1 Ngapena Ayesu akalobhola, "Nenga na mzabibu gwa kweli, na Atati bhangu nga alemi. 2 Kila nyaambi nkati jangu lyangaogola matunda, Atati bhangu atenda kuliheketa, na kila nyaambi liliogola kuliheketela ili liogole muno. 3 Mwangota ntekubhee chwapi mumitima ligongo ntekujelejekwa kwa ngani jenijela jinakannobholelanga. 4 Ntamange nkati jangu, handa nenga chindama nkati jinu. Nyaambi ja mzabibu handa ngakamula na litepo ngakombola kuhogola matunda. Henela mwangota ngakombola kutenda chenichela chibhachipala Annoongo handa ngatama nkati jangu."

5 "Nenga nga mzabibu, na mwangota nga nyaambi. Bhenibhala bhabhatamanga nkati jangu, na nenga handa mile nkati jabhenji, bhenaangota bhapakutendanga hikubho hijingi muno hiyabhajila Annoongo, ligongo pangali nenga ngakombolanga kupangana choachela. 6 Mundu joajola handa ngatama nkati jangu alandana na nyaambi lilitekujoma na kunyilila. Nyaambi handa lyeneyo hilondanikwa na kulekelwa pamooto na kutinika. 7 Mwangota handa ntamanga nkati jangu na malobhe gangu gakatama nkati jinunji, bahi nnyopange choachela chimpalanga na mwangota mpakupatanga. 8 Atati bhangu kutukuchwa handa mpakutendanga gajingi genigala gagammajila Annoongo na mwangota mpakubhee bhabhachijigana bhangu. 9 Ndekumpalanga mwangota handa henela Atati chibhambalite nenga. Ntamange kongo mmikumanyanga ndendakumpalanga. 10 Handa mpakondanga Malagilo gangu, mpakutamanga mu upaliho gwangu handa henela na nenga chindendakonda Malagilo ga Atati bhangu na kutama mu upaliho gwabhe."

11 "Ndekunnobholelanga hikubho heye yoha ili kuhangalala kwangu kutame nkati jinu, na kuhangalala kwinunji kukweele. 12 Lyene nga lilagilo lyangu kwaachinu, kubhee mpalanange handa nenga chinakampalanga mwangota. 13 Jwakwa mundu jwaabhile na upaliho nkolongwa kupeta upaliho gwa mundu jwaagubhoa umomi gwabhe ligongo lya akaaganja bhabhe. 14 Mwangota nga akaaganja bhangu handa ntenditinge genigala gandekunnagianga. 15 Ngamkemanga kabhele mwangota akaatumichi, kwa kubhee antumichi ngamanya chibhatenda akolo bhabhe. Nambo ndenkunkemanga mwangota akaaganja, ligongo ndekunhunukulilanga kila chilebhe chinichijoine kwa Atati bhangu. 16 Mwangota mwangahagula nenga, ila nenga nga ndekunhagulanga mwangota na kunnagianga nkatendange genigala gabhagapala Annoongo, yakubhee gapakutama machobha goa. Na Atati apakunpekeanga choachela chimpakujopanga kwa lina lyangu. 17 Ndendakumpeanga Lilagilo lyangu, mpalanange mwangota kwa mwangota."

18 "Bhandu pachilambo handa bhanchimwitinge, mmanyange kubhee bhakajemekanga kunjimwa nenga tangu jinunji mwangota. 19 Handa nkabhilinge bhandu bha pachilambo chenjeni, bhandu bha chilambo bhakampalitinge handa bhandu bhabhe. Nambo kwa kubhee mwangota ngabha bhandu bha chilambo heche, ila nenga ndekunhagulanga kubhoka chilambo chenjeni, nga ligongo bhandu bha pachilambo bhatendakunchimwanga. 20 Nkombokelange malobhe ganannobholilinge, ‘Antumichi nga akolo kupunda hangwana bhabhe.’ Handa bhandu bhakanagia nenga, na mwangota hela hela bhapakunnagianga, handa bhakakondanga malobhe gangu, hela hela bhapakugakonda na malobhe ginunji. 21 Bhapakuntendelanga hikubho heyo ligongo mwangota ntendakungagula nenga, kwa kubhee bhangammanya jonojwe jwaandumite. 22 Handa ngehikitehopo na kwalobholelanga malobhe ga Annoongo, bhakebheehopo na mabohu, nambo nangocheni ngakombolanga kuchitetela kubhee bhanga mabohu. 23 Mundu joajola jwaanjimwa nenga, hela hela atendakwaachimwa na Atati bhangu. 24 Handa nangatenda hikubho pakati jabhenji yakubhee jwakwa mundu jwatendite, nangocheni bhakalemwitingehopo. Nambo nenga nibhikutenda hikubho heyo, na bhenaangota bhatekunjimwa nenga na Atati bhangu. 25 Nambo aga gatendikwe ili genigala gagajandikwe mu Majandiko ga Annoongo gakwele, ‘Bhatekunjimwa pangali kulemwa.’"

26 "Nambo chibhapakuhika jonojwe jwa pahi jangu, nga chimbakwaatuma Ajangatii kubhoka kwa Atati bhangu, jonojwe Mboomo jwa Annoongo. Jonojwe apakunnobholelanga ngani yangu yoa. 27 Na mwangota mpakwalobholelanga bhandu ngani yangu, kwa kubhee mwakibha na nenga mwangota kubhokela kandahi."