1 Ayesu pabhakajomola kulobhola genago, akalola kunani kwa Annoongo na kulobhola, "Atati, saa jitekuhika, mwatende habha bhandu bhantopee Mwana jwinu, ili Mwana jwinu bhantopee mwenga. 2 Kwa kubhee ntekumpekea Mwana jwinu ukolo kwa bhandu bhoa bhenibhala ili bhaapekeange umomi gwa machobha goha gummbekie. 3 Na gono umomi gwa machobha goha nga gongoni, bhammanyange mwenga, Annoongo jika bha kweli, na bhammanye Ayesu Kilisito jumutumite. 4 Nenga ndekuntopea mwenga pachilambo, kwa kupangana lihengo lintekumbekea kulipangana. 5 Nangocheni, ndopee nnongi jinu kwa gonigola ng'anyimo guminago pamo na mwenga tangu ja kuhalakikwa kwa chilambo."

6 "Ndekuntenda mmanyike kwa bhandu bhenibhala bhambekie pachilambo. Bhakibhanga bhandu bhinu, na mwenga nkambekea nenga, na bhenaangota bhatekujeketelanga malobhe ginu. 7 Nangocheni bhatendakuhimanyanga kila chilebhe chiummbekie nenga hibhokite kwaachinu. 8 Kwa kubhee malobhe gaummbekie nenga na nenga ndekwaapekeanga bhenaangota, na bhenaangota bhatekugapokelanga na kuhimanya kubhee kweli ndekubhoka kwaachinu, na bhatendakuhobhalela kubhee kweli mwenga nga jundumite nenga."

9 "Ndendakwajopelanga bhenaangota. Nenga ngaajopelanga bhandu bha pachilambo, ila ndendakwaajopelanga bhenibhala bhandu bhantekumbekea ligongo habha nga bhinu. 10 Bhandu bhoa bhaminabho nga bhinu, na bhandu bhinu bhoa nga bhangu, na ukolo gwangu gutekuhunukulikwa nkati jabhenji bhenaangota bhantekumbekea. 11 Nangocheni ndendabhoka mu chilambo heche kuhika kwaachinu, nambo bhenaangota tangu bhabhilinge pachilambo. Atati bha jika! Choonde mwalolekee bhabhangagula nenga na mwabheke handa chimmile mwenga, ili bhabhee chilebhe chimo handa nenga na mwenga chitubhile pamo. 12 Panakibha pamo na bhenaangota, nakaalolekenga handa chinkapala mwenga. Jwakwa hata jumo jwaaobhite, ila jonijola jwaakapalikwa kuhobha, ili Majandiko gakweele. 13 Bahi, nangocheni ndendakuhika kwaachinu, ngalongela haga goa panakibha tangu pachilambo, ili bhabhee na kuhachukanga mu mitima jabhenji. 14 Nenga ndekwaapekeanga lilobhe linu, na bhandu bha pachilambo bhatekwachimwa, ligongo bhenaangota ngabha bha chilambo, na nenga ngabha bha chilambo heche. 15 Nenga ngajopa mwabhoange mu chilambo, nambo ndendakujopa mwalolekee kubhoka kwa jonijola Abohu. 16 Nenga ngabha bha chilambo heche, handa henela bhenaangota ngabha bha chilambo heche. 17 Mwatende habha bhandu bhaimanye jenijela kweli, lilobhe linu nga lya kweli. 18 Ntekunduma pachilambo, na nenga ndekwaatumanga pachilambo. 19 Ndendakuchibheka mwene kwaachinu ili bhenaangota bhachikonjange, na bhenaangota bhatendekwe bhebhee bhinu kwa kupetela ukweli."

20 "Ngaajopelanga bhenaangota jikajabhenji, nambo ndenda kwaajopelanga na bhenibhala bhoa bhabhapakungonda nenga kwa majigano gabhenji. 21 Ndendakwaajopela bhoa bhabhee chilebhe chimo. Atati! Ndendakujopa bhatamange nkati jitu handa henela mwenga chintendakutama nkati jangu na nenga ndame nkati jinu. Ndendakujopa bhabhee chilebhe chimo ili bhandu bha pachilambo bhahobhalelange kubhee mwenga utekunduma. 22 Kundopea kuntekumbekea na nenga ndekwapekeanga bhenaangota, ili bhabhee chilebhe chimo handa na tweenga chitubhile chilebhe chimo. 23 Nenga mbakutama nkati jabenji, na mwenga mpakutama nkati jangu. Ili bhenaangota bhachitimalikange bhabhee chilebhe chimo, ili bhandu bha pachilambo bhaimanyange kubhee mwenga nga jundumite nenga, na ntendakwapalanga bhenaangota handa chintendakumbala nenga."

24 "Atati! Mbala bhenaangota bhantekumbekea bhabhee pamo na nenga mahali panipakubhee, ili bhagubhone ukolo gwangu guntekumbekea. Kwa kubhee nkambala tangu chilambo changahalakilwa. 25 Atati juntenda chikubho chammbone kila muda! Bhandu bha pachilambo ngammanya mwenga, nambo nenga ndendakummanya. Na habha bhatendakuhimanya kubhee mwenga nga nndumite. 26 Nenga nanaatenda bhakumanye mwenga na mbakupunda kutenda henela, ili upaliyo gumminago kwaachangu gubhee nkati jabhenji, na nenga ndame nkati jabhenji."