1 Nambo Ayesu akajenda ku litombi lya Mizeituni. 2 Malabhi jakwe kundabhi Ayesu akaika kabhele pa Nyuumba ja Annoongo. Bhandu bhoha bhakaatindila, na jonojwe akatama pahi kujemeka kwaajigananga. 3 Bhabhajigana bha Malagilo na Mafalisayo bhakaaletela mwikege jumo jwaakamulikwe abhi kutenda ngongola bhakannyemea mwikege jonojwe nnongi ja bhandu bhoa. 4 Bhakaalobholela Ayesu, "Bhannyigana, hojo mwikege atekamulikwa abhikutenda ngoongola. 5 Mu Malagilo Amusa bhakatulagia apotwe maganga mwikege handa hojo, mpaka ajomoke. Nangocheni mwenga nkitabholi?" 6 Bhakakonya henela handa ntaambo bhapatange ndela ja kwaatakia. Nambo Ayesu akakotima, akajandika paundopi kwa lukonji lwabhe. 7 Pabhakapundanga kwaakonya, Ayesu akajinuka akaalobholelanga mundu joajola jwangalemwa alongolele kwampota liganga. 8 Ayesu akakotima kabhele na kujaandika pahi. 9 Bhandu bhala pabhakajohanga henela, bhakajemekanga kubhokanga jumo jumo, kujemekela akanaota. Ayesu akaigalila jikajabhe na jonijola mwikege abhi ajemite nnongi jabhe. 10 Ayesu akajimuka na kwaakonya jonijola mwikege, "Mwa amama, bhabhi koji bhandu bhabhakankamula, bholi, jwakwa mundu joajola jwatekunhukumula?"

11 Jonijola mwikege akaajangula, "Mwe mwa akolo jwakwa mundu jwatekuhukumula."

Ayesu akaalobholela, "Maha na nenga kabhele nganhukumula. Nyaule kwachinu nkotokutenda kabhele mabohu kabhele."

12 Ngapena Ayesu akalobholela kabhele Mafalisayo, "Nenga nga nhana gwa bhandu pachilambo. Mundu joajola jwangagula nenga ngajenda mulubhendu ng'o, nambo apakubhee na nhana gwa umomi."

13 Mafalisayo bhakaalobholela, "Mwenga nchikongolela mwabhene malobhe ga kweli, henela malobhe ginu nga ga kweli."

14 Ayesu akaajangulanga, "Hata handa ndendakuchilongolela namwene, kuchikongolela kwangu nga kwa kweli ligongo nenga nikumanyi kumookite na kunyaula. Nambo mwangota ngakumanya kumookite wala kunyaula. 15 Mwangota ntendakuhukumula handa bhandu chibhanhukumulanga, nambo nenga nganhukumula mundu joajola. 16 Hata handa mbakuhukumula, kuhukumula kwangu nga kwa kweli ligongo nenga ngahukumula jika jangu, bali ndendakuhukumula na Atati jwandumite. 17 Jijandikwe mu malagilo ginunji yakubhehe, gabhalongela bhandu bhabhele gatendakondekwa. 18 Nenga ndendakuchilongolela namwene, na jono Atati jwaandumite, atendakulongelea nenga."

19 Ngapena bhakaakonya, "Atati bhinu abhi koji?"

Ayesu akaajangulanga, "Mwangota ngamanya nenga wala ngaamanya Atati bhangu. Handa nkamanyite nenga, hela hela nkaamanyite Atati bhangu."

20 Ayesu akalongela gangani pabhakibha atendakujigana pa Nyuumba ja Annoongo kubhandikila na chanduku lya kubhekela chalaka. Nambo jwakwa mundu jwaankamwile ligongo muuda gwabhe gukibha tangu kuhika.

21 Ayesu akalobholelanga kabhele, "Nenga ndendakujaula, na mwangota mpakunoleanga, nambo mpakujomokanga mu mabohu ginunji. Kunyaula nenga mwangota ngakombola kuhika."

22 Ngapena akanachilongola bha Bhayahudi bhakakonyananga, "Bholi, apakuchikoma mwene? Bholi, nga ligongo alobhola henela, ‘Kunyaula nenga mwangota ngakombola kuhika?’"

23 Ayesu akaajangulanga, "Mwangota mmokanga mu chilambo heche, nambo nenga moka kunani kwa Annoongo. Mwangota nga bhandu bha pachilambo heche, nambo nenga ngabha mundu chilambo heche. 24 Nga kwa maana nakannobholelanga kubhee mpakujomokanga mu mabohu ginunji. Handa ngahobhalelanga ya kubhee, ‘Nenga nga jonojwe,’ mpakujomokanga mu mabohu ginunji."

25 Bhakaakonya, "Mwenga nga aganiki?"

Ayesu akaajangulanga, "Nenga nga jwajola junakannobolelanga kubhokela kandai. 26 Ngweti hikubho hijingi ga kunnongela na kunhukumulanga mwangota. Nambo jonojwe jwaandumite nga bha kweli, na nenga ndendakunnobholelanga bhandu bha pachilambo ganagajoine kubhoka kwaachabhe."

27 Bhangaimanyanga kubhehe Ayesu akibha atenditakulongelanabho ngani ja Atati. 28 Ngapena Ayesu akaalobholelanga, "Pampakwanyakula Mwana jwa Mundu pankongo, ngapena pampakumanyanga kubhee, ‘Nenga nga jwajola,’ na kubhee ngatenda choachela kwa ukolo gwangu, ila nongela genigala gabhakanagia Atati nongele. 29 Jonijola jwaandumite abhi pamo na nenga, jonojwe jwanganeka jika jangu machobha goa ndenda genigala gagaabhajila."

