1 Ngapena pagakapeta genago, Apaulo akabhoka ku Atene akujaula ku Kolinto. 2 Konokwe akakongana na Ayahudi jumo lihina lyabhe Akila, kwachabhe ku Ponto. Akila na hanu bhabhe jwaamekwa Apulisila, bhakabhujanga kubhoka ku Italia mu machobha gogogo ligongo Akaisalia Kilaudio akibha atekwakulumia Bhayahudi bhoa bhabhokange ku Loma. Henela Apaulo akajaula kwalolanga, 3 Apaulo atamanga nabho na kupangana mehengo kwukubhee jonojwe akibha mundu jwa kutoka mahema handa bhenaangota. 4 Kila Lichobha lya Kupomolela Apaulo akibha atendakonyananga na Bhayahudi na Bhagiliki mu nyuumba ja konganilana Bhayahudi abhikujiga kwahuta ili bhahobhalele Ayesu.

5 Asila na Atimotheo pabhakaikanga kubhoka ku Mekidonia, Apaulo akachitolea umomi gwabhe gwoa ligongo lya kutangacha na kwalobholelanga bhandu kubhee Ayesu nga Akilisito. 6 Bhayahudi pabhakaakana na kwaatukukana, Apaulo bhena akakung'unda ngubho yabhe nnongi jabhenji kulangia kubhee atendakwanyamukanga, akalobholelanga, "Lilipakumpitilanga nga linunji mwakaachinabhene! Nenga nanga kokolekwa kwa chikubho choachela, nenga lihengo lyangu nyomwile. Kujemeka nangocheni mbakukwajendelanga bhandu bhanga Bhayahudi." 7 Ngapena akabhoka monimola mu nyumba ja konganilanga Bhayahudi, akajaula ku nyuumba ja mundu jumo lihina lyakwe Atito Yusito, akibha mundu jwa Annoongo. Nyuumba jakwe jikibha jibhandikile na nyuumba ja konganila Bhayahudi. 8 Akolo bha jenijela nyuumba ja konganila Bhayahudi, Akilisipo akajemeka kwahobhalela Hangwana pamo na bhoha bha nnyumba jakwe, Bhakolinto bhajingi bhabhakaajoanikia Apaulo bhakahobhalelanga na kubatichwa.

9 Lichobha limo kilo, Hangwana Ayesu akalobholela Apaulo mu hagamii, "Nkotokujogopa, nhendelee kutangacha Ngani Jammbone panga wee ntima, 10 kwakubhee nenga mi pamo namwenga. Jwakwa mundu jwapakujiga kunlaha, ligongo pambani pannyini bhabhilinge bhandu bhangu bhajingi." 11 Bahi, Apaulo akatama konokwe abhikwajiganga lilobhe lya Annoongo pakati jabhenji kwa chaaka jimo na mihei chita.

12 Nambo Agalio pabhakibha akolo bha chilambo cha ku Akaya, Bhayahudi bhakaakamula Apaulo na kwaapeleka pachebule. 13 Bhakalobholanga, "Tutendakuntakia mundu hojo ligongo lya kwakolokeanga bhandu bhaajope Annoongo pangali kukagula Malagilo ga Amusa." 14 Tangu Apaulo jwaangajemeka kolongela, Agailo akalobholela Bhayahudi, "Nnyoanikiange mwangota Akayahudi! Handa kweli chikubho heche chikabhile nnani ja hilebhe hibohu au hilebhe ibohu ngakombwile kunnyoanikianga. 15 Nambo kwa ngani ja mitahu na ngani ja malobhe na mahina ginunji, nhamuange mwakachibhene. Nenga ngakombola kubhee mundu jwakuhukumula hikubho yinu heyo!" 16 Bahi akaabhenganga bhabhokange penapo pachebule. 17 Bhena bhoa bhakaakamula Asositene jwaakibha nkolo jwa nyuumba ja konganila Bhayahudi, bhakaapota palapala nnoongi ja chebule. Nambo Agailo jwangajali chikubho hecho.

18 Apaulo akatama na bhenibhala bhabhahobhalela Ayesu konokwe ku Kolinto kwa machobha gajingi. Ngapena akatabhuka, akakwela mu meeli kujaula ku Silia pamo na Apilisila na Akula. Konokwe ku Kenkelea, akachekula majunju gabhe ligongo akalangia atekujomola kulapila kwabhe kwa Annoongo. 19 Bhakaikanga ku Efeso na popopo Apaulo akalekanga Apilisila na Akula, akajenda ku nyuumba ja konganila Bhayahudi, akalongela nabho Bhayahudi. 20 Bhandu bhakaajopa Apaulo atame nabho machobha gajingi, nambo jonojwe akakana. 21 Pabhakibha bhatendakubhoka, akalobhola, "Annoongo handa apalite mbakuika kwaachinu kabhele." Akakwela mu meeli akajaula ku Efeso.

22 Meeli jikahika ku Kaisalea, na Apaulo akajenda ku Yelusalemu na kwaatyangila bhenibhala bhandu bhabhakahobhalela Akilisito, ngapena akabhoka kujaula ku Antiokia. 23 Akatama konokwe kwa machobha kachoko, kabhele akaendelea na ulendo kwa kupetela hilambo ya ku Galatia na ku Fulugia akaalekelanga mitima bhoa bhabhahobhalela Ayesu.

24 Mu machobha genago kukibha na Ayahudi jumo jwakemwa Aapolo, bhabhelikwe ku Alekisandalia, akaika ku Efeso na akibha mundu jwalongela maha na abhi na umanyo nkolongwa gwa Majandiko ga Annoongo. 25 Akibha ajiginwe ngani ja jene ndela ja Hangwana, akibha lyotolyoto mu ntima gwabhe, alongila ngani ja ngani ya Ayesu akajigananga maha, akabatichwa na Ayohana jika. 26 Apilisila na Akula pabhakanyoanikia Apolo abhikulongela kwa kuchimila nkati ja nyuumba ja konganila Bhayahudi, bhakantola kwachabhenji bhakannyigana malobhe gagaakondolela Ayesu na namuna bhabhahobhalile chibhapalikwa kutamanga. 27 Ngapena Apolo pabhakaamua kujaula ku Akaya, bhenibhala bhandu bhabhahobhalela Akilisito bhakannekela ntima kwa kwajandikilanga bhenibhala bhabhahobhalela Akilisito bha konikola ku Akaya bhampokele. Pabhakaika konokwe, akakombola kwa wema gwa Annoongo, kwajangatilanga bhenibhala bhabhahobhalela Ayesu bha ku Akaya, 28 kwa kubhee akaendelea kwa kuchimila kutangacha palugwinjili kwa kwapeta Bhayahudi palugwinjili na kulangia kwa Majaandiko ga Annoongo kubhee Ayesu nga Akilisito.