1 Ayesu akaalobholelanga, "Kweli ndendakunlobholelanga, mundu joajola jwangajingila mu lichinga kupetela ndela ja nniango, nambo akwela kujingila nkati kwa ndela jengi, hojo nga abwihi na apoki. 2 Mundu jwaajingila kwa kupetela panniango jonojwe nga achungaji bha ngondolo. 3 Ajemelei jwa nniango atendakwajogolela na ngondolo kulijoa lilobhe lyabhe, na atenda kuikema ngondolo kwa mahina gabhenji na kwapianga panja. 4 Handa ajomwile kwapianga bhoha panja, atendakulongolela nnongi jabhenji na ngondolo hitendakagula ligongo bhatendakulimanya lilobhe lyabhe. 5 Nambo ngondolo ngaakagula hageni, bali bhapakummutuka, kwa ligongo ngamanyanga lilobhe lya hageni."

6 Ayesu akaalobholelanga kulandanikia hokoko, nambo bhenaangota bhangaelewanga genago gabhatendita kwalobholelanga.

7 Ngapena, Ayesu bhakalobhola nabho kabhele akaalobholelanga, "Kweli ndendakunlobholelanga, nenga nga nniango gwa ngondolo. 8 Bhoha bhabhalongolilinge nga akabwihi na akaapoki, nambo ngondolo bhangaajoanikianga. 9 Nenga nga nniango. Mundu joajola jwapakujingila mu lichinga kwa kupetela kwachangu apakuokolewa, apakujingila na kubhoka, na kujaula mahali pakulyee. 10 Abwihi kuhika ili kujibha, kukoma na kualabiana. Nenga nakahika ili mmangange na umomi gwa machobha goa, ngapena bhabhenago tuumbe."

11 Nenga nianchungaji bhammbone. Anchungaji bhammbone kubhoa umomi gwabhe ligongo lya ngondolo yabhe. 12 Mundu jwaalia ngondolo kwa kulepwa ngabha akola ngondolo, pabhammona limehi atendakuika, kwalekanga ngondolo na kubhutuka, ngapena mamehi kuikamula na kuipwilingania. 13 Mundu jonojwe apakubhutuka ligongo jonojwe nga mundu jwa kulepwa ngaajali ngondolo. 14 Nenga nga anchungaji bhammbone. Ndendakwamanya ngondolo yangu na ngondolo yangu hitendakumanya, 15 handa henela Atati chibhatendakumanya nenga, na nenga chindendakwamanya Atati, na nenga mii tayali kujomoka ligongo lya ngondolo. 16 Ngweti ngondolo yengi yakubhee ngabha bha hele lichinga, au hela hela mbalikwa kwaletanga pamile. Na bhenaangota bhapakulimanya lilobhe lyangu, henela papakubhee na lilubhalo limo na anchungaji jumo.

17 "Chibhambalila Atati nga kugubhoa umomi gwangu ngapena nigupokele kabhele. 18 Jwaakwa mundu jwagubhoa umomi gwangu, nenga ndendakugubhoa kwa kupala namwene. Ndendakombola kugubhoa umomi gwangu na ndendakombola kugubhujia kabhele. Henela nga chibhatekungulumikia Atati ndende."

19 Bhayahudi pabhakajoanga malobhe genago ga Ayesu bhametunikange. 20 Bhangi pakati jabhenji bhakalobholanga, "Hojo akweti lihoka, kabhele nga mpangai! Kwa niki ntendakwajonikia?"

21 Bhangi bhakalobholanga, "Mundu jwatekola lihoka ngakombola kulongela handa henela. Bholi, lihoka litendakombola kunnamia miho ya mundu jwangalola?"

22 Konokwe ku Yelusalemu kukibha na lichobha likolongwa lya kubhekwa kabhele Nyuumba ja Annoongo chwaapi ligongo lya kondekwa kwaachalila Hangwana, na machobha genago gakibha machobha ga malili. 23 Ayesu atendita kujenda nkati ja Nyuumba ja Annoongo palubhanja lwa Asolomoni. 24 Lilubhalo lya Bhayahudi bhakaantindila na kwaakonya, "Mpakutubheka mu maganikilo mpaka lii? Ntukongolele pandaa handa mwenga nga Akilisito."

25 Ayesu akaajangulanga, "Ngankongolelanga, nambo ngahobhalelanga. Mahengo ganagatenda nenga kwa ukolo gwa Atati bhangu. 26 Nambo nganhobhalela, ligongo mwangota ngabha ngondolo yangu. 27 Handa henala ngondolo chibhajoanga lilobhe lya anchungaji bhabhenji, bhandu bhangu bhatendakuchimanya chinnongela ndendakwamanyanga na bhatekubhee bhabhachijigana bhangu. 28 Nenga ndendakumpekeanga umomi gwa machobha goa, na bhenaangota ng'o ngalekana na Annoongo, na jwakwa mundu jwapakombola kwabhoanga mmabhoko gangu. 29 Atati bhangu jwambekie habha nga nkolongwa kupeta bhoha na jwakwa mundu jwakombola kwaapokonyola mmabhoko gabhe. 30 Nenga na Atati bhangu nga chilebhe chimo."

31 Henela, Bhayahudi bhakalokotanga kabhele maganga ili kwaapota Ayesu. 32 Ayesu akaalobholela, "Ndekunnangianga hilolelo hijingi hiibhokite kwa Atati. Ligongo lya hilolelo niki pakati ya yeneyo hiipakuntendanga mbotange maganga?"

33 Akachilongola bha Bhayahudi bhakaajangula, "Ngampota maganga ngabha kwa ligongo lya lihengo linu lyammbone, ila nga ligongo lya kwaaponja Annoongo. Mwenga nga mundu nchitemba kubhee handa Annoongo."

34 Ayesu akaajangulanga, "Bholi, jangajandikwa mu Majandiko ga Annoongo, ‘Mwangota minoongo?’ 35 Handa bhenibhala bhabhatekwaapekea lilobhe lyabhe akalobhola bhatekulandana na jonojwe, nga henela Majandiko ga Annoongo nga ga ukweli machobha goa. 36 Bholi, nkombolabholi kwaalobholela atenda kutukana jonijola Atati jwaatekwabhoa Atati kwa lihengo lyabhe na kwaatuma pachilambo ligongo ndekulobhola, ‘Nenga nga Mwana jwa Annoongo?’ 37 Handa ngatenda mahengo ga Atati, bahi nkotokunhobhalela. 38 Nambo handa ndendakutenda mahengo ga Annoongo, hata handa ngapalanga kuhobhalelanga nenga nhobhalelange mahengo genago, ili muhimanyange kubhee Atati abhile nkati jangu, na nenga mile nkati jabhe."

39 Ngapena bhakajiganga kwaakamula kabhele Ayesu, nambo akapokonyoka mmabhoko gabhenji.

40 Ayesu akajaula kabhele kutundu ja loochi Yolodani mahali penipala pabhatendita Ayohana kubaticha bhandu, jonojwe akatama konokwe. 41 Bhandu bhajingi bhakaajaulila Ayesu, na bhenaangota bhakalobholanga, "Ayohana jwangatenda chilolelo choachela, nambo kila chilebhe chibhalongile Ayohana nnani ja hojo nga cha kweli." 42 Bhandu bhajingi konokwe bhakaahobhalela Ayesu.