1 Ngapena Apaulo akatandubha ulendo na kuhika hilambo ya ku Delube na ku Lusitila, ku Delube kukibha na mundu jumo Ayahudi jwahobhalela Akilisito na lina lyabhe Atimotheo. Anyongo bhabhe Atimotheo akibha Ayahudi jwakahobhelela Ayesu Kilisito, nambo atati bhabhe Atimotheo akibha Agiliki. 2 Atimotheo akalumbalikwa muno pakati ja bhandu bhenibhala bhabhakanhobhalela Akilisito bha hilambo ya ku Lisitila na ku Ikonio. 3 Apaulo akapala Atimotheo alongane nabho mu ulendo, henela akanhina. Akatenda henela ligongo Bhayahudi bhoha bhabhatamitanga konokwe bhakaimanyanga yakubhee atati bhabhe Atimotheo akibha Agiliki. 4 Pabhatendita kupeta mu yeniyela hilambo bhakaapekeanga bhandu malagilo gagabhokite kwa akandundame na akaakolo konikola ku Yelusalemu, bhabhikwalobholelanga bhagakamulange. 5 Henela, genigala malubhalo ga bhandu bhabhakahobhalela Akilisito bhakapunda kubhee na machili mu kuhobhelela, na bhandu bhabhakahobalela Ayesu bhakapunda kujonjokeka kila lichobha.

6 Bhakapetela mu hilambo ya ku Fulugia na ku Galatia kwakubhee Mboomo ja Annoongo akaanikianga kutangacha Ngani Jammbone ja Hangwana ku chilambo cha Asia. 7 Pabhakaikanga mu mipaka ja ku Musia, bhakalenganga kujingila ku Bithunia, nambo Mboomo ja Ayesu bhanga jikaakanikianga. 8 Bahi, bhakapetela ku Musia, bhakajendanga mpaka ku Toloa. 9 Kilo hecho, Apaulo akalola malolo ga mundu jumo jwa kubhoka ku Mekedonia ajemite penipala na kwajoopa, "Nnyoomboke, nhiike ku Mekedonia ntujangatile." 10 Apaulo pabhakalola maono hago, bhakachibheka maha kujaula ku Mekedonia panga kukabha, tukaimanya kweli Annoongo atukemite tukatangache Ngani Jambone.

11 Tukabhoka ku Toloa, tukajenda kwa meeli mpaka ku luumba lwasamotilake, pakuchilaje tukahika kuchilambo cha Neapoli. 12 Tukabhoka konokwe, tukahika ku Filipi, chilambo cha ku Makedonia, na hitendita kuhukumulwa na bhandu bha ku Loma. Tukatama mu chilambo hecho kwa machobha kachoko. 13 Lichobha lya Kupomolela tukapiita nngulugulu ja chilambo, tukajaula nngulugulu ja loochi tukaganikia pakwajopela Annoongo. Tukatama, tukalongela na hakaikege bhabhakakondanikanga mahali popopo. 14 Pakati ja bhenibhala bhabhatendita kutujohanikianga akibha mwikege jumo jwakemitwa Alidia jwa kubhoka ku Tuatila, jwatendita kwahobhalela Annoongo, yakubhee akibha atendakuusa ngobho ya kuhalalaya ja bei ngolongwa ja laangi ja zambalau. Hangwana Annoongo akapangala lihengo muntima gwa Alidia ili agajoanikie malobhe gagakalobholekwa na Apaulo. 15 Mwikege jonojwe pabhakabatichwa pamo na alongo ajabhe, akatulalika abhikulobhola, "Handa kweli ntekulolanga yakubhee ndekwahobhalela Hangwana, nhikange kwaachangu ntamange." akatulobholela muno tujaule.

16 Lichobha limo, patutendita kujaula mahali palapala pa kwajopela Annoongo, mwikege jumo mmanda jwaakachukilwa na mahoka, jwaakibha na uwecho gwa kulondola akakongana na twenga. Mwikege hojwe akibha atendakwaapekeanga akaakola mbiha bhabhangange na mbiha hijingi ligongo lya kulondola kwakwe. 17 Bahi, jonojwe mwikege akaakagula Apaulo na twenga, abhikupota nyenye abhikulobhola, "Habha bhandu nga akaatumichi bha Annoongo akolo. Bhakaalobholelelanga namuna mukombolanga kuokolewa." 18 Jono mwali atendita henela kwa machobha gajingi hata lichobha limo Apaulo akatumbala, akatendebhukila na kwalobholela jonojwe lihoka, "Ndendakunkulumikia kwa lihina lya Ayesu Kilisito, mummoke hojojo!" Popopo jono lihoka likaabhoka.

