1 Pakibha na mundu jumo lihina lyabhe Akoloneli jwatamita ku Kaisalia yakubhee akibha akolo bha chibhoga cha manyemba chikemitwa, "Chibhoga cha ku Italia." 2 Akibha mundu jwa kwakoonda Anoonngo, jonojwe pamo na alongo bhabhe bhoha bhatenita kwaajopa Annoongo, atendita gajingi na kwaajangatilanga akaahocho bha Chiyahudi, na jonojwe atendita kwaajopa Annoongo machobha goha. 3 Lichobha limo, pajikahika handa chaa ticha ja muhi, akalola maha mu hagamii antumichi bha kunani kwa Annoongo abhikwahikila, kwalobholela, "Akolonelio!"

4 Akolonelio akalolekea muno jonojwe kwa bhoga, akaalobholela, "Chibhi niki akolo?"

Bhena antumichi bha kunani kwa Annoongo akaalobholela, "Annoongo ajoine kujopa kwinu na kubhona yadaka hinu kwa akaocho wala ngailibhalila. 5 Nangocheni, mwaatumange akaatumichi bhinu kachoko bhajendange ku Yopa bhakaakema mundu jumo jwaakemitwa Asimoni yakubhee lihina lyabhe lyengi nga Apetulo. 6 Jonojwe abhile kaaja kwa Asimoni, jonijola jwaabhamba mambendela, jwaatama kubhandikila na bahali." 7 Jono antumichi jwa kunani kwa Annoongo pabhakabhoka, Akoloneli akakemanga akaatumichi bhabhele bhabhatendita kupangana mahengo ga nkati pamo na linyemba limo jwaatendita kwajopa Annoongo jwaakibha ajemelei bhabhe. 8 Akolonelio akaalobholelanga goha gagabhokile, na akaatumanga bhajendange ku Yopa.

9 Malabhi jakwe, bhena bhandu bhatatu bhabhi tangu ulendo, nambo kubhandikila kuika ku Yopa, ikibha handa chaa chita ja muhi Apetulo akakwela na kujaula ku chuumba cha nnani kujaula kwaajopa Annoongo. 10 Akibha na njala, akapala kulyehe chakulya. Chakulya pachitendita kutelekwa, akaagamila malolo. 11 Akakubhona kunani kwa Annoongo kujogwike na chilebhe handa chuka ngolongwa jibhikutukukikwa pahi jibhi jikamwilwe pande yabhe yoha ncheche. 12 Nkati ja chuka hejo kukibha na kila chinyama, hinyama hihibhile na makongono ncheche, hinyama yakwabha na hijuni. 13 Ngapena akajoa lilobhe, "Apetulo, nnyeme nchinje, nlyee!"

14 Apetulo akajangula, "Hopo, Hangwana, nenga nangapaa chilebhe choachela yakubhee nga nhilo au chakulya chichaatenda mundu akotokondekwa mu ndela ja kwaajopa Annoongo."

15 Akojoa kabhele lyenilye lilobhe, "Nkotokema nhilo yaakulya yakubhee Annoongo atekuhijelejea!" 16 Chikubho heche chikajibhujila patatu, ngapena jenijela chuuka jikabhujikwa kunani kwa Annoongo.

17 Apetulo pabhakibha tangu atendakukangacha malolo genago maana gakwe chiniki, bhenibhala bhandu bhabhakatumwanga na Akoloneli, pabhakajimanya nyuumba ja Asimoni, bhakaikanga na kujema panlyango, 18 bhakakonyanga kwa lilobhe, "Bholi, pambani abhile ageni joajola jwakemitwa Asimoni Petulo?"

19 Apetulo akibha tangu atendakuganikia genigala malolo, na penapo Mboomo ja Annoongo jikaalobholela, "Nnyohanikihe! Bhabhile bhandu bhatatu pambani, bhatendakunnoleha mwenga. 20 Ntuluke chindema na wala nkotokubhee na lipamba kujaula pamo nabho kwa kubhee nenga nga ndekwaatumanga." 21 Apetulo akatuluka na kwaalobholela bhenibhala bhandu, "Nenga nga jonijola jumunnoleanga. Nkagwilinge chiniki?"

22 Bhenaangota bhakaajangula, "Akolonelio akolo bha manyemba, mundu jwammbone, jwaampala Annoongo na jwaatopelwa na Bhayahudi bhoa, atutumite. Atekulobholelwa na antumichi bha kunani kwa Annoongo abhatumange bhandu bhaikange kwaachinu ili ajoanikie choachela chimpakwaalobholela." 23 Apetulo akaapokelanga, akaapekeanga pakugoloka kilo chela.

