1 Tuputupu lichobha lya kujemeka lya juuma, kukibha tangu na lubhendu, Amalia bha ku Magidala akajaula kumbako, akalibhona lyenilyela liganga lilikabhee pannyango gwa mbako litekubhokekwa. 2 Henela akabhutuka lubhelo mpaka kwa Asimoni Apetulo pamo na jonijola jwaachijigana jongi yakubhee Ayesu akaapala, akaalobholelanga, "Bhagubhoite mmele gwa Hangwana mumbako na ngahimanya kubhagubhekite!"

3 Apetulo na jonijola jwaachijigana jongi bhakajaulanga kumbako. 4 Bhoa bhabhele bhakabhutukanga, nambo jonijola jwaachijigana jongi akabhutuka muno kupunda Apetulo, akalongolela kuhika kumbako. 5 Pabhakakotima na kulingulila monimola kumbako, akahibhona chaanda jiika hibhekitwe penipala, nambo jwangajingila nkati. 6 Ngapena Asimoni Apetulo jwakibha kuyeto ja jonijola jwachijigana akahika akajingila mumbako. Jonojwe akahikokela chaanda jiika penipala pahi, 7 pamo na chenichela chipande cha chitambaa chibhaakatabha Ayesu mmutwe. Chene chipande cha chitambaa changabhekwa pamo na jene chanda, ila chitekuchihiligana chibhile pajikajabhe. 8 Ngapena jonijola jwaachijigana jwakalongolela kuhika kumbako, hela hela akajingila nkati akabhona, akahobhalela. 9 Bhakibhanga tangu bhangahelewanga Majandiko ga Annoongo gagakalobhola kubhee Ayesu apaalikwa kuyoka. 10 Bahi, bhabhachijigana bhenabho bhakabhujanga kaja.

11 Amalia jwa Kumagidala akajema panja ja mbako, kongo abhikuguta. Pabhatenditakuguta, akakotimia kulingulila monimola mumbako, 12 akabhabhonanga Akaatumichi bhabhele bha kunani kwa Annoongo bhawalitinge ngobho hiyuu, bhatamitinge penipala mmele gwa Ayesu pagukibha gutekugonekwa, jumo akatama upande gwa mutwe na jongi akatama upande gwa makongono. 13 Akaatumichi bha kunani kwa Annoongo bhenibhala bhakaakonya Amalia, "Bholi, amma, ng'utila niki?" Nabhena Akaalobholelanga,

"Ndendakuguta ligongo bhagupetwile mmele gwa Hangwana na ngakumanya kubhatekugubheka." 14 Pabhakajomola kulobhola genago, Amalia akatendebhuka kuyeto, akaammona Ayesu ajemite penipala, nambo jwangaamanya kubhee akibha nga Ayesu. 15 Ayesu akaakonya Amalia, "Amma, ng'utila niki? Ntendakunnolea aganiki?" Amalia akaganikia jwaalongela nabho nga mundu jwakulolekea buchitani, henela akaalobholela, "Hangwana, handa nga mwenga ntekunpetula, choonde nnangie koji kugumekite, nanenga mbakugutolatola"

16 Ayesu akaalobholela, "Amalia!"

Amalia akatendebhukia akaalobholela kwa chilongelo cha Chiebulania, "Laboni!" Maana gakwe Bhannyigana.

17 Ayesu akaalobholela, "Nkotokungamula, ligongo tangu nangajaula kwa Atati. Nambo nnyaule kwa akaalongo bhangu nkaalobholelange, ndendakujaula kunani kwa Atati jwangu na Atati jwinunji, Annoongo jwangu na Annoongo jwinunji."

18 Penapo Amalia bha ku Magidala akajaula kwaalobholelanga bhabhachijigana bha Ayesu, ndekummona Hangwana nabhena akaalobholelanga kubhee atekwaalobholela genago goha.

19 Jikabhee kimuho ja lichobha lyela lya kujemeka juuma, Bhabhaajigana bhabhe bhakibha bhatekongana pamo munyuumba, kongo milyango jikibha jitabhwitwe kwa kubhee bhakaajogopanga Akaachilongola bha Bhayahudi. Bahi, Ayesu akahika, akajema pakati jabhenji akaalobholelanga, "Ntamange kwa kuhengwa." 20 Paakajomola kwaalobholelanga henela, Ayesu akabhalangianga mabhoko gabhe na ubhahu gwabhe. Henela bhabhachijijigana bhabhe pabhakaamona Hangwana bhakahachukanga pangali kupela. 21 Ayesu akaalobholelanga kabhele, "Ntamange kwa kuhengwa! Handa Atati chibhandumite nenga, nanenga ndendakuntumanga mwangota." 22 Paakajomola kulobhola genago, akaapepetelanga mboomo akaalobholelanga, "Mpokelange Mboomo ja Annoongo. 23 Handa mpakwalekelanga bhandu mabohu, bhandu bhenabho Annoongo apakwalekelanga gena mabohu. Nambo handa ngaalekelelanga bhandu mabohu gabhenji, nabhenabho ngalekelelwa mabohu gabhenji."

24 Atomasi, jumo jwa bhenibhala bhabhachijigana komi na bhabhele jwaakakemwa Mabhela, jwangabhee penapo na bhenaangota Ayesu pabhaabhokela. 25 Henela bhenibhala bhabhachijigana bhangi bhakaalobholela, "Tutekummona Hangwana."

Nambo Atomasi akaalobholelanga, "Handa nangagabhona mabhai genago ga michumali mmabhoko gabhe na kukwaa lukonji lwangu mu mabhai genago ga michumali na lukonji lwangu mulubahu lwabhe, ngahobhalela ng'o."

26 Pagakapeta machobha ganane, bhabhachijigana bhabhe bhakibhanga pamo munyuumba na jonojwe Atomasi akibha pamo nabho. Kongo minniango jibhi jitabhwitwe Ayesu akajema pakati jabhenji akalobhola, "Ntamange kwa kuhengwa." 27 Ngapena Ayesu akaalobholela Atomasi, "Mmeke lukonji lwinu pambani na nnole mabhoko gangu, nnyulule lubhoko lwinu nkwae mulubahu lwangu. Nkotokubhee na lipamba nambo nhobhalele tu!"

28 Atomasi akaajangula, "Hangwana bhangu na Annoongo bhangu!"

29 Ayesu akaalobholela, "Ntekuhobhalela ligongo ntekumona? Bhatekutendelwa gammbone na Annoongo, bhenibhala bhabhahobhalelanga pangali kumona!"

30 Ayesu akatenda hilolelo hijingi yengi nnongi ja bhabhachijigana bhabhe, nambo yangajandikwa muchitabu heche. 31 Nambo ngani heye hitekujandikwa ili mkombolange kuhobhalela yakubhee Ayesu nga Akilisito, Mwana jwa Annoongo na kwa kunhobhalela mmangange na umomi gwa machobha goa kwa kutama nkati jabhe.