1 Ayesu akapunda kwaalobholelanga, "Ndekunnobholelanga malobhe genago nchitimalikange ili nkoto kwakana Annoongo. 2 Bhandu bhapakummenganga mwangota mu Nyuumba ya kuchalila Bhayahudi, muda gutenda kuhika yakubhee kila mundu jwapakunkoma mwangota apakuganikia atendakunchalila Annoongo. 3 Bhandu bhapakwatendelanga hikubho yenjeni yoha ligongo ngaamanya Atati wala nenga. 4 Ndekunnobholelanga mwangota hikubho heye, ili muda chigupakuhika nkombokelange yakubhee nakannobholelanga."

"Nangannobholelanga gangani tangu kandahi kwa kubhee nakibha pamo na mwangota. 5 Nambo nangocheni ndendakujaula kwa jonijola jwandumite, jwakwa mundu jwaangonya, ‘Nnyaula koji?’ 6 Kwa kubhee ligongo ndekunnobholelanga genago goha mitima jinunji jitekuumalika. 7 Nambo nannobholelnga kweli, mbaya kwaachinu nenga nyaule, handa ngajaula Ajangatii ngahika kwaachinunji. Nambo handa nyawile mbaakuntuma kwaachinunji. 8 Na bhenabho chibhapakuhika, apakwaalangia bhandu bha pachilambo kubhee bhatekulemwa nnani ja mabhou, hikubho hiikondekwa nnongi ja Annoongo na hukumulo ja Annoongo. 9 Bhatekutendanga mabohu ligongo nganhobhalelanga nenga, 10 Mboomo ja Annoongo apakunnangia nnani ja kondekwa kwangu nnongi ja Annoongo, ligongo nenga ndendakujaula kwa Atati na mwangota ngammona nenga kabhele. 11 Nnani ja hukumulo, ligongo Lichetani akolo bha chenjeni chilambo atekuhukumulwa."

12 Tangu ngweti gajingi gakunnobholelanga, nambo kwa nangocheni ngakombolanga kugakamulanga. 13 Chibhapakuhika jonojwe Mboomo jwa kweli apakunnangianga mu ukweli goha. Kwa kubhee ngalongela kwa ukolo gwabhe ila apakulongela genigala chibhatekugajoa na apakwaalobholela genigala gabhagajoa kubhoka kwaachangu na kwaalobholelanga genigala gagakupitila nnongi. 14 Jonojwe apakundopea nenga, kwa maana apakunyigananga genigala gabhapakugapata kubhoka kwaachangu. 15 Yoha hibabhinayo Atati nga yangu nenga, nga maana ndekunnobholelanga Mboomo jwa Annoongo apakunnyigananga kongolelanga genigala bhabhagapatite kubhoka kwaachangu.

16 "Tangu muda nchoko na mwangota ngamonanga kabhele nambo muda nchoko guguhika mwangota mpakumonanga."

17 Penapo bhabhachijigana bhangi bhakakonyangana, "Abhi na maana niki pabhalobhola, ‘Tangu muda nchoko na mwangota ngamonanga kabhele nambo muda nchoko guguhika mwangota mpakumonanga.’ Kabhele alobhola, ‘Ligongo ndendakujaula kwa Atati?’ 18 Bhakapundanga konyananga, abhi na maana niki pabhalobhola, ‘Tangu muda nchoko?’ Twangahimanya lyenelyo libhalongela!"

19 Ayesu akahimanya kubhee pabhapalanga kwaakonya, henela akaalobholelanga, bholi ntendakonyanga ligongo "Ndekulobhola, ‘Tangu muda nchoko na mwangota ngamonanga kabhele nambo muda nchoko guguhika mwangota mpakumonang.’ 20 Ndendakunnobholelanga kweli, mwangota mpakugutanga na kuumalika, nambo bhandu bha pachilambo bhapakuhangalala, mwangota mpakuhechukanga nambo kuhechuka kwinunji kupakutendebhuka na kubhee kuhangalala. 21 Haikege pabhachijogola mwana, atendakuhechuka ligongo muda kwa hibhini guhikite, nambo pabhachijogola mwana, jonijola mwikege atenda kulibhalila hibhini yabhe ila atenda kuhangalala ligongo mwana atekubhelekwa pachilambo. 22 Bahi, mwangota hela hela nangocheni ntekuhechukanga, nambo mbakwalola kabhele, na mwangota mpakuhachukilanga mu mitima jinunji na jwakwa mundu jwapakunpokanga kuhachuka kwinunji."

23 "Lichobha helyo palipakuhika, nganyopanga nenga chilebhe choachela. Ndendakunnobholelanga kweli, anamunyopite chilebhe choachela Atati handa chiitendakummajila nenga apakumpekeanga. 24 Mpaka nangocheni mwanganyopanga chilebhe choachela kwa ukolo gwangu. Nnyopange na mwangota mpakupekewanga, ili kuhachukanga kwinunji kukweele.

25 Ndekulobhola na mwangota hikubho heye kwa kulenganikia. Nambo muda gupakuhika yakubhee ngalongela na mwangota kwa kulengania, ila mbakulongela na mwangota ndaa ngani ja Atati bhangu. 26 Lichobha palipakuhika, mpakujopanga kwa namuna chintendakunhobhalela nenga. Ngannobholelanga kubhee nenga mbakunyopelanga kwa Atati ligongo linunji, 27 kwa kubhee Atati mweene atendakumpalanga mwangota. Ligongo mwangota nkambalanga nenga na ntekuhobhalela kubhee ndekubhoka kwa Annoongo. 28 Nenga ndekubhoka kwa Atati, na ndekuhika pambani pachilambo, nangocheni ndenda kuchileka chilambo na kubhuja kwa Atati."

29 Penapo bhabhachijigana bhabhe bhakaalobholela, "Nangocheni nnongela ndaa, pangali kulengania. 30 Nangocheni tuhimanyite kubhee mwenga ntendakuganyama goha, henela twangapala kunkonya chilebhe choachela. Henela tutendakuhobhalela kubhee mmokite kwa Annoongo."

31 Ayesu akaakonyanga, "Bholi, nangocheni ntendakuhobhalelanga? 32 Muda gutenda kuhika, na gutekuhika, yakubhee mwangota mwabhoa mpakupwilinganika kila jumo apakujaula kwaachakwe na kunneka jikajangu. Nambo nenga ngabha jika jangu ligongo mi pamo na Atati. 33 Ndekunnobholelanga hikubho heyo yoha ili ntamange kwa kuhengwa kwa kulondanikanga na nenga. Mu chilambo heche mpakulaganga. Nambo nchipekeange ntima! Kwa kubhee nenga ndekupeta machili gabohu ga chilambo heche!"