1 Ngapena Apilato akaakulumikia Ayesu apetulikwe apotekwe hiyakato. 2 Nabhena manyemba bhakatota hiingwa ya miibha bhakaaweka Ayesu mmutwe. Ngapena bhakaaweka chiwalo cha chimwenye cha chambalau. 3 Bhandu bhakibhanga bhatendakwelanga kabhele na kabhele penipala pabhabhile mu nyuumba ja chimwenye, na kulobholanga, "Kunchelile Amwenye bha Bhayahudi!" Kongo bhabhikumpotanga makopi kumiho.

4 Apilato akabhoka kabhele panja na akaalobholelanga bhenibhala bhabhakalondanika, "Nnolange ndendakunneta abha mundu kwaachinu, na muhimanyange kubhee nangakulola kulemwa kohakola kwa kwaahukumula." 5 Penapo Ayesu akabhoka panja, kongo jwawalite jenijela hiingwa ja miibha na chenichela chiwalo cha Chimwenye. Apilato akaalobholelanga, "Nnolange mundu jwinu hojo pambani!"

6 Bhenibhala bha akakung'i akolongwa na akaalendei bha Nyuumba ja Annoongo pabhakaalola Ayesu bhakapotanga nyenye, "Mwaabhambe panchalaba! Mwaabhambe panchalaba!"

Apilato akaalobholelanga, "Muntolange mwangota mwabhene mkaabhambe panchalaba, nenga ngabhona kulemwa kohakola kwa kwahukumula."

7 Bhayahudi bhakaajangula, "Twenga tutekola Lilagilo na kwa lilagilo lyenelyo apalikwa akomekwe, ligongo akalongela kubhee jonojwe nga Mwana jwa Mundu." 8 Apilato pabhakajoa genago, akajogopa muno.

9 Bahi, Apilato akaatola Ayesu na kujingila nabho nkati na kwaakonya, "Mmokite koji mwenga?"

Nambo Ayesu jwangajangula choachela. 10 Apilato akaalobholela, "Nkana kulongela na nenga, ngahimanya kubhee nenga ndekubhee na ukolo gwa kunnekelela au ukolo gwa kummamba panchalaba?"

11 Ayesu akajangula, "Mkabhilehopo na ukolo kwangu nenga handa nkagapata kubhoka kwa kunani, ligongo ukolo gonogwe mpatite kwa Annoongo. Henela mundu jonijola jwanetite kwaachinu akweti mabohu makolongwa muno."

12 Apilato pabhakajoa henela akalolea ndela ja kwaajogola Ayesu. Nambo Bhayahudi bhakapundanga kupota nyenye bhabhikulobhola, "Handa mpakwaalekelela ngabha aganja bha akolo bha ku Loma! Mundu joajola jwachitemba kubhee jono nga amwenye atendakunkana akolo bha ku Loma!"

13 Bahi, Apilato pabhakajoa malobhe genago, akaaleta Ayesu panja kabhele akatama nnani ja chitengu chabhe cha kuhukumula bhandu, chehemu jijikemitwa payagalilikwe kwa maganga, kwa Chiebulania pakemitwa, "Gabata." 14 Jikibha saa sita muhi. Muda gwa kupanganikia Pasaka, Apilato akaalobholelanga Bhayahudi, "Abha pambani Amwenye bhinu!"

15 Nambo bhenaangota bhakapotanga nyenye bhabhikulobholanga, "Mwakome! Mwakome! Mwabhambe panchalaba!"

Apilato akaakonyanga, "Bholi, naabhambe panchalaba Amwenye bhinu?"

Bhenibhala akaakung'i akolo bhakaajangula, "Twenga twanga Amwenye ila nga akolo bha ku Loma jika."

16 Ngapena Apilato akaabhoa Ayesu akaakamuanga ili bhambhambe panchalaba.

Ngapena manyemba bhakaatola Ayesu. 17 Ayesu akajaula, kongo agupetwile nchalaba gwabhe, akabhoka kujaula mahali papakemitwa, "Lingambwa lya Mutwe." Kwa Chiebulania pakemitwa, "Goligota." 18 Penapo nga pabhakaabhamba Ayesu panchalaba, hela hela bhakabhambwa bhandu bhabhele, jumo nchalaba gwabhe gukibha upande gwa kunchiji na jongi nchalaba gwabhe gukibha upande gwa kunnelo gwa nchalaba gwa Ayesu. 19 Ngapena Apilato akajandika mu chibao, "Ayesu bha ku Nazaleti, Amwenye bha Bhayahudi." Na akachibheka panani ja nchalaba gwa Ayesu. 20 Bhayahudi bhajingi bhakachomanga majandiko genago gagabhile pachibao chenecho ligongo chikibha chibhandikile na pannyini, chibao chenecho chichikajandikwa kwa chilongelo cha Chiebulania, Chigiliki na Chilatini. 21 Bahi, akakolonga bha akaakung'i bhakaalobholela Apilato, "Nkotokujandika, ‘Amwenye bha Bhayahudi,’ ila, ‘Jonojwa akalobhola henela, nenga nga Amwenye bha Bhayahudi.’"

