipetite. Na ulendo gwitu mu bahali gukibha gwa kujogoa muno, ligongo muda gonogwe gukibha nga baada ja muuda gwa kutabha. 10 "Akaanung'una bhangu, mona kubhee ulendo hogogo gupakubhee gwa kulaga na kuhobhea hilebhe hijingi ngabha kwa meeli jika na mihigo himpetulinge, nambo kabhele kwa umomi gwitu." 11 Nambo jonijola akolo bha chilongola bha manyemba akajoanika muno malobhe ga jonijola jwajeendea meeli na akola meeli na kuleka kujoanikia malobhe gabhakalobhola Apaulo. 12 Kwa kubhee bandali hejo jangabhee mahali pa kuhalala pa kutama muda gwa malili, bhajingi bhakapalanga ulendo gujendelee, bhabhikuhobhalela kuhikanga ku Foinike na kutama konokwe machobha goa ga malili. Bandali jenejo jikibha kuchining'ina cha ku Kilete jikibha upande gwa kusini kuuwelo na kasikazini kuwelo.

13 Bahi, mboongo jijibhoka kusini jikajemeka kupooga kachoko kachoko, bhakaganikia kubhee bhakombolanga kupangana chenichela chibhapalanga, henela bhakabhoanga chiano cha kujemea meeli na kujemeka na ulendo kujaula kuchining'ina cha ku Kilete. 14 Nambo pagukapeta muda nyipinyipi, mboongo jijibhii na machili jijikemitwa, "Mboongo ja kasikazini." jikajemeka kupoga kubhoka kuchining'ina. 15 Mboongo jikajipota jenijela meeli, na kwa kubhee twangakombola kujipeleka meeli konikola kukubhokita mboongo, tukajileka jipelekwe konikola kujibhoka mboongo. 16 Tukapelekwa chindema mpaka ku chiluumba chimo chichokochoko chichikemwa Kauda, tukakombola kuguokoa ntumbwi nchoko gwa kuokolea gugukibha nkati ja meeli kwa kulimba. Bhandu pabhakaguuta ntumbwi nchoko gonogwe na kugujingia mu meeli bhajitindia lugoji pahi ja meeli ili kujitabha jikotokulekana, bhaka 17 Bhenibhala akaajangatii bha mu jenijela meeli bhakaguutanga ntumbwi gwa meeli nkati, ngapena bhakaguiligilanga meeli lugoji na kutabha kwa machili. Bhakajogopanga kubhee bhakakombwilinge kukwama mu nhanga gugubhile nngulugulu ja kumbwani ja ku Libiya. Kwa henela bhakatuluanga chiano cha kutopa na kujilekanga meeli jiutwange na mboongo. 18 Mboongo jikaendelea kupoga kwa machili muno na kujipeleka meeli kono na kono na malabhi jakwe bhandu bhakajemekanga kujehanga panja mihigo jijikibha nkati ja meeli. 19 Lichobha lya tatu, bhakajemekanga kujeanga mmaachi hilebhe ya mu meeli kwa mabhoko gabhenji bhene. 20 Kwa machobha gajingi bhangakombolanga kulola lyobha wala ndoondwa, mboongo ngolongwa jikaendelea kupoga muno, tukahengeleka mitima na kulola kubhee ngalama.

21 Bhandu pabhakatama machobha majingi pangali kulyehe chakulya, Apaulo akajema pakati jabhenji, akalobhola, "Mwaakanung'una bhangu, handa nkagajoanikia malobhe gangu na tukotokuendelea na ulendo kubhoka ku Kilete. Handa nkatenditinge henela tukaokwike na kuhalibika kwa meeli na kuhobhea mihigo. 22 Nambo nangocheni ndendakunnyopanga nchipekeange ntima, jwakwa hata jumo jwinunji jwapakujomoka, meeli jika nga jijipakuhalibika. 23 Annoongo yakubhee nenga nga bhakwe na ndendakwaatumikila licho kimuho akaatuma antumichi bhabhe bha kunani kwa Annoongo akamokela, 24 akanobholela, ‘Apaulo, nkotokujogopa! Ligongo mpalikwa nkajeme nnongi ja amwenye akolo bha ku Loma, na bhena Annoongo atekuntendela gammbone, na ligongo linu mwenga Annoongo apakuntendela gammbone ga kwaakoha bhoa bhabhabbhilinge ulendo gumo na mwenga bhakotokutinika wala kujomoka.’ 25 Henele, mwakolongwa, nchipekeange ntima! maana ndendakwaobhalela Annoongo kubee apakutenda handa chibhatekunobholela. 26 Nambo meeli jipakupelekwa na kukwama mu chining'ina yakubhee twangachimanya."

