1 Bhabhachijigana bha Ayesu bhapakunda kujonjokeka, kukabhokela na kokoleka pakati jabhenji ja bhenibhala bhabhahobhalela Ayesu bhabhalongila Chigiliki na bhenibhala bhabhalongila Chiebulania. Bhenibhala bhabhalongila Chigiliki bhakakokolekelanga kubhee bhawela bhabhenji bhatendakulibhalilwanga mu kumetulana yakulya yakila lichobha. 2 Henela, bhenibhala akaandundame komi na bhabhele bhakalikemanga libhoga lyoa lya bhabhachijigana cha Ayesu na kwalobholelanga, "Ngabha yammbone twenga tuleke kutangacha lilobhe lya Annoongo ili tutendange lihengo lya kubhagana chakulya. 3 Henela, akaanung'una bhitu, nhagulange pakati jinunji bhandu chaba bhabhabhilinge na Mboomo ja Annoongo, bhabhakolite malango na bhabhatopelwanga muno, twenga tupakwakamuanga lihengo hilo. 4 Twenga tupakwajopa Annoongo na lihengo lya kutangacha Lilobhe lya Annoongo."

5 Chikubho hecho chikaabhajilanga chibhoga choha chichitekwahobhalela Ayesu. Bhakaagulanga Asitefano, mundu jwaakahobhalela muno na kulongolelwa na Mboomo ja Annoongo. Hela hela bhakaahagulanga Afilipo, Apolokolo, Anikanoli, Atimona, Apalimela na Anikolao bha ku Antiokia yakubhe akajingila dini ja Chiyahudi. 6 Bhakaabhekanga nnoongi ja akandundame, na bhenaangota bhakaajopelanga na kwaatendelanga gammbone kwa kwabhekelanga mabhoko.

7 Lilobhe lya Annoongo likapunda kujenela na bhandu bhabhakahobhalela bhakajonjokeka muno konokwe ku Yelusalemu, na akaakung'i bhajingi bhakahobhalela.

8 Annoongo akaajalia Asitefano majingi gammbone, akaapekea machili gajingi hata akatenda hilolelo na yakangachika pakati ja bhandu. 9 Nambo bhandu teno bhakabhokelanga ili bhataukanange na Asitefano. Bhandu kachoko habho bhakibhanga bha mu nyuumba ja konganilanga Bhayahudi jimo jijikemitwa, "Nyuumba ja konganilanga Bhayahudi ja bhandu bhabhalekelilwe," nabhena bhakabhokanga ku Kilene na ku Alekisandilia, bhangi bhakabhokanga ku Kilikia na ku Asia. 10 Nambo bhangakombolanga kwaagwia ligongo lya malango gabhe na kwakubhee jonijola Mboomo jwa Annoongo jwakaatandaa penipa pabhakalobhola. 11 Henela bhakaakolekeanga bhandu kachoko bhalongelange, "Twajoine Asitefano abhikulongela malobhe ga kwaatukana Amusa na kwaapoonja Annoongo." 12 Henela, bhakaakolekeanga bhandu, akanahota na bhabhajiganga Malagilo ga Amusa. Bahi, bhakaahikila Asitefano, bhakaakamula na kwaaleta nnongi ja Chebule Nkolongwa. 13 Bhakaaletanga pa Chebule bhandu bhabhalongilinge unami kubhee pabhalongilaje, "Mundu hojo ngaleka ng'oo malobhe ga kupaponja pambani mahali pa Annoongo na malagilo ga Amusa. 14 Tukaajoa abhilongelanga kubhee, Ayesu bha ku Nazaleti apakubhomolana pambani na kuhuta gagayobhalilike kugapokela kubhoka kwa Amusa." 15 Bhoha bhabhakibhanga mu chikomiti cha Chebule bhakaalolekea miho Asitefano, bhakabhonanga kumio kwabhe kubhile handa antumichi bha kunani kwa Annoongo.