1 Ayesu pabhakajomola kulongela, akabhoka pamo na bhabhachijigana bhabhe kujaula kuntundu ja likote lya ku Kediloni, akajaula mahali papakapandwa mikongo ja mizeituni, akajingila monomwe pamo na bhabhachijigana bhabhe. 2 Bahi, Ayuda jonijola jwaagaluka Ayesu akapamanya penapo kwa kubhee mala hijingi Ayesu akibha atenda kongana na bhabhachijigana bhabhe penapo. 3 Henela Ayuda akajaula mahali penapo, abhikutandaa lilubhalo lya manyemba bha ku Loma na akaalendei bhangi bhabhakatumwanga na akaakung'i akolongwa na Mafalisayo. Bhakahikanga bhakibhanga kandili, lumuli na hilaa. 4 Bahi, Ayesu abhi kuhimanya gagapala kwaakolela, akachipia nnongi jabhenji akaakonyanga, "Ntendanga kwalolea ganiki?"

5 Bhenaangota bhakaajangula, "Ayesu bha ku Nazaleti."

Ayesu akaalobholelanga, "Nenga nga jonojwe."

Ayuda jwakagaluka Ayesu akibha ajemite penapo pamo na bhenaangota. 6 Ayesu pabhakaalobholelanga, "Nga nenga," bhakabhujanga nnyuma na kugwee pahi. 7 Ngapena Ayesu akaakonyanga kabhele, "Ntendanga kwolela aganiki?"

Na bhenaangota bhakajangulanga, "Ayesu bha ku Nazaleti."

8 Ayesu akaalobholelanga, "Ndekunnobholelanga kubhee, nga nenga," "Henela handa ntendakunolea nenga, mwaalekenge habha bhandu bhajaulange." 9 Ayesu akalobhola genago ili likweele lyenilyela lilobhe lyakalobhola, "Atati, bhandu bhenibhala bhankambekea nanganhobhea hata jumo."

10 Asimoni yakubhee Ayesu akaakema Apetulo akaguolomola upanga na kunheketa lichikilo lya kunnelo antumichi jwa akung'i akolo. Ntumichi jonojwe akemitwa Amalukusi. 11 Ayesu akaalagia Apetulo, "Mmujie upanga gwinu muligonelo lyakwe. Bholi, ngotokupetela hibhini yeniyela yakubhee Atati bhangu chibhapalite mbetele?"

12 Ngapena bhenibhala manyemba na jonijola akolo bha manyemba bha Bhayahudi na akaalendelei bha Nyuumba ja Annoongo bhakaakamula Ayesu, na kuntabha kwa migoji, 13 bhakaapeleka oti kwa Aanasi. Aanasi akibha akimundu jwa Akayafa, Akayafa nga jwakibha akung'i akolo kwa chenichela chaaka. 14 Jono Akayafa nga jwakaalobholelanga Bhayahudi, mbaya mundu jumo akomekwe ligongo lya bhandu bhoa.

15 Asimoni Petulo na jwaachijigana jumo jwakankagula Ayesu. Jwachijigana jonojwe jongi akibha atendakumanyika kwa akung'i akolo, henela akajingila pamo na Ayesu mu chebule ja akung'i akolo. 16 Penapo Apetulo akajema panja panniyango. Ngapena jwaachigana jongi jwaamanyikana na akolo jwa akung'i akabhoka panja, akalongela mwikege jwalendela nniyango, ngapena mwikege jonojwe akaalekelea Apetulo kujingila nkati. 17 Jonijola mwikege alendei bha nniyango akaakonya Apetulo, "Bholi, mwenga ngabha jumo jwa hojo mundu?"

Apetulo akaajangula, "Hopo, nenga ngabha jwaachijigana bhabhe."

18 Bhenibhala akaatumichi na akaalendei bhakakungananga mooto gwa makalakala, ligongo pakibha na malili. Apetulo akibha ajemite pamo na bhenaangota abhi kujota mooto.

19 Muda genago pagatendita kupitila, akung'i akolo akaakonya Ayesu ngani ja bhabhachijigana bhabhe pamo na majigano gabhe. 20 Ayesu akaajangula, "Ndekulongela na bhandu bhoa palugwinjili. Machobha goa ndenditakujigana mu Nyuumba ja konganila Bhayahudi na kuchali na mu Nyuumba ya Annoongo, monomwe nga pabhatendita kongananga Bhayahudi bhoa. Nangalongela chikubho choachela kwa chitikita. 21 Kwa niki ntendakonya nenga? Mwakonyange bhandu bhabhatekujoa genigala ganakaalobholelanga bhenaangota bhatendakumanya chinakalobhola."

