1 Pagakapeta genago, kukibha na lichobha likolongwa lya Bhayahudi, na bhena Ayesu akakwea kujaula ku Yelusalemu. 2 Konokwe ku Yelusalemu, kubhandikila na nlyango gugukemwa Nlyango gwa Ngondolo, pakibha na litamanda lilikemwa kwa Chiebulania Betizata, litamanda helyo lilikatindilwa na hibhanja nhano. 3 Monomwe mu lubhanja mukibha na akaatamwa bhajingi bhabhagonikwe, bhangalola, akanangwabha na bhabhapolite mmele, bhenabho bhabhikulendela machi gatitimbulikwe, 4 kwakubhee muuda teno atumichi bha kunani kwa Annoongo bhatendita kutuluka mmachi na kugatitimbua. Atamwa jwaakajemeka kujingila mmachi gagatitimbulikwe, atenda kulama chitamwa choachela chibhakibha nacho. 5 Bahi, penapo pakibha na mundu jumo jwakibha atamwa kwa yaaka chelachini na nane. 6 Ayesu pabhakaabhona mundu jonojwe agolwike penapo kongo abhikumanya kubhee akibha atamwa kwa machobha gajingi, penapo akaakonya, "Bholi, mpala kulama?"

7 Ntamwa jonijola akannyangula, "Mwe Akolo, nenga nangali mundu bha kundumbukia mmachi gagatimbulilwe. Na nenga handa mbalite kutumbukila mu litamanda, mundu jongi kunongolela."

8 Ayesu akaannobholela, "Nnyeme, ntole likai linu nnyende." 9 Popopo mundu jonojwe akalama, akatola likai lyabhe, akajemeka kujenda.

Chikubho chenecho chikateendeka mu Lichobha lya Kupomolela. 10 Henela akachilongola bha Bhayahudi bhakaalobholela mundu jonijola jwaalamite, "Leleni nga Lichobha lya Kupomolela, Malagilo gatendakanikia kutola likai linu."

11 Nambo mundu jonojwe akaajangulanga, "Jwajo mundu jwaatekunamia nga jwatekunobholela, ntole likai linu na nnyende."

12 Bhakaankonya, "Nga aganiki jwaannobholile ntole likai linu na nnyende?"

13 Nambo jonijola mundu jwaalamite jwangaamanya nga aganiki jwannamie, ligongo Ayesu akibha atekujaula na kuangalanika na bhandu.

14 Kubhokela penapo, Ayesu akankolela jonijola mundu jwannamie pa Nyuumba ja Annoongo na kwalobholela, "Nnyoanikie ngocheni ntekulama. Nkotokutenda kabhele mabohu, handa nga henela chikoto kunkolela chikubho changalimmbone muno."

15 Jono mundu akajaula, akaalobholelanga hilongola ya Bhayahudi kubhee Ayesu nga jwakibha atekunnamia. 16 Kwakubhee akaalamia mundu mu Lichobha lya Kupomolela, Bhayahudi bhakajemekanga kwaahabhua Ayesu. 17 Bahi, Ayesu akaajangulanga, "Atati bhangu atenda lihengo hata nangocheni, na nenga hela hela ndenda mahengo."

18 Malobhe gangani gakaachimwanga hilongola ya Bhayahudi, henela bhakaloleanga kila ndela ja kupala kwaakoma Ayesu. Bhakatendanga henela ngabha kwa kuleka Malagilo ga Lichobha lya Kupomolela tu, ila hela hela kwa kwaakema Annoongo nga Atati jwabhe, kwa ngani hejo achitemba alandana na Annoongo.

19 Ayesu akaalobholelanga, "Ndendakunnobholelanga kweli, Mwana ngakombola kutenda chilebhe choachela jika jabhe, akombola kutenda chenichela chibhatenda Atati jwabhe. Kwa kubhee chenichela chibhatenda Atati jwabhe, Mwana atenda helahela. 20 Atati ampala Mwana na atenda kunnangia yoha hibhatenda bhena bhene. Ngapena apakunnangia hilebhe hikolongwa kupeta gangani, ili na mwangota mkapatange kukangachanga. 21 Handa henela Atati kwayoa bhabhawilinge na kwapeanga umomi, hele hela Mwana kwapekea umomi mundu jola jwampala. 22 Atati nganhukumula mundu joajola, nambo lihengo lyoa lya kuhumula annekile Mwana jwabhe, 23 ili bhandu bhoa bhantopee Mwana handa henela chibhantopea Atati. Mundu joajola jwangantopea Mwana, hela hela ngantopea Atati jwantumite."

