1 "Akanung'una bhangu bha ku Isilaeli na akaatati bhangu nnyoanikiange chindendakuchitetela nnongi jinunji." 2 Pabhajoanga abhikulongela nabho kwa chilongelo cha Chiebulania, bhakakotokanga jii. Na jonojwe akapunda kolongela, 3 "Nenga nga Ayahudi, meelikwe kuchilambo cha Taliso konokwe ku Kilikia. Nambo nakalelewa mu chilambo hecheche cha Yelusalemu, mmabhoko ga Agamalieli. Bhakanyigana maha mu malagilo ga akaakolo bhitu, nakibha na machili muno kupangana mahengo ga Annoongo handa mwangota chimmilinge leleni. 4 Nakaalagianga na kwakomanga bhandu bhabhakajikagula ndela hejeje. Nakaakamulanga akanalome na akaahikege na kwatabhanga mu nyuumba ja kutabhila bhandu. 5 Akung'i Akolo na chibhoga choa cha akanahota bhakombola kulongela chikubho chenecho handa kweli au unami. Kubhoka kwabhenji nakapokela balua na kujipeleka kwa Bhayahudi bhabhabhilinge ku Damasiko. Nakajaula ku Damasiko kupala naakamulange bhena bhandu na kwaletanga bhabhi bhatabhitingwe mpaka ku Yelusalemu ili bhapotekwe."

6 "Henela bahi panakibha nndela kujaula ku Damasiko, pakati ja muhi, ng'ang'anu nhana nkolongwa kubhoka kunani kwa Annoongo gukamulikila na kundindila koha koha. 7 Penapo nakagwee pahi, nakajoa lilobhe libhi kunobholela, ‘Asauli, Asauli, mboni nntendakunagia?’ 8 Nenga nakakonya, ‘Mwenga nga aganiki Hangwana?’ Nabhena akanyangula, ‘Nenga na Ayesu bha ku Nazaleti yakubhee mwenga ntendakunagia.’ 9 Bahi bhenibhala bhandu bhabhakibha pamo nanenga pakagubhona gonigola nhana, nambo bhangalijoha lilobhe lya jonijola jwalongela na nenga. 10 Nenga nakakonya, ‘Hangwana ndende chiniki?’ Nabhena Hangwana akanobholela, ‘Nnyinuke nnyingile ku Damasiko, konokwe mpakulobholelwa ngani yoha hiipalikwa kupangana.’ 11 Ligongo lya gonigola nhana nkolongwa nangakombola kulola, henela bhenibhala akajangu bhakangamulanga lubhoko mpaka nakahika ku Damasiko."

12 "Konokwe ku Damasiko kukibha na mundu jumo jwaakemitwa Aanania, mundu hojwe atendita kugakoonda Malagilo ga Amusa, na akatopelwa muno nnongi ja Bhayahudi bhabhatamita ku Damasiko. 13 Aanani akajema kubhandikila nanenga akalobhola, ‘Anung'una bhangu Asauli, nnole kabhele!’ Palapala miho gangu gakajemeka kulola kabhele, na nenga nakaalola Aanania. 14 Ngapena Aanani akanobholela, ‘Annoongo bha atati bhitu atekunhagula mwenga kupala mpangane gabhagapala mpangane, munnole jonojwe jwaakondekwa nnoongi ja Annoongo na kunnyonikia jonojwe mwene abhi kulongela kwa kang'wa jabhe. 15 Kwakubhee mpakulongela ngani yabhe kwa bhandu bhoa na mmikwalobholelanga genigala gamugabhonite na kugajoa. 16 Nangocheni mboni ntendakabha? Nyimuke, nkabatichwe na kujelejewa kupala kulekelelwa kulemwa kwinu kwa kulihobhalela lihina lyabhe.’"

17 "Henela nakabhuja ku Yelusalemu, na pandendita kujopa mu Nyuumba ja Annoongo, nakabhona malolo. 18 Nakaabhona Hangwana abhikunobholela, ‘Nyoomboteke mmoke pa Yelusalemu, kwakubee bhandu ngakondanga malobhe ginu nnani jangu.’ 19 Nenga nakaajangula, ‘Hangwana, bhenaangota bhatendakuimanya ukweli kubhee nenga nga jonijola jwaatendita kujingila mu kila nyuumba ja konganila Bhayahudi na kwakamulanga na kwapotanga bhenibhala bhabhatendita kunhobhalela. 20 Antumichi bhinu Asitefano pabhakakomekwa, nenga na mwene nakibha popopo nibhi kuhangalila chikubho penapo na nenga nakalolekea ngobho ya bhandu bhabhaakomita Asitefano.’ 21 Hangwana akanobholela, ‘Nyaule, mbakuntuma kutali kwa bhandu bhanga Bhayahudi.’"

22 Gonigola nkutuli gwa bhandu gukaajonikia Apaulo mpaka pambani, nambo pabhakolongela malobhe gangani, bhakakweanga malobhe bhabhi kulongelanga, "Munkomange! Mundu handa jonjoni ngapalikwa kubhee jwamomi!" 23 Bhakapundanga kulongela kwa lilobhe likolongwa, na kongo ngobho yabhenji bhabhi kuponganga nnani na kutitimbula lutukunda na lilaka libhakibhanga nalyo. 24 Jonijola akolo bha manyemba bha ku Loma, akaakulimikianga manyemba bhabhabhilinge pahi jabhe Apaulo ajingiwe nkati ja likukumba lya ngome ja manyemba kupala kwapota hiyakato na akonywe kwa niki bhandu bhatendita kupota nyenye henela. 25 Nambo pabhakajomola kwaatabha ili bhapoote hiyakato, Apaulo akankonya linyemba jumo jwaajemite penapo, "Bholi, malagilo gapala kwapota hiyakato mundu jwa ku Loma kongo jwaangahukumulwa?"

26 Jonijola akolo bha manyemba pabhakajoa malobhe haga, akaajendela jonijola akolo bha manyemba bha ku Loma na kwaalobholela, "Mpakutenda chiniki? Ligongo hojo mundu nga mundu jwa ku Loma?"

27 Ngapena jonijola akolo bha manyemba bha ku Loma akaika kwakonya Apaulo, "Nngongolele, mwenga nga mundu bha jwa Loma?"

Apaulo akaajangula, "Eloo nenga nga mundu jwa ku Loma."

28 Ngapena akolo bha manyemba ga ku Loma akalobhola, "Ngapalikwa kutumia mbiya hijingi ili ngombole kubhee mundu bha ku Loma."

Apaulo akalobhola, "Nambo nenga nga mundu bha ku Loma kwa kubhelekwa." 29 Popopo bhenibhala bhabhakapanga kwakonya Apaulo bhakabhokanga penapo, na hata bhenibhala akolo bha manyemba bha ku Loma akajogopa pabhakaimanya kubhee Apaulo jwaakatabha kwa minyololo akibha mundu jwa kubhoka ku Loma.

30 Malabhi jakwe, jonijola akolo bha manyemba bha ku Loma akapala kuimanya kulemwa kwa Apaulo kubhakatenda kwa Bhayahudi. Henela, akajogola Apaulo minyololo, na kulumikia akaakung'i akolongwa na akanahota bha Chikomiti ili bhatendange chikomiti. Ngapena akaaleta Apaulo akaajemea nnoongi ja Chikomiti.