19 Bhabhabhilinge na mbiha bha jonijola mwikege pabhakabhonanga kubhee nhobhalelo gwabhenji gwa kupatanga hilebhe lijomwike, bhakaakamulanga Apaulo na Asila, bhakaautanga mpaka palugwinjili, nnoongi ja akaakolo. 20 Bhakaatakianga kwa akaaliwali bhakalobholanga, "Bhandu habha Bhayahudi bhatekulekelanga ukomu mu chilambo chitu. 21 Bhatendakujigananga hilebhe hihiyobhalilike yakubhee twenga bhatubhile pahi ja mamulaka ga ku Loma ngapalikwa kuikonda wala kuikagula." 22 Libhoga lya bhandu likachilondanika na kwapootanga Apaulo na Asila.

Na bhenibhala maliwali bhakaulanga Apaulo na Asila ngobho yabhenji kwa machili, bhakakulumikianga bhaapotange hiyakato. 23 Pabhakajomolanga kwaaapotanga muno bhakajingianga nkati, na manyemba bha nyuumba ja kutabhila bhandu bhakaakulumikianga kwaabhekanga pahi ja ujemelei. 24 Kubhokana na malagio hago, jonojwe linyeemba likolo lya nyuumba ja kutabhila bhandu akaabhekanga mu chumba cha nkati ja jenijela nyuumba ja kutabhila bhandu na kwatabhaanga mmakongono gabhenji mu lipekepeke likolongwa.

25 Pakati ja kilo Apaulo na Asila bhatendita kujopa na kujemba minyeembo ja kwaalumbalila Annoongo, kongoni akaatabha bhangi bhabhi kwaajoanikianga. 26 Ng'ang'anu, kukabhokela na kulendemela kukolongwa kwa mandopi gagakapukunya nyuumba ja kutabhila bhandu. Milyango joha jikajogoka na minyololo jijikaatabhila bhenaangota jikalekana. 27 Linyemba likolo lya nlyango gwa nyuumba ja kutabhila bhandu paakajimuka kulola mlyango gwa nyuumba ja kutabhila bhandu gutekujogoka akaganikia yakubhee akatabhwa bhabhutukinge, na henela akaguolomola upanga gwakwe, kupala kuchikoma. 28 Nambo Apaulo akaakema kwa lilobhe likolongwa, "Nkotochiulaha mwabhene kwa maana twenga tubhile pambani!"

29 Akankema mundu alete lumuli, pabhakaguleka lumuli, jonojwe linyeemba likolo lya nyuumba ja kutabhila bhandu akabhutukila nkati akachigwiha nnoongi ja makongono ga Apaulo na Asila kongoni abhi kulendemela kwa bhooga. 30 Penapo akaalongoleanga panja, akakonyanga, "Mwakakolongwa, ndende chiniki ili kuokolewa?"

31 Bhenabho bhakaajangula, "Mwahobhalele Hangwana Ayesu mwenga na bhandu bhinu bhoa bha nyuumba jinu nga pampakuokolewa." 32 Bahi, bhakantangachia lilobhe lya Hangwana jonojwe na pamo na akaalongo bhabhe. 33 Jonijola linyeemba akaatolanga kilo chochocho na akaajeleanga mabhanga gabhenji, ngapena jonojwe na akaalongo bhabhe popopo bhakabhatichwanga. 34 Akaatolanga Apaulo na Asila kunyuumba jakwe, akaapekeanga chakulya. Jonojwe na akaalongo bhabhe bhoha bhakatendanga nholo nkolongwa kwakubhee nangocheni bhatendita kwahobhalela Annoongo.

35 Malabhi jakwe, maliwali bhenibhala bhakaatumanga akaakolo bha manyemba kwa akolo bha nyuumba ja kutabhila bhandu, "Mwajogolange bhenibhala bhandu."

36 Jonijola akolo bha linyemba lya nyuumba jwa kutabhila bhandu akalobholela ngani Apaulo, "Maliwali bhatekututumanga kubhee nnyogolekwe. Nangocheni mpakombolanga kubhoka na kujaulanga kwa kuhengwa."

37 Nambo Apaulo akaajangula, "Nnongelabholi? Bhakatupotanga hiyakato palugwinjili pangali kutuhumula, na twenga nga bhandu bha ku Loma, kabhele bhakatutabhanga mu nyuumba ja kutabhila bhandu. Nangocheni bhapalanga kutujogolelanga kwa kuchihiya! Ngabha! Nneke akachinabhene bhaikange bhatujogolelange."

38 Bhenibhala akaakolo bha manyemba bhakabhujanga na kwabholelanga ngani hejo, bhenaangota pabhakajoanga kubhee Apaulo na Asila bhakibhanga bhandu bha ku Loma, bhakajogopanga. 39 Henela, bhakajaulanga kwatindibhalila majugwa na pabhakaabhoanga nkati bhakaajopanga bhabhokange mu chilambo chela. 40 Apaulo na Asila bhakabhokanga mu nyuumba ja kutabhila bhandu, bhakajaulanga kaja kwa Alidia. Konokwe bhakakongananga na bhandu bhabhakahobholela Ayesu na pabhakajomolanga kwalekelanga ntima, bhakabhokanga.