1 Lichobha lya tatu kukibha na kuhangalila ulombela konokwe ku Kana ja kuchilambo cha Galilaya. Na anyongo bhabhe Ayesu akibha penapo. 2 Ayesu na bhabhachijigana bhabhe bhakalaalikwa konokwe kuulombela. 3 Divai pajikajomoka, anyongo jwabhe akaalobholela Ayesu, "Divai jijomwike." 4 Ayesu akaajangula, "Choonde mwe anyongo, nkotokunobholela cha kutenda. Saa jakutenda lihengo lyangu lyangahika." 5 Ngapena anyongo jwabhe Ayesu akaalobholelanga bhenibhala akaatumichi, "Lyoalela libhapakunnobholelanga, ntendange."

6 Penapo pakibha na hibhega sita ja kubhekela machi hiikahalakilwa na maganga, handa chiiyobhalilike kwa Bhayahudi kuchijelejea ili kondekwa kwaachalila Annoongo, kila chibhega chikatola mabede nhano au sita. 7 Ayesu akaakulumikia bhenibhala akaatumichi, "Muitweleange hibhega yeneyo machi." Na bhenaangota bhakatweleanga mpaka nnani. 8 Ayesu akaalobholelanga, "Ngocheni ntekange, mumpelekeange akolo bha kuhangalala." 9 Akolo bha kuhangalala pabhagapaa machi genigala akagakolela gatekutendebhuka kubhee divai. Angamanya kujikabhokela divai jenejo nambo bhenibhala akaatumichi bhabhakatekanga machi genigala akaamanyanga. Ngapena akolo jonojwe akankema hangwana bha ulombela panyenje, 10 akaalobholela, "Bhandu bhoa kujemeka kwa kubhoa divai ja kuhalala, ngapena bhandu handa bhakolwililinge, ngapena pabhaletanga divai jenijela jangaalala nambo mwenga mmoite divai ja kuhalala mpaka ngocheni!"

11 Chenjeni nga chikibha chilolelo cha kujemeka chibhakatenda Ayesu konokwe ku chilambo cha ku Kana ja ku Galilaya, konokwe Ayesu akalangia ng'anyimo gwabhe na bhenibhala bhabhachijigana bhakanhobhalela.

12 Pagakapeta genago, Ayesu akatuluka pamo na anyongo jwabhe na akaanung'una bhabhe, na bhenibhala bhabhachijigana bhabhe, bhakajaulanga ku chilambo cha Kapelenaumu kubhakatamanga machobha kachoko.

13 Lichobha likolongwa lya Pasaka ja Bhayahudi pajikabhandikila, henela Ayesu akakwela kujaula chilambo cha Yelusalemu. 14 Konokwe pa Nyuumba ja Annoongo Ayesu akaakolelanga bhandu habhikuuchanga ng'ombe na ngondolo na ngunda na bhandu bhangi bhakatamanga pahi pamecha bhabhikutindiganya mbiya. 15 Ayesu akahalakia nhyakato gwa ng'oji, akaabhenganga bhoa panja ja Nyuumba ja Annoongo pamo na ngondolo na ng'ombe yabhenji, hela hela akapendekulana mecha ja bhenibhala bhandu bhabhatindiganya mbiya na kujita mbiya yabhenji. 16 Akaalobholelanga bhenibhala bhabhahuchitanga ngunda, "Mmoange hilebhe yinunji! Nkombolangabholi kujitenda nyuumba ja Atati bhangu kubhee choko!" 17 Bhenibhala bhabhachijigana bhakakombokelanga Majaandiko ga Annoongo gagalobhola, "Upalyo gwangu kwa nyuumba jinu gupakungoma."

18 Ngapena akaakolongwa bha Bhayahudi bhakaakonya Ayesu, "Mpakombola kutenda chilolelo niki ili kutulangia twenga handa nkweti mamulaka ga kutenda hikubho heye?" 19 Ayesu akaajangulanga, "Mmomolange heje Nyuumba ja Annoongo, na nenga mbakuchenga kabhele kwa machobha gatatu." 20 Akaakolo bha Bhayahudi bhala bhakaakonyanga, "Nyuumba heje ja Annoongo jikachengwa kwa yaaka alobaini na chita, na mwenga nkombolabholi kuchenga kwa machobha gatatu?"

21 Nambo Nyuumba ja Annoongo yakubhee Ayesu jibhatendita kulongelea nga mmele gwabhe. 22 Pabhakayokekwa, bhenibhala bhabhachijigana bhabhe bhakakombokelanga kubhee akalongela genago, ngapena pabhakahobhalelanga Majaandiko ga Annoongo na malobhe gala gabhatendita kulongela Ayesu.

23 Ayesu pabhakibha chilambo cha ku Yelusalemu ku lichobha likolongwa lya Pasaka, bhandu bhajingi bhakanhobhalela ligongo lya hilolelo na hikubho hijingi yakangachika hibhatendita kutenda. 24 Nambo Ayesu jwangahobhalela kuhobhalela kwabhenji kwaachabhe kwakubhee akaamanya chibhabhilinge mu mitima jabhenji. 25 Jwangapala mundu joajola kwalobholela choachela ngani ja bhandu abho, ligongo Ayesu akagamanya goa gagabhile mu mitima ja bhandu.