1 Chikubho handa chenecho chikatendeka kabhele konokwe kuchilambo cha Ikonio, Apaulo na Abanaba bhakajingilanga pamo mu nyuumba ja konganilanga Bhayahudi handa chihiyobhalilikwe. Konokwe bhakatangachanga kwa machili makolongwa yakubhee Bhayahudi pamo na bhandu bhanga Bhayahudi bhabhahobhalela Ayesu. 2 Nambo Bhayahudi bhabhakakananga kwahobhalela Ayesu, bhakaakolekeanga bhandu bhanga Bhayahudi, bhakatumbalanga nkati ja mitima jabhenji kwaakananga bhenibhala bhabhaobhalilinge. 3 Henela Apaulo na Abanaba bhakatamanga konokwe machobha gajingi bhatenditanga kutangachanga ngani ya Hangwana panga bhoga, najono Hangwana akalongela malobhe ga kweli gabhakalongela kupetela upaliho gugutekujimbiika, kwa kwakomboleanga kupangana yakangachika na hilolelo. 4 Nambo bhandu bha mu chilambo chela bhakametunikanga bhangi bhakaakondanga na Bhayahudi na bhangi upande gwa akandundame.

5 Bhandu bhanga Bhayahudi na Bhayahudi bhakajangatilananga na akaakolo bhabhenji, bhakapalanga kwatendelanga gangalimmbone bhena akaandundame na kwapota maganga. 6 Nambo akandundame pabhakajohanga ngani heyo bhakabhutukilanga ku hilambo ya Lusitila na Delube, hilambo ya Likaonia na hilambo hiikatindilanga, 7 konokwe bhakaendeleanga kutangachanga Ngani Jammbone.

8 Mu chilambo cha ku Lusitila, kukibha na nangwabha jumo mwanalome yakubhee akibha nangwabha na jwangajenda hopo kubhokela kubhelekwa. 9 Mundu jonojwe pabhatendita kwaajoanikia Apaulo chibhatendita kutangacha Ngani Jammbone. Apaulo pabhakaalola muno na kuimanya akahobhalela kupala kulamiwa, 10 Apaulo akaalobholela kwa lilobhe likolongwa, "Nnyeme kwa makongono ginu!" Guna kamo mundu jonojwe jwaakibha nangwabha akajema chindema na kujemeka kujeenda! 11 Gonigola nkutuli gwa bhandu pagukalola genigala gagatendikwe na Apaulo, bhakapotanga nyenye kwa chilongelo chabhenji cha Kilikaonia kulobholanga, "Minnoongo hibhonekana handa bhandu na yene hitekututulukia twenga!" 12 Bhakaakema Abanaba Azeu lihina lya annoongo bhabhenji akolo na bhakankema Apaulo Ahelime lihina lya annoongo bhabhenji jongi kwa kubhee jonojwe akibha jwakulongela. 13 Akung'i jwa Nyuumba ja Annoongo ja Azeu, jijikibha nnyenje ja chilambo, akaleta makambako ga ng'oombe na ngwaupa ja malobha nnongi ja nlyango nkolongwa gwa chilambo, jonojwe pamo na nkutuli gwa bhandu bhakapala kwabhekelanga akaandundame.

14 Nambo akandundame Apaulo na Abanaba pabhakajoanga na kulolanga hikubho heye hibhaakapalanga kupangana, bhakapapulana ngobho yabhenji kulangia kubhee ngapalanga kubhekelanga hokwe na kubhutukilanga na kulongela kwa lilobhe likolongwa, 15 "Mwaangota bhandu, kwa niki ntendanga hikubho heyeye? Twenga nga bhandu handa mwangoota! Tutendakunnetelanga Ngani Jammbone, handa tunkongolilinge nntendebhukange nnekange kuchalila hidimu mkabhujile Annoongo jwaabhile jwamomi, jwahahalakie kunani kwa Annoongo na pachilambo na bahali na kila chilebhe chichibhile nkati jakwe. 16 Lolo Annoongo akalekelea bhandu bhanga Bhayahudi bhatamange handa chibhapalanga. 17 Nambo bhangaleka kwaalangianga bhandu kubhee abhile. Atekulangia kubhee atendakwaapalanga muno kwa kwanyechelanga hula kubhoka kunani kwa Annoongo na kwaapekeanga yakulya kwa machobha gakwe, nabhena bhatekumpekeanga yakulya ndu na kujiangalila mitima jinunji." 18 Kwa kulobhola malobhe genago, Apaulo na Abanaba bhakakombolanga kwahibhila bhandu bhenabho kwa kulimba muno bhakotokwaabhekelanga handa minoongo.

19 Ngapena bhakaikanga Bhayahudi bhangi kubhoka ku Antiokia na ku Ikonio bhakaatendanga bhabhee pamo nabho, bhakaapota Apaulo kwa maganga, bhakautangilanga mpaka panja ja chilambo, bhakaganikianga kubhee ajomwike. 20 Nambo bhenibhala bhabhahobhalela Ayesu pabhakalondanika na kwaatindila Apaulo, akabhuja kunnyini. Malabhi jakwe bhenabho na Abanaba bhakabhokanga kujabhulanga ku Delube.

21 Ngapena bhakatangachanga Ngani Jammbone mu chilambo cha Delube na kwaapatanga bhandu bhajingi bhabhakaahobhalela Ayesu. Ngapena bhakajemekanga ulendo kubhuja mu hilambo ya ku Lusitila na ku Ikonio na ku Antiokia ja ku Pisidia. 22 Bhakaaimbalilanga bhandu bhabhahobhalela Ayesu bha hilambo heyo na kwaalekelelanga ntima bhapundange kuhobhalela. Bhakaanyamukanga na bhakaalobholelanga, "Bhandu bhapakutupoteka tangu twangajigila mu Umwenye gwa Annoongo." 23 Apaulo na Abanaba bhakaagulanga akanahota mu kila lilubhalo lya bhandu bhabhahobhalela Ayesu, bhakajopanga na kutabha Annoongo abhalolekeange.

24 Ngapena bhakapetelanga ku Pisidia na kuikanga ku Pamfulia. 25 Pabhakajomola kutangacha Lilobhe lya Annoongo ku Peliga, bhakajaulanga ku chilambo cha Atalia. 26 Kubhoka konokwe bhakajaulanga ulendo kwa meeli bhakabhujanga mpaka ku Antiokia ya Silia, yakubhee pena kandahi bhakabhekwanga mu wema gwa Annoongo ligongo lya lihengo bhabhalitendanga nangocheni.

27 Pabhakaikanga ku Antiokia bhakapangana chikomiti chikolongwa na lilubhalo lya bhandu bhabhahobhalela Akilisito penapo bhakaapekeanga ngani ja hikubho yakubhee Annoongo akaatendelanga na henela chibhakaalomboleanga bhandu bhanga Bhayahudi bhanhobhalele Akilisito. 28 Apaulo na Abanaba bhakatamanga konokwe pamo na bhenibhala bhandu bhabhahobhalela Ayesu kwa machobha gajingi.