27 Kilo gwa lichobha lya komi na ncheche, tukibha tangu tutendita kokotwa kono na kono mu Bahali ja Adilia. Pajikabhandikila pakati ja kilo bhandu akaajangatii bha meeli bhakaganikianga kubhee tubhandikile kumbwani. 28 Bahi bhakatabhanga chiano mu ng'oji na kuchitulua pahi ili kupema kunyendea kwa machi, na bhakapatanga mita makomi ncheche, nambo pabhakabhujilanga kupema kabhela bhakapatanga mita makomi gatatu. 29 Bhoa tukajogopa kutumbia meeli mu mwala, bhakatuluanga hiyano ncheche ya kujemea meeli na bhakajopanga kuchee chindema. 30 Bhabhatandaa meeli bhakaloleanga ndela ja kutilanga mu meeli, henela bhakatuluanga mu bahali ntumbwi gugukibha mu meeli, bhabhikuchitendanga kubhee bhajaulanga kutuluanga hiyano ya kujemea nnoongi ja meeli. 31 Nambo Apaulo akalobholela jonijola akolo bha chibhoga na manyemba gabhe, "Handa akaajangatii bha meeli habha ngaigalilanga nkati ja meeli, ngaokokanga." 32 Henela bhenibhala manyemba bhakaeketanga migoji jijikakamulila ntumbwi gonigola, bhakagulekanga gutolekwe na machi. 33 Tuputupu, Apaulo akaalekelanga ntima bhalyangange chakulya, kwa kwaalobholelanga, "Kwa machobha komi na ncheche nangocheni ntekubhee mu bhoga na mwangalyanganga chilebhe choachela. 34 Bahi, ndendakunyoopanga nlyangange chakulya kwa kubhee ntendakuchipalanga ili nkombolange kubhe bhamomi. Jwakwa hata mundu jumo jwaapakuhulala." 35 Pabhakajomola kulongela henela, Apaulo akatola nkate, akaachukulu Annoongo nnongoi jabhenji bhoha, akagumetula, akajemeka kulyehee. 36 Pena bhoha bhakalekelwanga ntima, na bhenaangota bhakalyanganga chakulya. 37 Mu meeli tukibha handa bhandu mia mbili na chabini na chita. 38 Kila jumo pabhakalyehe chakulya cha kolonikanga, kila mundu pabhakalyee na kujukuta bhakajeanga ngaano mu baali jijikibha mu meeli.

39 Papakachee, bhoa bhangakombolanga kuchimanyanga chilambo chela, nambo bhakajibhonanga chehemu jimo jijibhi na nhanga, penapo bhakahamuanga kutibhia meeli konokwe mu mihanga handa ikakombolike. 40 Henela bhakahengelana nanga na kuileka mu bahali, na popopo bhakajijogolanga migoji hihikatabhikwa panchukani, ngapena bhakatabhanga tanga jimo nnongi ili kuhibhila mboongo jikombole kunokola meeli kujaula pa mbwani jela. 41 Nambo meeli jikanokolwa na machi jikajaula chehemu ja machi machoko na jikatibhila panhanga. Chehemu ja nnongi ja meeli jikatibhila panhanga pangali kupukunyika. Chehemu ja kuyeto jikajemeka kuhengeleka hipande hipande gunakamo kwa mapoto ga machili ga mawimbi.

42 Manyemba bhapalita kwakomanga akatabhwa bhoha kwa kujogopa kubhee bhakaogelinge kuhika kumbwani na kutilanga. 43 Nambo kwa henela jwajola akolo bha chibhoga cha manyemba akapala kwaokoa Apaulo, akabhaibhilanga bhakotokutenda henela. Akakulumikia bhenibhala bhabhakombolanga kuogela bhaombange kubhoka mu meeli na kujogela mpaka kumbwani, 44 na bhangi bhakagulange bhabhi bhachikamulile mu mbaao au mu hipande ya meeli jijitekuengeleka. Henela nga twenga twabhoa patukahika maha kumbwani.