Malabhi jakwe, Apetulo akajemeka ulendo pamo na bhenaangota, na akalongana na bhandu bhangi bhabhahobhalela Ayesu bha ku Yopa. 24 Lichobha lya bhele bhakahikanga ku Kaisalia. Konokwe Akolineli atendita kwalendela pamo na akaalongo na akaaganja bhabhakaalalikanga. 25 Apetulo pabhatendita kujingila, Akolineli akabhoka kwaapokela akaatindibhala majugwa na kwaakomitila kwa kwatopea. 26 Nambo Apetulo akaajinula, akaalobholela, "Nnyeme, kwakubhee nenga hela hela namwene na amundu handa mwenga." 27 Apetulo akapunda kulongela na Akolonelio pabhakibha bhatendakujingila mu nyuumba yakubhee akaakolelanga bhandu bhajingi bhatekulondanikanga. 28 Apetulo akaalobholelanga, "Mwangota mwabhene ntendakuimanyanga kubhee Nnyahudi joajola atekanikilwa na malagilo gakwe ga dini kondekana na bhandu bha hilambo yengi au kwatyangila. Nambo Annoongo atekunangia, ngotokunng'anikia mundu joajola kubhee ngakondekwa kwa ndela ja kwaajopa Annoongo au ahakwa. 29 Henela pantekungemanga nangakana kuhika, bahi ndendakunkonyanga ntekungemelanga chiniki?" 30 Akolinelio akalongela, "Machobha ga tatu gagapetite, mu chaa hejeje, yaani chaa ticha, pandendita kwaajopa Annoongo ku chuumba changu, ngamona mundu awalite ngobho hiyuu kuu, 31 akalobhola, ‘Akolinelio! Kujoopa kwinu kutekujoanika, na yadaka hinu hiintekwaapekea akaahocho hitekondekwa nnoongi ja Annoongo. 32 Bahi, mwatume bhandu bhajaulange ku Yopa bhakaankeme mundu jumo jwakemitwa Asimoni, kwa lihina lyengi Apetulo, abhi kaaja kwa Asimoni jwahalakia hilebhe kwa kutumia mambendela jwaatama kubhandikila na bahali.’ 33 Henela nakaatumanga bhandu kwaachinu, na mwenga ntekutenda yambone kuika. Bahi nangocheni twenga twaabhoha pamba tubhi nnongi ja Annoongo, tukombole kugajoanika malobhe gohagala gabhatekunhukumula Hangwana ntulobholele."

34 Ngapena Apetulo akajemeka kulongela, "Nangocheni ndekuhimanya kweli Annoongo ngapendelea, 35 nambo kila mundu jwa chilambo choachela jwaajopa Annoongo na kupangana gagakondekwa na jonojwe apakondekwa na jonojwe. 36 Gongoni nga gonigola ujumbe gubhakaguleta Annoongo kwa bhandu bha ku Isilaeli, abhikutangacha Ngani Jammbone jijileta kuhengwa kwa Annoongo kwa ndela ja Ayesu Kilisito yakubhee nga Hangwana bha bhoha. 37 Chikubho chela mwangota ntekuchimanyanga, chichikajenela mu chilambo choa cha Bhayahudi kujemekela ku Galilaya, Ayohana pabhakajomola kwatangachianga bhandu ngani jabhe ja ubaticho. 38 Ndendakumanya Annoongo chibhakaahagula Ayesu bha ku Nazaleti kwa kwapekea Mboomo jabhe na ukolo. Koakola kubhakajaula akatenda hikubho yammbone ya kwalamianga mahoka ligongo Annoongo akibha pamoa na jonojwe. 39 Twenga twabhene tujoine na kuhilola hikubho yoha hihiteendikwe mu chilambo cha Bhayahudi na ku Yudea. Konokwe bhakaakoma kwa kwaabhamba pa nchalaba. 40 Nambo Annoongo akaayoha lichobha lya tatu, ngapena akaatenda abhonekane na bhandu, 41 ngabha kwa bhandu bhoha, nambo kwa bhenibhala Annoongo bhabhaagwile bhabhangange bhenibhala bhabhajoine na kulola, nga twenga bhatulile na kung'we pamo nabho penipala pabhakayoka. 42 Akatulumikia tutangache Ngani Jammbone kwa bhandu na kwalobholelanga genigala gatugabhonite kubhee hojo nga jwaatekuagulikwa na Annoongo abhee Jwakuhumula bhabhabhilinge bhamoomi na bhabhawilinge. 43 Akaalondohi bhoha bha Annoongo bhakalongelanga ngani yabhe, kubhee kila mundu jwaapakwahobhalela apakulekelelwa kulemwa kwabhe koha kwa lihina lyabhe."

44 Apetulo pabhakibha atenda kulobhola malobhe hago Mboomo jwa Annoongo akaatulukilanga bhoha bhabhakajoanga lilobhe lyela. 45 Akaayahudi bhabhahobhalela Ayesu bhoa yakubhee bhabhakahikanga na Apetulo kubhoka ku Yopa, bhakakangachanga kulola kubhee Annoongo akaapekeanga machili ga Mboomo ja Annoongo kwa bhandu bhanga Bhayahudi kabhele. 46 Bhakahimanyanga henela, kwakubhe bhakaajoanga bhabhikulongela kwa hilongelo yengi na kwalumbalila Annoongo. Ngapena Apetulo akalobhola, 47 "Bhandu habha bhampokile Mboomo ja Annoongo handa twenga chitwaapokile. Bholi abhile mundu joajola jwakombola kwaahibhila bhakotokubatichwanga kwa machi?" 48 Akaakulumikianga bhatichwange kwa lihina lyakwe Ayesu Kilisito. Ngapena bhenibhala bhandu bhakaajopa Apetulo atame nabho kwa machobha kachoko.