1 Apolo pabhakibha ku Kolinto, Apaulo akapeta pakati ja hilambo ya mmatombi, akaika ku Efeso na akaakolela bhandu bhangi bhabhakahobhalela Akilisito. 2 Akakonya, "Bholi, pamukahobhalela Ayesu nkapokelanga Mboomo ja Annoongo."

Bhakaajangula, "Twangajoa kubhee abhile Mboomo jwa Annoongo."

3 Jonojwe akalongela, "Nangocheni nkapatanga ubaticho gwa namuna niki?"

Bhakaajangulanga, "Tukapata ubaticho gwa Ayohana."

4 Apaulo akalobhola, "Ubaticho gubhagajigana gukibha ubaticho gwa kuleka mabohu. Ayohana akaakongolelanga bhandu bhanhobhalele jwajola jwaapakuhika kuyeto jabhe, nga Ayesu."

5 Bhandu pabhakajoanga genago, bhakabatichwanga kwa lihina lya Hangwana Ayesu. 6 Bahi, Apaulo akabhekelanga mabhoko, na Mboomo ja Annoongo akaalongoleanga, bhakajemekanga kulongela chilongelo chengi na kutangacha ngani ja Annoongo. 7 Bhoha bhakibhanga handa akanalome komi na bhabhele.

8 Mihei jitatu Apaulo akibha ajenda mu nyuumba ja konganila Bhayahudi, akalongela na bhandu ngani ja Umwenye gwa Annoongo. 9 Nambo bhangi bhakibha mitahu, bhakakananga kuhobhalela, bhakajemeka kulongela malobhe gabohu kwa ngani ja hejo ndela ja Hangwana Ayesu mu libhoga lya bhandu. Penapo Apaulo akaleka kuelewana nabho, akaatolanga nnyenje bhenibhala bhabhachijigana bhabhe, akabhe bhalongela nabho kila lichobha mu nyuumba yakubhee bhandu bhabhakajaulanga kuchijigana ja mundu jwakemwa Atulano. 10 Akaendelea kupangana henela kwa muda gwa yaaka hibhele hata akaakolo bhoha bha kuchilambo cha Asia, Bhayahudi na bhandu bhanga Bhayahudi, bhakakombola kujoa lilobhe lya Hangwana.

11 Annoongo akatenda yakangachika hijingi kupetela Apaulo. 12 Bhandu bhakatolanga ngobho na hitambaa hiikabhoka payeega mwa Apaulo akaipelekanga kwa akatamwa, nabhena bhakalamiwanga hitamwa yabhenji, na bhenibhala bhabhakibhanga na mahoka gakaabhokanga bhena bhandu. 13 Bhayahudi bhangi bhabhakatendita kupupulika kono na konokwe bhabhikulenga kugabhoa mahoka kwa bhandu kwa kupetela lihina lya "Hangwana Ayesu bhatenditakulongela na kubhoa kwa lihina lya Ayesu yakubhee Apaulo atendakwatangacha." 14 Bhana chaba bha mundu jumo jwaakemitwa Asikewa, jwakibha anachilongola jwa akung'i akolo bha Chiyahudi akibha pakati ja bhandu bhabhakibha bhatendanga genago. 15 Nambo mahoka gabohu gakaajangula, "Twaamanyi Ayesu, naamanyi kabhele na Apaulo, nambo mwangota nga aganiki?"

16 Ngapena jonijola mundu jola jwakaachukilwa na mahoka akabhahombelanga bhoha kwa machili, akaagwianga bhoa. Na bhena bhana bha Asikewa bhakabhutukanga kubhoka mu jenijela nyuumba kongo ngobho yabhenji hibhiipapunikwe na kwaahulaanga mu mimele yabhenji. 17 Kila mundu konokwe ku Efeso, Ayahudi na bhanga Ayahudi, bhakajoa ngani ja chikubho hecho. Bhoha bhakibha na bhoga, bhakalilumbalila lihina lya Hangwana Ayesu. 18 Bhandu bhangi bhabhahobhalile Ayesu bhakahikanga kukoondanga palugwinjili hikubho hibhaitenditinge. 19 Bhangi bhabhakibha bhapangana hikubho ya uwabhi pena kandahi, bhakakumbanga hitabu yabhenji ya uwabhi, bhabhikujocha nnongi ja bhoha. Galama ya hitabu heyo hikabhandikila handa hipande elupu makoni nhano ya madini ga mbiya. 20 Henela nga lilobhe lya Hangwana Ayesu chilikapunda kujenela na kubhee na machili muno.

21 Pahikapeta hikubho heyo, Apaulo akaamua kujenda ku Yelusalemu kwa kupetela ku Makedonia na Akaya. Akalobhola, "Pambakuhika konokwe, hela hela mbalikwa kujaula ku Loma." 22 Henela, bhakaatuma bhabhele bha ajangati bhabhe, Atimoseo na Aelasito, bhaalongolelange kujeenda ku Makedonia, na jono akaigalila kachoko konokwe ku Asia.

