1 Bahi akandundame na bhabhahobhalela Akilisito konokwe ku Yudea bhakapatanga ngani ya kubhee bhandu bhanga Bhayahudi nabhonji bhatekulipokelanga Lilobhe lya Annoongo. 2 Apetulo pabhakabhuja ku Yelusalemu, bhenibhala Bhayahudi bhabhahobhalela Ayesu na bhabhakapalanga bhandu bhanga Bhayahudi bhahinwange, bhakaakalipila, bhabhikwalobholela, 3 "Mwenga ntekujaula ku nyuumba ja bhandu bhangahinwanga na nkatama nabho kulyee nabho chakulya!" 4 Apetulo akajemeka kongolela ngani ja genigala gagakatendeka kubhokela kandahi,

5 Apetulo akajangu, "Lichobha limo panakibha ndendakwajopa Annoongo ku Yopa, nakabhona malolo, nakabhona chilebhe handa chuuka ngolongwa jibhikikwa pahi kubhoka kunani kwa Annoongo jibhi jikamwilwe pande yoa ncheche, jibhikubhekwa kubhandikila na nenga. 6 Nakalingulila nkati maha nakabhona hinyama bhabhabhilinge na makongono ncheche, hinyama bha kumanyai hiikwabha na hijuni. 7 Ngapena nakajoa na lilobhe, ‘Apetulo, nnyeme, nchinje nlyee.’ 8 Nambo nenga nakalobhola, ‘Hangwana, hopo, kwakubhee chilebhe changakondekwa nnoongi ja Annoongo au chiakwa ngakombola kujingila mu kang'wa jangu.’ 9 Chikubho heche chikatendeka pabhele kubhoka kunani kwa Annoongo, ‘Nha nhilo kukema chilebhe chihakwa chilebhe chichitekuhalakilwa na Annoongo.’ 10 Heche chikubho chikatendeka patatu, ngapena hilebhe yoha bhakaihutanga kabhele kunani kwa Annoongo. 11 Bhandu bhatatu bhabhakatumwanga kubhoka ku Kaisalia bhaikange kwaachangu bhakahikanga ku nyuumba jinakahikila. 12 Mboomo jwa Annoongo akanobholela nngagule nabho, pangali lipamba. Akanung'una habhabha chita nabhenabho bhakajaulanga pamo nanenga, tukajingila mu nyuumba ja mundu jola. 13 Bhakatukongolela namuna chibhabhonite antumichi bha Annoongo bhabhakajema nnyumba jabhe na kwaalobholela, ‘Mwatume bhandu bhajaulange ku Yopa nkakeme Asimoni jwakemitwa kwa lihina lyengi Apetulo. 14 Jonojwe apakunnobholela malobhe kwa kupetela malobhe genago mwenga na akaalongo bhinu bhoa mpakuhokolewanga.’ 15 Panakajemeka kulongela, Mboomo ja Annoongo akaatulukianga handa chibhakatutulukia twenga panipala kandahi. 16 Ngakombokela lilobhe lyela lya Hangwana, chibhakalobhola, ‘Ayohana akabhaticha kwa machi, nambo mwangota mpakubatichwa kwa Mboomo ja Annoongo.’ 17 Bahi, handa Annoongo atekumpekwapekea bhandu bhanga Bhayahudi Mboomo jwabhe jolajola jwaatupekie twenga patukahobhalela Hangwana Ayesu Kilisito, nenga nga ganiki ngombole kwaakana Annoongo?"

18 Pabhakajoanga malobhe genago bhakakotokanga, na kwalumbalila Annoongo, kulongela, "Bahi, Annoongo atekwapekea bhangu bhanga Bhayahudi upenyo gwa kukonda na kuleka mabohu gabhenji ili bhapatange umomi."

19 Bahi, bhenibhala bhandu bhabhakahobhalela Ayesu bhabhakapwilinganika ligongo lya konikola kulaga kukolongwa kwa ngani jijikaabhokela Asitefano, bhandu bhabhahobhalela Ayesu bhakabhutukanga na kujaula ku Fonike na ku Kipulo na Antiokia, bhakatangachanga lyenilela lilobhe kwa Bhayahudi jikajabhenji. 20 Nambo bhangi pakati jabhenji bhabhakabhokanga ku Kipulo na ku Kilene, na bhenabho bhakajaulanga ku Antiokia bhakalobholanga na bhandu bhanga Bhayahudi, hela hela akaatangachianga Ngani Jammbone ja Hangwana Ayesu. 21 Mchili ga Hangwana gakabhee pamo nabho, bhandu bhajingi bhakahobhalela na kwatendebhukila Hangwana.

22 Ngani hejo jikajohanika kwa bhandu bhabhahobhelela Ayesu bhabhatamita ku Yelusalemu, bahi akaatuma Abanaba ajaule ku Antiokia. 23 Pabhakahika konokwe na kubhona namuna Annoongo chiatekwapea bhena bhandu neema jabhe, akahachuka na kwakulumikia bhapundange kubhee bhakuhaminika kwa Hangwana. 24 Abanaba nga mundu jwammbone, jwahobhalela na jwalongolelwa na Mboomo ja Annoongo, bhandu bhajingi bhatekujonjokeka upande gwa Hangwana.

25 Ngapena Abanaba akajaula ku chalambo cha Taliso kwaloleha Asauli. 26 Pabhakampata akaaleta ku Antiokia. Na bhoa bhabhele bhakakatamanga na lyenilyela libhoga lya bhandu bhabhahobhalile Akilisito kwa chaka choa bhakajigananga libhoga likolongwa lya bhandu. Konokwe ku Antiokia, nga kukukajemeka kukemwa lilubhalo lilikaahobhalela Ayesu kukemwanga Akaakilisito.

27 Machobha gogogo akalondohi bha Annoongo bhakahikanga kubhoka ku Antiokia kubhoka ku Yelusalemu. 28 Alondohi bha Annoongo bhamo lihina lyabhe Agabo, akajema kwa ukolo gwa Mboomo jwa Annoongo akalondola kupakubhee likuluta mu chilambo choa. Likuluta lyenelyo likaika machobha ga Akaisali Tibelio pabhatendita kuhukumula. 29 Bhenibhala bhabhachigana bha ku Antiokia, bhakaamuanga kila jumo jwabhenji handa chibhapakombola abhoe chilebhe choachela ligongo lya kwajangatilanga bhenibhala bhandu bhabhahobhalela Ayesu bhabhatamanga ku Yudea. 30 Bhakatendanga henela, na bhakaatumanga Abanaba na Asauli bhapelekange mbiya heyo kwa akaakolo bha lilubhalo lilyahobhalela Akilisito konokwe ku Yudea.