1 Machoha sita tangu ja lichobha likolongwa lya Pasaka, Ayesu akajaula ku Betania konokwe kubhatamita Alazalo yakubhee Ayesu akaayoa. 2 Konokwe bhakahalakianga ndalilo, Amalata akibha atendita kwatumikilanga, Alazalo akibha jumo jwa bhenibhala jwatendita kutama na Ayesu kulyee. 3 Ngapena Amalia akatola chuupa cha mahuta gakungila maha ga bei ngolongwa akagakuchulila mmakongono ga Ayesu na kugauta kwa majungu gakwe. Nyuumba joa jikanungila maha. 4 Ngapena Ayuda Isikalioti, jumo jwa bhenibhala bhabhachijigana bhabhe Ayesu yakubhee nga jwapakung'aluka Ayesu, akalobhola, 5 "Kwa niki mauta gangani gangahuchwa kwa mbiya dinali mia tatu nga handa malepo ga miheyi jitatu na mbiya heyo twapekee akaahocho?" 6 Ayuda akalongela henela ngabha kwa kubhee akaakolee kiha muno akahocho, nambo ligongo akibha abhwihi, jonojwe nga jwaakibha jwakulolekea nhuko gwa mbiya na atendita kujibha chenichela chichibhekitwe monomwe.

7 Nambo Ayesu akalobhola, "Munnekange. Akagaemela mahuta genago ili agabheke ligongo lya lichobha lyangu lya kuchikwa. 8 Akaahocho mmilingenabho machobha goa nambo ngabhee na nenga machobha goa."

9 Nkutuli nkolongwa gwa Bhayahudi pabhajoanga kubhee Ayesu akibha konokwe ku Betania, bhakajaulanga konokwe ngabha kwalola Ayesu jikajabhe, nambo hela hela bhapalitanga kwalola Alazalo, mundu jonijola yakubhee Ayesu akaayoa. 10 Akaakung'i akolongwa bhakaloleanga kabhele ndela ja kwakoma Alazalo, 11 ligongo lya kuyoka Alazalo Bhayahudi bhajingi bhatendita kwalekanga akachilongola bhabhenji, bhakaajendelela Ayesu na kunhobhalela.

12 Malabhi jakwe, nkutuli nkolongwa gwa bhandu bhabhakahikanga mu lichobha likolongwa lya Pasaka bhakajoanga kubhee Ayesu akibha nndela kuhika ku Yelusalemu. 13 Bahi, bhakaheketanga nyaambi ya mikongo ja mitende, bhakabhokanga kujaula kwapokela, kongo bhabhikweanga lilobhe bhabhikulobholanga,

"Alumbalilwe Hangwana! Atendilwe gammbone jonojwe jwahika kwa lina lya Hangwana.

Atendilwe gammbone Amwenye bha Isilaeli!"

14 Ayesu bhakankolela mwana liponda jumo, akatama nnani jakwe handa chiijandikwe mu Majaandiko ga Annoongo,

15 Mwe mwa bhandu bha ku Yelusalemu, "Nkotokujogopa!

Nnole, Amwenye jwinu atendakuika,

akwelite mwana liponda!"

16 Bhabhachijigana bhabhe Ayesu kandahi bhangaelewa hikubho heye, nambo Annoongo pabhakalangia kubhee Ayesu chibhabhile akolo, penapo nga pabhakakombokaelanga kubhee hikubho heye hikajandikwa ligongo lyabhe, na kubhee bhandu bhakaatendela henela.

17 Nkutuli gwa bhandu bhenibhala bhabhakibhanga pamo na Ayesu pakaakema Alazalo kubhoka kulikabuli na kwayoa, bhatendita kujeneanga hikubho yela hiikabhokela. 18 Nga kwa ligongo bhandu bhajingi bhakajaula kwapokela, ligongo bhakajoanga chilolelo hecho chibhakatenda. 19 Henela Mafalisayo pabhakagabhona genago bhakakonyananga, "Bholi, tendakubhonanga? Ngakombolanga kutenda choachela! Nnolange, bhandu bhoa bha pachilambo bhatendakunkagula jonojwe."

20 Pakati ja bhandu bhabhakajaulanga ku Yelusalemu mu lichobha likolongwa lya Pasaka pakati jabhenji bhakibhanga Bhagiliki. 21 Bhandu abho bhakajaulanga kwa Afilipo, mundu jwa kubhoka ku Betisaida mu chilambo cha Galilaya, bhakajopanga bhabhikulobholanga, "Mwakolo, twenga tupala kwabhona Ayesu."

22 Afilipo akajaula, akaakongolela Aandulea, na penapo bhoha bhabhele bhakajaulanga kwalobhobholela Ayesu. 23 Ayesu akaajangulanga, "Muda gwa Mwana jwa Mundu kulangikwa guhikite. 24 Kweli ndendakunnobholela, mbeju ja mpoonga handa ngagwee na kumela, jipakuhigalila mbeju jojojo. Nambo handa jiwile jipakuhogola mbeju hijingi. 25 Bhandu bhala bhabhapalanga umomi gwabhenji bhapakuguhobhea, na bhabhapakuguchimwa umomi gwabhenji mu chilambo heche bhapagutendanga umomi gwabhenji gubhee gwa machobha goa. 26 Joajola jwandumikila hipaalikwa kungagula, na penipala pambakubhee nenga nga ntumichi jwangu pabhapakubhee. Atati bhangu apakwatopea mundu joajola jwandumikila nenga."