23 Muda hogwe nga kukabhokela ukomu nkolongwa konokwe ku Efeso ligongo lya ngani ya Hangwana. 24 Kukibha na mundu jumo jwaalakia hidimu ya nyuumba ja Annoongo mwikege kwa madini ga mbia jwaakemitwa Ademetilio, yakubhe akibha na lihengo lya kuhalakia hidimu ya nyuumba ja annoongo mwikege akemitwa Aalitemi. Lihengo helyo jikaapatilanga bhakuhalakia hidimu kwa madini ga mbia bhapakupata nnyonjokeko nkolongwa. 25 Ademetilio akakumbanga bhenaangota bhatenda lihengo pamo na bhangi bhabhakibha na lihengo handa helyo, akalobholela, "Mwabhandu ntendakuimanyanga kubhee lihengo helye limpatilanga mbiha hijingi. 26 Nangocheni, ntendakombolanga kujoanga na kuchilolelanga mwabhenenji hikubho yaitendita Apaulo, nga pambani pa Efeso jika, hela hela moha mu Asia. Jonojwe atekwaahutanga bhandu na kwaalobholelanga bhandu bhakondange yakubhee jenijela minnoongo jijihalakikwe na bhandu ngabha minnoongo hata kachoko. 27 Henela hibhi yakujogoa yakubhe maloonda gitu gapakubhee na lihina lyangali mmbone. Nga henela jika, bali kabhele chikubho hecho lipakombola kuitenda nyuumba ja nnoongo mwikege Aalitemi jipakubhelulilwa. nnoongo jonojwe ngaakotimilwa na bhandu bha Asia na chilambo choha."

28 Pabhakajoanga genago, bhakibha na lilaka, bhakajemekanga kulongela kwa liobhe likolongwa, "Aalitemi nga akolo bha nnoongo jwa ku Efeso!" 29 Chilambo choa chikapundia na ukomu. Bhandu bhakaakamulanga Agayo na Alistako, yakubhee bhakibhanga bhalongine na Apaulo, bhakaabhutuanga mahali yakubhee bhandu patendakongananga. 30 Apaulo bhene akapala kujaula kupotana nabho lyenilyela lilubhalo lya bhandu nambo bhenibhala bhandu bhabhahobhalela Ayesu bhakaakanikia. 31 Akachilongola bhangi bha gono nkowa gwa Asia, bhabhakibhanaga akaaganja bhabhe, bhakaapelekela Apaulo malobhe ga kwaapembelea akotokuchibheka mu kujogoa kwa kujingila penepo. 32 Muda hogwe penepo pakibha na ukomu, kila mundu akibha alongela kwa kukwea lilobhe, bhangi helele na bhangi lyenilyela, mpaka gonigola nkondekeno gukapwilingananga. Ligongo bhandu bhajingi bhangahimanyanga kwaniki bhakonganinge penipala. 33 Bhayahudi bhangi bhakaapeleka Alekizanda nnoongi. Bhandu bhangi bhakaganikia kubhee nga ndando, bahi Alekizanda akabhalangianga kwa lubhoko bhakotokange kupala kuchitetea nnoongi jabhenji. 34 Nambo pabhakaimanyanga kubhee jonojwe nga Ayahudi, bhoa pamo bhakapotanga nyenye kwa machaa gabhele bhabhikulobholanga, "Alitemi nga akolo bha ku efeso!"

35 Kupela kwa yoa akalani bha chilambo akakombola kwaakotoanga bhandu na kwaalobholelenga, "Mwangota mwa bhandu bha ku Efeso kila mundu ahimanye kubhee bhandu bha ku chilambo cha ku Efeso nga akaajemelei bha nyuumba ja annoongo mwikege Aatemi na akaajemelei bha liganga lilikagwee kubhoka kunani kwa Annoongo. 36 Jwaakwa jwakombola kukana hikubho heyo. Henela bahi, nkotokange, nkokupangana choha chela chibohu. 37 Ntekwaletanga habha bhandu pambani hata handa bhangajibhanga chilebhe choachela mu nyuumba ja nnoongo na kwaatukana nnoongo bhitu mwikege. 38 Hata handa Ademetilio na bhabhatenda lihengo bhabhe bhatekola ngani na mundu joajola, machebule gabhile na bhakuamuanga bhabhile, bhakombolanga kutakiananga konokwe. 39 Handa ntekolanga hindondo yengi, mpelekange mu chikomiti chichimanyika. 40 Handa chiibhile nangocheni tubhi mu kutakiwa ligongo tuletite ukomu gongoni gwa lelen. Ngakombola kuchitetea ligongo ukomu gongoni mwangalimaana kwaachitu." 41 Pabhakajomola kulobhola genago, akaalobholeelanga bhandu bhabhabhile pachikomiti bhajaulange.