22 Apilato akaajangula, "Gagandekujandika, ndekugajandika!"

23 Manyemba pabhakajomola kwaabhamba panchalaba Ayesu, bhakahitolanga ngobho yabhenji bhakahibhekanga mu malubhalo ncheche, kila linyemba na lilubhalo lyakwe. Hela hela bhakatolanga ngobho jabhe jangatotwa na ngobho jijikatotwa kubhokela nnani mpaka pahi. 24 Manyemba gakalobholelana, "Tukotokujipapula ila kujitendelele gudugudu jibhee tumanye ganiki jwaapakujipata." Chikubho hecho chikatendeka ili gakweele genigala Majandiko gagaakalobhola,

"Bhakagabhananga hiwalo yangu,

na ngobho yangu bhakaityendelela gudugudu."

Bahi, henela nga chibhakatenda manyemba bhenabho.

25 Muda gonogwe kubhandikila na nchalaba gwa Ayesu bhakibha bhajemitinge, Amalia, anyongo jwabhe, Amalia alombo jwa anyongo bhabhe jwakibha hanu jwa Akilopa na Amalia bha ku Magidala. 26 Ayesu paakaabhona anyongo jwabhe penipala, na jwaajigana jwabhe jwakaapala muno ajemite penipala, akalobholela anyongo jwabhe, "Anyongo, nnole jonojwe nga mwana jwinu."

27 Ngapena, Ayesu akaalobholela jonijola jwaajigana, "Jonojwe nga anyongo bhinu." Na kubhokela penapo jwaachijigana akaatola Amalia, atame nabho mu nyuumba jakwe.

28 Pagakapeta genago, Ayesu pbhakahimanya kubhee ajomwile kupangana mahengo gabhe ili Majandiko ga Annoongo gakweele, akalobhola, "Ndekola nyoota."

29 Penapo pakibha na bakuuli lilitwelile divai jakunjunjulukana. Bahi bhakachubhika lidodoki mu divai jakunjunjulukana, bhakaahibheka mu nkongo gwa hisopo, bhakammekela pakang'wa. 30 Ayesu pabhakajipaa jenejo divai ja kunjunjuluka, Ayesu akalobhola, "Lihengo litekujomoka!"

Ngapena akakotima mutwe gwabhe, akajomoka.

31 Likibha lichobha lya kuchiandaa na Lichobha lya Kupomolela. Akaakolo bha Bhayahudi bhangapalanga mimele hiigalile mu michalabha mu Lichobha lya Kupomolela na Kuchalila. Kwa kubhee lichobha lya kupomolela helyo likibha mu lichobha lya Pasaka. Bhayahudi bhakaajopa Apilato alagie makongono ga bhandu bhoa bhabhatekubhambwa panchalaba bhajiekete na mimele jabhenji bhajitwulue pamichalaba. 32 Bahi, manyemba bhakajaulanga, bhakahengelana makongono ga mundu jwakujemeka, hela hela bhakahengelana makongono ga jonijola jongi. 33 Nambo pabhakaahikila Ayesu, bhakabhona yakubhee bhatekujomoka, henela bhangaahengelana makongono gabhe. 34 Nambo Linyemba jumo akaahoma Ayesu mulubhahu kwa nkoa, na palapala ikaabhoka mihai na machi. 35 Jonojwe jwakabhonite chikubho hecho chibhatenda kupitila nga atekutulobhobholela ili twenga tuhobhalelange. Na genago gaatekutulobholela nga kweli, kabhele jonojwe atendakuhimanya kubhee atendakulobhola ukweli. 36 Chikubho hecho chikatendeka ili gakweele genigala Majandiko gagatekulobhola, "Gwaakwa hata nhupa gwabhe gumo gugupakuhengelekwa." 37 Kabhele Majandiko gangi galobhola, "Bhapakwalola jonijola bhabhatekwahoma nkoha."

38 Pachikapeta chikubho chenecho, Ayosefu jwakubhoka kuchilambo cha Alimataya jwaakibha jwaachijigana jwa ayesu kwa kuchiiya, akaajopa Apilato ampekee mmele gwa Ayesu. Ligongo atendita kwaajogopa akaakolongwa bha Bhayahudi. Apilato akaalobholela Ayosefu agutole mmele gwa Ayesu, henela Ayosefu akajaula kugutola mmele gwa Ayesu. 39 Anikodemu jonijola jwakaakagula Ayesu kilo nabhena akahika, Anikodemo akaleta ubhumba gugutekuhangalana na mahuta ga bei ngolongwa gakunungila gagakemitwa manemane na ubhani, na gagakibha na kilo handa makomi gatatu. 40 Bahi, bhandu habho bhabhele bhakagutola mmele gwa Ayesu na bhakaguhililila chaanda pamo na mahuta gakunungila, handa chiiyobhalilike kwa Bhayahudi mu kuchikanga. 41 Henela mahali penapo pabhakabhambwa Ayesu pakibha na buchitani ja mikongo na mubuchitani jenejo pakibha na mbako jiyono yakubhee jwakwa mundu jwakachikwa mu mbako jenejo. 42 Ligongo likibha lichobha lya Bhayahudi lya kuchiandaa na Lichobha lya Kupomolela, na ligongo mbako jenejo jikabhandikila, bhakagubheka monomwe mmele gwa Ayesu.