27 "Nangocheni ntima gwangu gutendakulaga muno, na nobhole chiniki? Bholi, nobhole, ‘Atati, nhokoe kubhoka mu ibhini heye?’ Ngabha, nga ligongo nakahika nyomoke ligongo lya bhangi. 28 Atati, litopelwa lina linu."

Ngapena lilobhe likajoanika kubhoka kunani kwa Annoongo, "Ndekulitopea na nenga mbakulitopea kabhele."

29 Gonigola nkutuli gwa bhandu gugukajema penapo bhakajoanga lilobhe lyenelyo, na bhandu bhangi pakati jabhenji bhakalobholanga, njai jitendakulindimila, bhangi bhakalobhola, "Antumichi bha kunani kwa Annoongo alongile nabho!"

30 Ayesu akaalobholelanga, "Lilobhe hele lijohanike ligono linunji, ngabha ligongo lyangu nenga. 31 Nangocheni nga muda gwa bhandu bha chilambo heche kuhukumulwa, ngocheni akolo bha chilambo heche apakupokonyolwa ukolo gwabhe. 32 Nambo nenga, pambakubhambwa panchalaba, mbakwahutanga bhandu bhoa bhaikange kwachangu." 33 Ayesu akalogela gangani abhikulangia malilo gabhapakujomoka.

34 Gonigola nkutuli gwa bhandu gukapota nyenye gubhikulobhola, "Malagilo gitu gatulobholela kubhee, Akilisito jwaagulikwe na Annoongo apakubhee machobha goa. Kwa niki mwenga nnobhola Mwana jwa Mundu apalikwa kubhambwa panchalaba? Bholi, hojo Mwana jwa Mundu nga ganiki?"

35 Ngapena Ayesu akaalobholelanga, "Nhana tangu gubhile pamo na mwangota kwa muda nnyipinyipi. Nnyendange mmi tangu na nhana, ili lubhendu lukotokunkolelanga, ligongo jwajenda mulubhendu ngamanya kwajaula. 36 Bahi, nhobhalelange nhana gonogwe ili nkombolange kubhee bhana bha gonogwe nhana."

Pabhakajomola kulongela genago, Ayesu akabhoka na akachiiya bhakotombolanga kummona.

37 Hata handa Ayesu akatenda hilolelo hijingi nnoongi jabhenji, nambo bhenaangota bhangahobhalelanga. 38 Henela malobhe gabhalongile alondohi bha Annoongo Aisaya gakakwela,

"Mwe Hangwana, ganiki jwahobhalile ngani jangu?

Bholi, ukolo gwa kuhokoa gwa Annoongo gutekuhunukulikwa kwa aganiki?"

39 Chenecho nga chibhakaatendanga bhakotokwahobhalela Ayesu, ligongo hele hela Aisaya akalongela kabhele,

40 "Annoongo akaatujulanga miho gabhenji,

akaatenda mitima kubhee jakulimba,

bhakotokulola kwa miho gabhenji,

bhakotokuelewanga kwa mitima jabhenji,

wala bhakotokundendebhukila nenga,

na nenga na ngalaamie."

41 Aisaya akalobhola malobhe gangani ligongo akagubhona ng'anyimo gwa Ayesu, na akalongela ngani jabhe Ayesu.

42 Henela bhajingi pakati ja akanachilongola bha Bhayahudi bhakanhobhalela Ayesu. Nambo ligongo lya Mafalisayo bhangalongelanga palundwanje kwa kujogopa kubhee bhapakubhekwanga nnyenje mu nyuumba ja konganilanga Bhayahudi. 43 Bhakapalanga kulumbalilwa na bhandu kupunda kulumbalilwa na Annoongo.

44 Ayesu akapalia lilobhe akalobhola, "Mundu joajola jwanhobhalela nenga, ngahobhalela nenga jika jangu, ila hela hela atendakunhobhalela na jonijola jwandumite. 45 Joajola jwamona nenga, hela hela amweni jonijola jwandumitwe. 46 Nenga ndekuhika pachilambo ili bhandu bhagumanyange nhana gwa kweli ya Annoongo ili kila bhabhahobhalela nenga bhakotokutamanga mulubhendu pangali kugumanya ukweli gwa Annoongo. 47 Mundu joajola handa agajoine malobhe gangu na kugakonda nenga nganhukumula, nambo nangahika kwahukumula bhandu bha pachilambo nambo ndekuhika kwahokoanga. 48 Mundu joajola jwaangana nenga na jwangapokela malobhe gangu akweti gwa kuhukumula. Malobhe gangu gandendakulongela nga gagapakunhumula mu lichobha lya kupela. 49 Ligongo ngalongela kwa ukolo gwangu mwene, ila Atati jwandumite nga jwatekunagia nongela chiniki na nongebholi. 50 Na nenga niimanyi kubhee amuli nga umomi gwa machobha goa. Bahi, nenga nongela tu genigala Atati jwanobholile nigalongele."