1 Pabhakajomola genago, Ayesu akatenda mahengo mu maeneo gangi ga konokwe ku Galilaya. Jwangapala kujenda kuchilambo cha Yudea ligongo akachilongola bha Bhayahudi bhapalita kunkoma. 2 Lichobha likolongwa lya hilendo ya Bhayahudi jikibha jibhandikile maana gakwe kukombokela kuhamahama ku likonja. 3 Henela akaanung'una bhabhe Ayesu bhakaalobholela, "Mmoke pambani nyauale ku Yudea ili bhenibhala bhabhachijgana bhinu bhabhonange yakangachika hintenda. 4 Mundu jwaapala kumanyikana kwa bhandu ngatenda hikubho yabhe kwa kuchiiya. Handa mpakutenda hikubho heyo nchilangie mwabhene kwa bhandu bha chilambo." 5 Kwa kubhee hata akaanung'una bhabhe bhangaahobhalela. 6 Bahi, Ayesu akaalobholelanga, "Muuda gwangu gwammbone tangu gwangahika, nambo kwaachinu mwenga kila muda nga gwammbone. 7 Bhandu bha chilambo ngakombola kunchimwanga mwangota, nambo bhatendakunjimwanga nenga ligongo ndenda kulangia genigala gabohu. 8 Mwangota nnyaulange mu lichobha likolongwa lyenelyo. Nenga ngajaula ligongo muda gwangu tangu gwangahika." 9 Pabhakalongela henela akahigalila ku Galilaya.

10 Nambo akaanung'una bhabhe pabhakajaulanga mu Lichobha likolongwa helyo, na jono Ayesu akajaula, jwangajenda kwa kuchilangia nambo akajaula kwa chitikita. 11 Akaachilongola bha Bhayahudi bhakibhanga bhakibhalolea Ayesu mu lichobha likolongwa lyenelyo, bhakakonya, "Bholi, mundu jola abhi koji?" 12 Kukibha na nong'omi nong'omi hijingi mu nkutuli gwa bhandu ya ngani ja Ayesu. Pakati jabhenji bhakalobholanga, "Nga mundu jwammbone." Bhangi bhakalobholanga, "Ngabha! Atendakwatembanga bhandu." 13 Nambo jwakwa mundu joajola jwaakalenga kulongela ngani ja Ayesu palundwanje ligongo bhakibhanga bhatenda kujogopanga akachilongola bha Bhayahudi.

14 Lichobha likolongwa lyenelyo palikabhee pakati, Ayesu akakwela kujaula pa Nyuumba ja Annoongo na kujemeka kujigana. 15 Bahi, akachilongola bha Bhayahudi bhakakangachanga bhakakonyaga, "Bholi, mundu hojo agapatite koji majigano haga na jonojwe jwangachijigana kohakola?" 16 Ayesu akaajangulanga, "Majigano ganyigana ngabha gangu, ila nga ga jonijola jwaandumite. 17 Mundu jwaapala kutenda genigala gabhapala Annoongo, apakuimanya kubhee majigano gangu gabhoka kwa Annoongo, au nenga ndenda kugalongela gangu. 18 Mundu jwaalongela mweene alolea ng'anyimo gwabhe mweene nambo mundu jonijola jwaalolea ng'anyimo gwa jonijola jwaandumite nga bha kweli, wala gwakwa unami goagola nkati jabhe. 19 Bholi, Amusa bhangampekeanga Malagilo? Nambo pakati jinunji jwakwa hata jumo jwaakamwile Malagilo genago. Kwa niki mpalanga kungoma?" 20 Gonigola ntukuli gwa bhandu gukaajangula, "Mwenga nkweti lihoka! Nga ganiki jwaapala kunkoma?"

21 Ayesu akaajangulanga, "Ndendite chilolelo chimo, mwangota mwabhoa nkakangachanga. 22 Amusa akanlagianga mwahinange bhana bhinunji, hata handa ngabha Amusa ila akanahota bhinunji nga bhabhakajemekanga chiiyobhalilike kuhina. Na mwangota mwahinanga bhana bhinu hata kwa Lichobha lya Kupomolela. 23 Handa mwana akombola kuhinwa mu Lichobha lya Kupomolela ili kukamula Malagilo ga Amusa, kwa niki ntendakutumbala kwa kunlamia mundu Lichobha lya Kupomolela. 24 Nkoto kuhukumula mundu kwa kunnola tu, nambo nhukumulange ligongo lya kweli."

25 Bhandu teno bha ku Yelusalemu bhatenditakulongelanga, "Bholi, hojo mundu nga jonijola jwaabhaalolea bhankome? 26 Abhi pambani, atendakulongela palundwanje nnoongi ja bhandu bhoa, na wala ngaalobholela chilebhe choachela. Komboleka akaachilongola bhatendakuhimanya kubhee hojo nga Akilisito. 27 Nambo kubhabhoka mundu hojo twenga tukumanyi, nambo Akilisito pabhapakuhika jwakwa mundu jwaapakumanya kubhabhokite!"