30 Bhandu bhajingi bhabhanyoanikia Ayesu abhikulongela malobhe gangani bhakanhobhalela.

31 Ngapena Ayesu akaalobholelanga bhenibhala Bhayahudi bhabhakahobhalela, "Handa nkamwilinge majigano gangu, mwangota mpakubhee bhabhachiganga bhangu bha kweli. 32 Ngapena mpakuimanyanga kweli na jene kweli jipakuntenda kulekelelwa."

33 Bhenaangota bhakaajangula, "Twenga nga ubhelehi gwa Aibulahimu, na twenga twangabhehe akaabhanda bha mundu joajola. Nkombolabholi kulobhola yakubhee twenga tupakulekelwa?"

34 Ayesu akaajangulanga, "Kweli ndendakunnobholelanga, mundu joajola jwaatenda mabohu nga mmanda jwa mabohu. 35 Mmanda ngatama machobha goa kaja, nambo mwana atama kaja machobha goa. 36 Mwana handa atendite kulekelwa, mpakulekelwanga kweli kweli. 37 Ndenda kuimanya yakubhee mwangota nga ubhelehi gwa Aibulahimu. Nambo mwangota mpalanga kungoma ligongo malobhe gangu ngatamanga mu mitima jinunji. 38 Nenga ndendakunnobholelanga genigala ganagabhonite panakibha Atati, na mwangota hela hela ntendanga genigala gamugajoine kubhoka kwa atati bhinu."

39 Bhakaajangulanga, "Twenga atati bhitu nga Aibulahimu!"

Ayesu akaalobholelanga, "Handa mwangota nkabhilinge bhana bha Aibulahimu, nkatenditinge handa genigala gabhatendite atati bhinu Aibulahimu. 40 Nambo nangocheni mwangota mpalanga kungoma, mundu yakubhee jundekunnobholelanga kweli genigala gandekujoa kubhoka kwa Annoongo. Aibulahimu jwangatenda chikubho handa chenjeni! 41 Mwangota ntendanga hikubho hibhatenda atati bhinu."

Bhakaajangula, "Twenga twangabhelekwa kwa kutenda ngongola, tukweti Atati bhamo, yakubhee Annoongo."

42 Ayesu akaalobholelanga, "Handa Annoongo akabhile Atati bhinu, nkambalite nenga, kwakubhee nakabhoka kwa Annoongo na ngocheni mmi pambani. Nangaika kwa ukolo gwangu mwene, ila kwa ukolo gwa jonojowe jwaandumite. 43 Kwa niki ngaelewanga gandendakulongelanga? Ligongo mwangali uwecho gwa kugakamula majigano gangu. 44 Mwangota nga bhana bha Abohu, mwangota ntendakagulanga chibhalokolila atati bhinunji. Jonojwe akibha akomi kubhokela kandai, na ngakombola kujemelela ukweli ligongo nkati jabhe gakwa ukweli. Pabhalobhola unami alobhola handa chibhayobhalile ligongo nga anami na nga atati bha unami. 45 Kwa kubhee panongela ukweli, na mwangota ngahobhalelanga. 46 Nga ganiki nkati jinunji jwakombola kulangia kubhee nenga ngweti mabohu? Handa ndendakunnobholelanga gagabhi kweli, kwa niki nganhobhalelanga? 47 Joajola jwabhoka kwa Annoongo kugajohanikia malobhe ga Annoongo. Nambo mwangota ngajohanikianga ligongo ngabhoka kwa Annoongo."

48 Akachilongola Bhayahudi bhakaakonya Ayesu, "Bholi, twangalongela kweli kubhee mwenga nga bha Nsamalia na nkweti lihoka?"

49 Ayesu akaajangulanga, "Nenga nanga lihoka, nambo nenga ndendakwatopea Atati bhangu, nambo mwangota ngandopeanga. 50 Nenga ngalolea ukolo gwangu namwene, nambo abhile jumo jwaalolea ukolo gonogwe, jonojwe nga aliwali. 51 Kweli ndendakunnobholelanga, mundu joajola handa akamwile majigano gangu jonojwe ngajomoka machobha goa."

52 Ngapena Bhayahudi bhakaalobholela, "Nangocheni tuimanyi kubhee mwenga nkweti lihoka. Aibulahamu akajomoka na hela hela akaalondohi bha Annoongo bhakajomokanga, nambo mwenga nnobhola, mundu joajola handa akamwile majigano ginu ngajomoka machobha goa. 53 Bholi, mwenga nga mwakolongwa kupunda atati bhitu Aibulahimu? Jonojwe akajomoka na hela hela akalondohi bha Annoongo bhakajomokanga. Bholi, mwenga ng'anikia kubhee nga aganiki?"

54 Ayesu akaajangulanga, "Handa kuching'anyima namwene, ukolo gwangu ngabha chilebhe. Atati bhangu nga jwang'anyima nenga yakubhee mwangota nnolobhola kubhee Annoongo bhinu, nga jwang'anyima nenga. 55 Mwangota ngaamanya, nambo nenga ndendakummanyanga. Handa nongile ngaamanya, mbakubhee anami handa mwangota. Nambo nenga naamanyi na kutenda chibhapala. 56 Atati bhinu Aibulahimu, akahachukula abhone lichobha lyangu, jonojwe akalibhona na kuliachukila."

57 Bhayahudi bhakaakonya, "Bholi, mwenga mwangahika hata yaka hamsini, nkombolabholi kulongela mwabhonite Aibulahimu?"

58 Ayesu akaajangulanga, "Kweli ndendakunnobholela, tangu Abulahimu jwangabhe, ‘Nenga nakibha.’"

59 Ngapena bhakalokotanga maganga ili bhampote, nambo Ayesu akachiiya, akatelenya pa Nyuumba ja Annoongo.