24 "Kweli ndendakunnobholelanga, mundu joajola jwaajoa malobhe gangu na kwaahobhalela jonijola jwandumite, akweti umomi gwa machobha goa gwangapela. Na jonojwe ngahukumulikwa ng'o, nambo apakubhee apetite kubhoka kumalilo na kujingila mu umomi gwa machobha goa. 25 Kweli ndendakunnobholelanga, lichobha lipakuhika, nangocheni gahikite, bhabhawilinge pabhapakujoanga lilobhe lya Amwana bha Annoongo, na bhenaangota bhabhapakujoanga bhapakubhee bhamomi. 26 Handa henela Atati chibhabhile ndando ja umomi, hela hela ampekie Mwana jwabhe kubhee ndando ja umomi nkati jabhe. 27 Bhena ampekie Mwana jwabhe ukolo gwa kuhukumula kwa kubhee bhenabho nga Mwana jwa Mundu. 28 Nkotokangachanga kujoa gangani, kwa kubhee lichobha lipakuhikaa yakubhee bhenibhala bhabhawilinge bhapakujoanga lilobhe yabhe, 29 bhenaangota bhapakubhokanga mumakabuli gabhenji. Bhenibhala bhabhatendinge gammbone bhapakuyokanga na kupata umomi, na bhenibhala bhabhatendite mabohu bhapakuyokanga na bhahukumulwe."

30 "Nenga ngakombola kutenda chikubho choachela kwa ukolo gwangu namwene. Nenga ndendakuhukumula handa chindendakujoa kubhoka kwa Annoongo, na kuhukumula kwangu kutendakondekwa nnongi ja Annoongo. Ligongo ngatenda handa chimbala namwene, ila ndenda chenichela chibhapala jwandumite."

31 "Handa mbakuchikongolela nenga namwene, bahi malobhe gangu nga ga kweli. 32 Nambo abhi jongi jwaalongela ngani yangu, nenga niimanyi kubhee goa gabhalongela ligongo lyangu nga ga kweli. 33 Mwangota nkabhatumanga bhandu kwa Ayohana, na gabhatendakulongela nga ga kweli. 34 Nambo nenga ngambala bhandu bhalongelange ngani jangu, nambo ndendakulongela gangani ili muokolewange. 35 Ayohana akibha handa lumuli lulujaka na kubhoha nhana, na mwangota nkaguhachukilanga nhana gwabhe kwa muuda nnyipijipi. 36 Nambo nachikongolela namwene kupunda malobhe ga Ayohana. Mahengo gala ganagatenda, gakongolela ngani jangu, genigala yakubhee Atati andumite kugatenda, hilolelo yenjeni niitenda, hilangia kubhee Atati nga jwandumite. 37 Bhena Atati jwandumite alongela malobhe ga kweli nnani jangu. Na mwangota mwangalijoanga ng'o lilobhe lyabhe, wala kwaabhona chibhabhile, 38 na mwangota ngahobhalelanga genigala gabhalongela ligongo ngaahobhalela jonijola jwaantumite. 39 Mwangota ntendakulolekea maha Majaandiko ga Annoongo mmikuganikianga kubhee nkati jabhe mpakupatanga umomi gwa machobha goha. Nambo Majandiko gangani nga gakongolela nenga! 40 Henela mwangota ngapalanga kuhika kwaachangu ili mpatange umomi gwa machobha goha."

41 "Nambo nenga ngapokela nng'anyimo kubhoka kwa bhandu. 42 Nambo ndendakummanyanga mwangota kubhee mwangali upaliho gwa Annoongo mu mitima jinunji. 43 Nenga nhikite kwa lina lya Atati bhangu, na mwangota mwangambokelanga, nambo mundu jongi handa ahikite kwa ukolo gwabhe mwene, jonojwe mpakumpokelanga. 44 Bholi, mwangota nkombolangabholi kuhobhalela kongo mwangota ntenda kupekeana ng'anyimo mwangota kwa mwangota, na kongo ng'anyimo gugubhoka kwa Annoongo jika ngagupalanga? 45 Nambo nkotokuganikianga kubhee nenga mbakunnyochelanga nnongi ja Atati. Nambo Amusa junhobhalelanga nga jonojwe jwapakunnyochelanga. 46 Handa kweli nkaahobhalela Amusa, nkanhobhalile na nenga, kwa kubhee Amusa akajandika ngani yangu. 47 Nambo mwangota handa ngahobhalelanga genigala gabhajandike Amusa, mpakombolabholi kuhobhalela majigano gangu?"