1 Pagakapeta machobha nhano, Akung'i Akolo Aanania akahika ku chilambo cha Kaisalia pamo na akanahota na abhi kulongana mundu jumo jwaumanyo ga malagilo ga Amusa jwakemwa Atetulo, bhakaajendelela kwa Afelikisi atawala bhakaatakia Apaulo nnoongi ja atawala. 2 Apaulo akakemwa ajingile nkati, Atetulo akajemeka kulongela.

"Akolo Afelikisi, utawala gwinu gwa malango gutuletile twenga kuhengwa, na hilebhe hijingi yammbone hiitenditwe ligongo lya chilambo chitu. 3 Machobha goa na kila mahali, na kwa namuna joajela, akolo jwammbone Afelikisi, tugapokile haga goa kwa chukulu. 4 Nambo, ngapalikwa kuguhobhea muda gwinu nnyingi, tutendakunnyopa kwa wema gwinu, nyoonikie ngani jitu jijipijipi. 5 Tuimanyite kubhee mundu hojo nga nkomu, atendakulimikia ukomu nkati ja Bhayahudi pa chilambo poha. Jonjoni nga achilongola bha lyenilyela lilubhalo lya bhandu bha ku Nazaleti, 6 kabhele akalenga kutenda hikubho yangapalikwa mu Nyuumba ja Annoongo, henela tukaakamula tukapala kwahukumula kagulana na malagilo gitu. 7 Nambo Alusia akolo bha manyemba, akatuikila na machili gajingi akatupokaa kubhoka kwachitu. 8 Akakulumikia bhenibhala bhabha bhandu bhabhaatakia bhaike nnoongi jinu, handa munkonyite mundu hojo mwenga mwabhene mpakombola kuimanya kubhoka kwachabhe hikubho yoha hiitwatakia kwachinu." 9 Bhayahudi bhangi bhakakonda bhabhi kulongela malobhe gabhakalongela Apaulo nga ga kweli.

10 Akolo Afelikisi akaapekea chilolelo Apaulo ajemeke kulongela. Apaulo akalobhola,

"Ndendakuimanya kubhee ntekubhee aliwali mu chilambo chenijeni kwa yaaka hijingi, henela mbakuchitetela kwa kuhangalala nnoongi jinu. 11 Nkombola kuimanya maha kubhee, gapetite machobha komi na gabhele jika, kubhokela panakajaula kwajopa Annoongo ku Yelusalemu. 12 Habha bhabhatekundakia bhangangolelanga mikuntauka mundu johajola. Bhanganolelanga mmikwalokolokea bhandu mu Nyumba ja Annoongo, au kwakolokeanga nkutuli gwa bhandu mu Nyuumba ja konganilanga Bhayahudi, au pohapala pangi pannyini. 13 Kabhele ngakombolanga kongolelanga ukweli kwa hikubho yeniyela hibhatendakundakia kwaachinu. 14 Nambo, ndendakonda kubhee nenga ndendakwaachalila Annoongo bha atati bhitu, ndendakutama kwa kukagula ndela, yakubhee Bhayahudi bhakemanga nga ndela ja unami. Ndendakuhobhalela kila chilebhe chichijaandikwe mu hitabu ya Malagilo ga Amusa na akalondohi bha Annoongo. 15 Nanenga ndendakuhobhalela handa chibhatendakuhobhalela bhenaangota, kubhee bhandu bhabhakondekwa nnoongi ja Annoongo na akaabohu bhoa bhapakuyokanga. 16 Henela mbakuchimila machobha goa na ntima chindegele nnoongi ja Annoongo na nnoongo ja bhandu."

17 "Bahi, panakatama kutali kwa yaaka hijingi, nakabhuja ku Yelusalemu na kwapelekela hilebhe ya kwajangatilanga akaajangu na kubhoa chadaka kwa Annoongo. 18 Panakibha ndenda kuchibheka maha ligongo kondekwa kwa kwajopa Annoongo, ngapena pabhakangolela mu Nyuumba ja Anoongo. Pangabhee na bhandu pamo na nenga na wala nangakwelekeanga bhandu kutenda ukomu. 19 Nambo kukibha na Bhayahudi bhangi kubhoka ku Asia, bhena nga bhabhakapalikwa kutama nnoongi jinu na kulongela handa chibhile chikubho choachela chibohu chindendite. 20 Mwaleke habha bhandu bhabhabhilinge pambani bhalobholange chinnemwite panakajema nnoongi ja Chebule, 21 ndendakulongela lilobhe limo tu nnoongi jinu, ‘Nntendankunhukumulanga leleni ligongo lya kunnobholelanga kubhee bhabhawilinge bhapakuyokanga.’"

22 Bahi akolo Afelikisi jwaakaimanya maha ndela jela akabheka lichobha lyengi lya kujoanikia ngani jenejo. Akaalobholelanga, "Pabhapakuhika akolo bha manyemba Alusia, nga pambakuhumula ngani jinunji." 23 Ngapena akakulumikia akolo bha chibhoga cha manyemba aabheke Apaulo pahi ja ujemelei nambo abhe na upenyo gwa kupanga hilebhe yabhe kachoko na akaaganja bhabhenji bhapekewange upenyo gwa kwaaletela gagapalikwa.

24 Pagakapeta machobha kachoko Afelikisi pabhakaika pamo na Adulusia anubhabhe, jwaakibha Ayahudi, akalagia bhaakemele Apaulo na kwajoanikia pabhakibha atendakulongela maana ja kwahobhalela Ayesu Kilisito. 25 Nambo Apaulo pabhakiba abhikulongela kwa ngani ja kondekwa, kuchihibhila na kwa ngani ja kuhukumulwa kukuhika, Afelikisi akibha na bhoga na kulongela, "Henela nangocheni bahi! Ntendakombola kubhoka pambakupata muda mbakunkema kabhele." 26 Muda gogogo Afelikisi akalolea kubhee ampekee chilebhe choachela kupala alekelele. Henela akibha atendakwaakema mala jijingi na kongoloka nabho.

27 Pahikapeta yaaka hibhele, Apolokio Afesito akajingila mu utabhala mahali pa Afelikisi, nambo kwa kubhee Afelikisi akapala kwabhajilanga Bhayahudi, akaaleka Apaulo mu nyuumba ja kutabhila bhandu.