1 Patukahikanga maha mu chining'ina, tukaimanya yakubhee chenichela chining'ina chela chikemiikemwa Malita. 2 Bhandu bha chenichela chining'ina bhakibhanga na upalio muno kwachitu. Hula jikajemaka kukoma na kukibha na malili, henela bhakakungananga moto ligongo ili tujotange. 3 Apaulo akalokotana ndeketu akakolokea pa chiinja. Penapo, ligongo lya lyenilela lyooto lya moto, lijoka lya uchoongo muno likabhoka mu ndeketu likaailigila Apaulo mu lubhoko na kwaluma. 4 Bhandu bha chenichela chining'ina pabhakachibhona chenichela chijoka atekuchihigilila pa lubhoko lwa Apaulo na kwaluma bhakalobholelana akaachinabhene, "Komboleka mundu hojojo atekoma mundu, na chibhile atekuokoka kutibhila mu bahali, nambo minnoongo jitu ngakombola kwaleka kubhee jwamomi!" 5 Nambo Apaulo akachikung'undila chenichela chijoka pammoto na jwangahulala hata kachoko. 6 Bhenibhala bhandu bhakibhanga bhatendakulola kubhee akatupite au akaagwile pahi na kuwee chindema. Nambo pabhakalendelanga muno pangali kulola choachela chichaapatite Apaulo, bhakatindigana maganikio gabhenji nnani jakwe, bhakalobholanga kubhee, "Jonjoni nga jumo jwa minnoongo!"

7 Kubhandila na penipala pakibha migonda ja mundu jwakemitwa Apubulio, nga jwakibha akola bha chenichela chining'ina jonijwe akatupokela maha kwachabhe na tukibha akaageni bhabhe kwa machobha gatatu. 8 Nambo mu machobha genago atati bhabhe Apubulio akibha atamwa na kugulumana miyai, Apaulo akajaula kwaalola na akaajopela, akaabhekela mabhoko gabhe pammele gwabhe, akannamia. 9 Pagakabhokela genago, akaatamwa bhoha mu chenichela chilumba bhakaikanga na bhakalamanga. 10 Bhandu bha chining'ina chela bhakatupekeanga ngwaupa hijingi na patukajemeka kabhele ulendo gwitu, bhakalekelanga nkati ja meeli hilebhe yoa hitukapalikwa kupetula mu ulendo.

11 Pajikapeta mihei jitatu tukajemeka kabhele ulendo gwitu kwa meeli jumo ja Alekisandalia jijikemwa, "Minnoongo Mabhela" Jijikemwa Akasita na Apoluksi, meeli jenejo jikatama penipala pa Malita machobha goa ga malili. 12 Tukaika mu chilambo cha Silakusa, tukatama kwa penapo machobha gatatu. 13 Kubhoka konokwe tukahika, tukatindila na kuika chilambo cha ku Legio. Palikapeta lichobha limo, mboongo jikajemeka kupoga kubhoka kuchini, na pagapeta machobha gabhele tukaika ku chilambo cha ku Potioli. 14 Konokwe tukaakolelanga lilubhalo lya bhandu lilyahobhalela Ayesu bhangi na bhakutujopanga tutame nabho kwa lijuma limo. Henela nga chitukahika chilambo cha ku Loma. 15 Akanung'una bha ku Loma bhabhakahobhalela Ayesu pabhakapatanga ngani hitu, bhakaikanga kutupokelanga mu chooko lya ku Apio na Mikahawa Jitatu. Apaulo pabhaakabhonanga akachukulu Annoongo, akipata ntima.

16 Patukaika ku Loma, Apaulo akalekelelwa kutama jika jabhe pamo na linyemba limo annolekee.

17 Pagakapeta machobha gatatu, Apaulo akakemanga pamo akanachilongola bha Bhayahudi. Pabhakahikanga Apaulo akajemaka kwalobholelanga, "Akaanung'una bhangu, nangatenda chikubho choachela chichitaukana na bhandu bhituau chichitaukana genigala gatugayobhalile kubhoka kwa akanahota nambo nakatabhwa kunikola ku Yelusalemu na kungamua kwa bha Loma. 18 Pabhakangonyanga muno na kulola yakubhee nangalemwa choachela, bhakapalanga kunekanga. 19 Nambo Bhayahudi bhangi bhakakananga chikubho hecho, nanenga nakajopa ngani jipelekwe kwa amwenye akolo bha ku Loma, na ngapala kwatakianga bhandu bhangu kwa chikubho choachela. 20 Ligongo helyo ndekujopa kongana na kulongela na mwangota, kwakubhee ndekutabhwa minyololo heje ligongo lya kwahobhalela jonojwe jwaalendelwa na Bhaisilaeli."

21 Bhenaangota bhakanobholelanga, "Twenga twanga balua joajela kubhoka ku Yuda, wala jwaakwa nnung'una joajola jwaikite pambani na kongolela au kulongela choachela changali mmbone nnani jinu. 22 Nambo tuganikia kubhee hipalikwa tujoanikie kubhoka kwachinu mwabhene chenichela ching'anikia mmutwe gwinu. Kwakubhee chituchimanya twenga nnani ja chenecho chibhoga nga kubhee chitendakanikwa koha koha."

23 Bahi, bhakakondananga nabhena lichobha lya kongana, na bhajingi bhakaikanga konokwe kwaatamita Apaulo. Kubhokela kundabhi mpaka kimuho Apaulo akaalobholelanga na kwaatambulilanga ngani ja umwenye gwa Annoongo, akaajinanga bhandu kubhee bhahobhalele Ayesu na kwakombokeanga Malagilo ga Amusa na majaandiko ga akaalondohi. 24 Bhandu bhangi pakati jabhenji bhakakondanga malobhe gabhe, nambo bhangi bhangaobhalelanga. 25 Henela bhangakondananga bheneengota kwa bhenaangota, na kujemeka kubhoka Apaulo akaalobholelanga malobhe gangani, "Mboomo ja Annoongo akaalobholelanga akanahota bhinu kwa ndela ja alondoi Aisaya, 26 penipala pabhakalobhola.

‘Nyaule kwa bhandu habha nkabhalobholelange.

Kujoanikia mpakujoanga, nambo ngaelewanga,

kulola mpakulolanga nambo ngalolanga.

27 Kwakubhee luunda lwa habha gatekupoganikwa,

na bhatekuibha machikilo gabhenji,

bhatekopelanga miho gabhenji.

Handa ngabha henela, bhakalolite kwa miho gabhenji, bhakajowininge kwa machikilo gabhenji,

Bhakaeliwinge kwa luunda lwabhenji, na kundendebhukila nenga, na nenga nganamiinge.’"

28 Henela Apaulo akalobhola, "Mmanyange yakubhee ngani ja Annoongo jijikongolela nnani ja kuhokolewa bhandu jitekupelekwa kwa bhandu bhanga Bhayahudi. Bhenabho bhapakujoanikianga!" 29 Apaulo pabhakajomola kulobhola genago Bhayahudi bhakabhokanga kongo bhabhikonyana machwali gajingi.

30 Apaulo akatama kwa yaaka hibhele mu nyuumba jibhaakapanga bhenabho bhene, kongo abhikwapokelanga bhoa bhabhakahikanga kwalola. 31 Na jono atendita kwaatangachianga bhandu Umwenye gwa Annoongo na kujigana ngani ja Hangwana Ayesu Kilisito panga bhooga na panga kwaibhila.