28 Ngapena Ayesu akapunda kujigana pa Nyuumba ja Annoongo, abhikulobhola, "Mwangota mutendakunimanya na mukumanyi kumooka! Nenga ngahika ligongo lyangu mwene, ila jonojwe jwaandumite nga bha kweli, mwangota ngammanyanga. 29 Nambo nenga naamanyi ligongo mokite kwaachabhe, na jonojwe nga jwaandumite."

30 Ngapena bhandu bhapalitanga kunkamula, nambo jwakwa mundu joajola jwaakalenga kunyulula lubhoko lwabhe kunkamula ligongo muda gwabhe gukibha tangu kuhika. 31 Bhandu bhajingi kubhoka mu gonigola nkutuli gwa bhandu bhakanhobhalela, atendita kulongela, "Bholi, Akilisito pabhapakuhika, apakutenda hilolelo hikolongwa muno kupunda hiyaatenite hojo mundu?"

32 Mafalisayo bhakajoanga bhandu bhabhikunong'onanga ngani ja Ayesu. Bahi, bhenaangota pamo na akaakolo bha akaakung'i bhakaatumanga akaalendei bhajaulange kunkamula. 33 Ayesu akaalobholela, "Nenga tangu nibhii na mwangota kwa machobha kachoko, ngapena mbakubhuja kwaachabhe jonijola jwaandumite. 34 Mpakunoleanga nambo ngamona, na penipala pambakubhee mwangota ngakombolanga kuhika." 35 Akaachilongola bha Bhayahudi bhakalobholelana akaachinabhene, "Hojo mundu apala kujaula koji mpaka tukotokwabhona? Bholi, apala kujaula kwa Bhagiliki konikola bhandu bhitu kubhapwilinganike, na kwaajigananga Bhagiliki? 36 Ngocheni pabhalongela henela maana jakwe niki, mpakunoleanga nambo ngamonanga na konokwe kumbakubhee mwangota ngakombolanga kuhika'?"

37 Lichobha lyenilyela lya kupela lya Lichobha Likolongwa, Ayesu akajema na akalongela kwa lilobhe likolongwa, "Mundu joajola jwabhi na nyota haike kwaachangu ang'wee. 38 Mundu joajola jwanhobhalela nenga, handa Majaandiko ga Annoongo chigalobhola, ‘Cheembwe cha machi ga umomi gatendakuchuka kubhoka mu ntima gwabhe.’" 39 Ayesu atenditakulongela ngani ja Mboomo ja Annoongo yakubhee bhapakwaapokela bhenibhala bhandu bhabhaahobhalela. Muda gonogwe Mboomo jwa Annoongo akibha tangu kuhika ligongo Ayesu akibha tangu jwangayoka na kutukuchwa.

40 Bhandu bhangi pakati ja gonigola nkutuli gwa bhandu, bhakajoanga ngani jenejo, bhakalobholanga, "Kweli hojo mundu nga alondohi bha Annoongo!"

41 Bhangi bhakalobholanga, "Hojo nga Akilisito!" Nambo bhandu bhangi bhakachikonyanga, "Bholi, komboleka Akilisito kwaachabhe nga ku Galilaya? 42 Bholi, Majaandiko ga Annoongo gangalobhola kubhee Akilisito apakupitila kuchilagwa cha Adaudi na apakubhoka ku Betelehemu chilambo chibhakatama Adaudi?" 43 Henela bhandu bhakametunikanga ligongo lyabhe. 44 Bhandu kachoko bhakapalanga kwaakamula nambo jwakwa mundu jwakanyulula lubhoko kwaakamula.

45 Ngapena bhenibhala akaalendei bhabhakatumwanga bhakabhujanga kwa akaakolongwa bha akaakung'i na Mafalisayo, bhenaangota bhakaakonyanga, "Kwa niki mwangankamula?" 46 Bhenibhala akaalendei bhakajangulanga, "Jwakwa mundu jwaakombwile kulongela handa chibhalongela mundu hojo!" 47 Mafalisayo bhakaakonyanga, "Bholi, na mwangota hela hela ntekutembwa? 48 Bholi, mwamanyi nkolo au Amfalisayo joajola jwaahobhalile? 49 Nambo nkutuli hogo gwa bhandu gukanhobhalela kongo bhabhingamanya Malagilo ga Amusa, kubhee bhatakullaniwa na Annoongo!"

50 Anikodemo akibha jumo jwa bhenaangota akachilongola jwaakajendela Ayesu lichobha limo kilo. Akaakonyanga akaajabhe, 51 "Bholi, Malagilo gitu gatendakuhukumula mundu tangu ja kwaajoa oti na kumanya atendite chiniki?" 52 Bhakanyangula, "Bholi, na mwenga hela hela mmokite ku Galilaya? Mugachome maha Majaandiko ga Annoongo na nchijigane jwakwa alondohi jwa Annoongo jwabhokela ku Galilaya!"

53 Bahi, kila jumo akabhuja kwaachabhe.