1 Pagakapeta genago, Ayesu akaabhokela kabhele bhabhachijigana bhabhe nngulugulu ja litanda lya Tibelia. Henela nga chibhakaabhokelanga, 2 Asimoni Apetulo, Atoma jwakemitwa Mabhela, na Anatanaeli jwakabhokela ku Kana ja Ku Galilaya, bhaana bha Azebedayo na bhabhachijigana bhangi bhabhele bha Ayesu bhoha bhakibhanga pamo. 3 Asimoni Apetulo akaalobholenga akaajabhe, "Ndendakujaula koka homba."

Bhenaangota bhakaalobholela, "Tupakujaula pamo na mwenga." Bhakabhoka, bhakajingilanga nkati ja ntumbwi nkolongwa, nambo kilo chela choa bhangapatanga homba. 4 Kundabhi tuputupu, Ayesu akajema kuntundu ja litanda, nambo bhabhachijigana bhangaamanyanga kubhee akibha Ayesu. 5 Ngapena Ayesu akaakonyanga, "Bholi, akanangwendo bhangu ntekupatanga homba?"

Bhakajangula, "Elo! Twangapata homba."

6 Ayesu akaalobholelanga, "Ntuluange mapelele upande gwa kunnelo gwa ntumbwi, na mwangota mpakupatanga hoomba." Bhakatuluanga mapelele mmachi kwa upande gonogwe na bhakapatanga hoomba hijingi muno, bhakapatanga homba hijingi hata bhangakombolanga kuhuta mapelele gabhenji.

7 Ngapena jonijola jwachijigana jwakapalikwa muno na Ayesu akaalobholela Apetulo, "Eheee! Habha nga Hangwana!" Palapala Asimoni Petulo pabhakajoa yakubhee jonijola nga Hangwana, akawala ngobho jabhe kwa kubhee bhakibha bhangawala, ngapena akahombela mmachi. 8 Nambo bhenibhala bhabhachijigana bhangi bhakahikanga kuntumbwi nkolongwa kongo bhabhikuhuta lyenilyela lipelele lilikatwelela hoomba, bhangabhee kutali na chilambo chijomo, ila bhakibhanga handa mita mia kubhoka palikajemeka litanda. 9 Pabhakahikanga pachilambo lijomo, bhakagukolelanga mooto gwa makalakala na hoomba hibhekitwe nnani jakwe na mikate. 10 Ayesu akaalobholelanga, "Mbekeange hoomba yengi hinkokitinge."

11 Bahi, Asimoni Apetulo akajingila muntumbwi nkolongwa, akahuuta lipelele kumbwani mwa litanda, lilitwelile hoomba hikolongwa mia jimo hanchini na tatu. Hata handa bhakibhanga homba hijingi henela, lyenilyela lipelele lyangapapuka. 12 Ayesu akaalobholelanga, "Nhikange nnabhukange." Nambo jwakwa hata jumo pakati ja bhabhachijigana bhabhe jwakajiga kwaakonya, "Mwenga nga aganiki?" Kwa kubhee bhakamanyanga kubhee nga Hangwana. 13 Henela Ayesu akajaula, akagutola gonigola nkate akaametulilanga, na akatenda henela kwa yeniyela homba. 14 Jenjeni jikibha mala ja tatu Ayesu kwabhokelanga bhabhachijigana bhabhe tangu pabhakayoka.

15 Pabhakajomolanga kulyee, Ayesu akaakonya Asimoni Apetulo, "Bholi, Asimoni, mwana jwa Ayohana! Ntendakumbala nenga kupunda abha bhangi?"

Nabhena akajangula, "Eloo Hangwana, mwenga muhimanyi nenga ndendakumpala."

Ayesu akaalobholela, "Mwapekee chakulya bhanangondolo bhangu." 16 Ngapena Ayesu akaakonya pabhele Apetulo, "Asimoni mwana jwa Ayohana, ntendakumbala?"

Apetulo akaajangula, "Elo, Hangwana muhimanyi kubhee mwenga ndendakumpala."

Ayesu akaalobholela, "Nnolekee bhanangondolo bhangu." 17 Akaakonya kabhele Apetulo patatu, "Asimoni mwana jwa Ayohana, ntendakumbala?"

Apetulo akahechuka muno kwa kubhee Ayesu akaakonya patatu, "Ntendakumbala?" Akaajangula, "Hangwana, mwenga ntendakugamanya goha, ntendakuhimanya kubhee ndendakumpala." Ayesu akaalobholela, "Mwapekeange chakulya bhanangondolo bhangu. 18 Ndendakunnobholela ukweli, pamwakibha akakombo nkawala na kujaula kumkupala, nambo pampakongopala mpakunyulula mabhoko ginu na mundu jongi apakuntabha nkanda na kumpeleka mwangapala kujaula." 19 Kwa kulobhola henela Ayesu akalangia namuna Apetulo chibhapakujomoka ili kwaapekea ukolo Annoongo, ngapena akaalobholela, "Ngagule!"

20 Penapo Apetulo akatendebhuka na akaabhona jwaachijiga jongi kuyeto, akaabhokana jonijola jwachijigana jwakapalikwa muno na Ayesu, atenda kunkagula. Jono jwaajigana nga jonijola jwakatama kubhandikila na Ayesu kulyee chakulya cha lichobha likolongwa lya Pasaka, jwakaakonya, "Hangwana, nga aganiki jwapakung'aluka?" 21 Bahi, Apetulo pabhakalola jwaachijigana jonojwe, akaakonya Ayesu, "Bholi, niki chipakubhokela kwa habha?"

22 Ayesu akaajangula, "Handa ndendakupala atame jwamomi mpaka pambakubhuja, mwenga jitendakunhuchu niki? Mwenga ngagule!"

23 Bahi ngani hejo jikajenela pakati ja bhenibhala bhabhachijigana kubhee ngajomoka. Nambo Ayesu jwangalobhola kubhee ngajomoka. Nambo akalobhola, "Handa ndendakupala atame jwamomi mpaka pambakubhuja, mwenga jitendakunhuchu niki?"

24 Ojojo nga jonijola jwachijigana jwaatekuhilola ngani heye na kujandika, na twenga tutendakuhimanya kubhee gabhatekulobhola nga ga kweli.

25 Hibhile hikubho yengi hijingi yakubhee Ayesu akatenda. Handa yoa hikajandikwa chimo kwa chengi, ndendakuganikia chilambo choa chikapelile pakubheka hitabu yoa yakubhee hikajaandikwe.