22 Ayesu pabhakalongela gangani, alendei jumo jwa Nyuumba ja Annoongo jwaakajema pakubhandikila akaapota Ayesu likopi akalobhola, "Jenejo nga namuna ja kwajangula henela akung'i akolo?" 23 Ayesu akaajangula, "Handa ndekulobhola chikubho chibohu, muchilongele chikubho chenecho nnongi ja habha bhandu. Nambo handa ndekulobhola ukweli, kwa niki ntekumbota?"

24 Ngapena Ayesu abhi atabhitwe kwa migoji, Aanasi akaapeleka Ayesu Akayafa yakubhee nga akung'i akolo.

25 Muda gonogwe Asimoni Petulo akibha ajemite penapo abhikujota mooto. Henela bhandu bhangi bhabhakibha penapo bhakaakonya, "Bholi, mwenga ngabha jumo jwa bhabhachijigana bhabhe?"

Apetulo akakana, akalobhola, "Hopo, nenga ngabha jwaachijigana bhabhe."

26 Jumo jwa abhanda bha akung'i akolo, alongo jwa jonijola jwakaheketwa lichikilo na Apetulo, akaakonya, "Bholi, mwenga nangammona na jonojwe konikola mu buchitani?"

27 Apetulo akaakana kabhele, na popopo likambaliko likajemba.

28 Kundabhi tuputupu akachilongola bha Bhayahudi bhakaatola Ayesu kubhoka mu Nyuumba ja Akayafa na kupelekwa ku Nyuumba ja akolo bha ku Loma. Akaachilongola bha Bhayahudi bhangajingilanga nkati ja nyuumba jenejo ligongo bhangapalanga bhakotokondekwa kwaachalila Annoongo. Ili bhakombolange kulyee chakulya cha lichobha likolongwa lya Pasaka. 29 Henela Apilato akabhoka panja, akaakonyanga, "Bholi, ntendakwatakia hojo mundu kwa kulemwa chiniki?"

30 Bhakaajangula, "Handa hojo mundu akabhihopo abohu, tukaaletitehopo kwachinu."

31 Apilato akaalobholelanga, "Bahi, muntolange nkaahukumule kwa Malagio ginu."

Bhayahudi bhakaajangula, "Tweenga twangali ukolo gwa kwakoma mundu joajola." 32 Gatendike gangani ili chenichela chibhakalondola Ayesu chikwele, kulangia apakujomokabholi.

33 Ngapena Apilato akajingila nkati ja nyuumba jabhe ja chimwenye, bhakalagia bhaalete Ayesu kwaachabhe, akaakonya "Mwenga nga Amwenye bha Bhayahudi?" 34 Ayesu akaajangula, "Bholi, gangani gangonya nenga nga maganikilo ginu au bhandu bhangi bhatekunnobholela ngani yangu?"

35 Apilato akaajaangula, "Mganikia nenga na Ayahudi? Bhandu bhinu na akung'i akolo bhannetite kwaachangu. Nnemwite chiniki?"

36 Ayesu akajangula, "Umwenye gwangu ngabha gwa pachilambo heche. Handa Umwenye gwangu gukabhee gwa pambani pachilambo bhabhangagula nenga bhakambotanile ili ngotokamulikwa na Bhayahudi. Nambo Umwenye gwangu ngabha gwa chilambo heche."

37 Apilato akaakonya, "Mwenga nga Amwenye?"

Ayesu akaajangula, "Mwenga ntekulobhola kubhee nenga nga Amwenye. Nenga ndekubhelekwa na ndekuhika pachilambo ligongo lya genago, kwaalobholelanga bhandu ngani ja ukweli. Mundu joajola jwakagula ukweli atendakunyoanikia."

38 Apilato akaakonya, "Ukweli nga chiniki?"

Ngapena Apilato akapita kabhele panja na kwalobholelanga akaachilongola bha Bhayahudi bhabhatekwatakia Ayesu, "Nangakolela kulemwa kohakola kwa hojo mundu. 39 Nambo mwangota ntekuyobhalelanga kubhee muda gwa lichobha likolongwa lya Pasaka nenga ndendakwajogolela ntabhwa jumo. Bholi mwapalanga naajogolele abha Amwenye bha Bhayahudi?"

40 Bhenaangota bhakapotanga nyenye bhabhikulobhola, "Ngabha hojo mundu! Ntujogolele Abalaba!" Abalaba akibha apoki.