1 Nenga Apaulo, ndekemwa kubhee andundame bha Akilisito Ayesu kwa upalio gwa Annoongo, mii pambani na Asositene.

2 Tutendakunyandikilanga mwangota chibhoga cha bhandu chichahobhalela Akilisito bha konokwe ku Kolinto, mwangota ntenditingwe kubhee bhandu bha Annoongo mu kolondekana na Akilisito Ayesu, nkakemwanga mmangange bhandu bha Annoongo, pamo na bhandu bhoa poapala pabhaajopa Hangwana bhitu Ayesu Akilisito jwaabhii Hangwana bhabhenji na Hangwana bhitu twenga kabhele.

3 Ndendakwaajopa Annoongo Atati bhitu na Hangwana bhitu Ayesu Kilisito ampekeange umbone na kuhengwa.

4 Ndendakwaachukulu Annoongo machobha goa ligongo linunji na ligongo atekumpekeanga mwangota umbone gwabhe kwa kupetela Akilisito Ayesu. 5 Kwa kubhee kwa kulondanika na Akilisito mpatitinge kila chilebhe, mpatitinge umanyo gwoa na ukolo gwa kutangacha Ngani Jammbone. 6 Genago galangia kubhee ngani kwa ngani ja Akilisito jitutekwatangachia nga ya kweli, 7 henela mwangapongokelwanga na ngwahupa jenijela ja mboomo ja Annoongo mmi kulendelanga kuhika kwabhe Hangwana bhitu Ayesu Akilisito. 8 Jonojwe apakuntendanga mmangange na machili mu kwaatumikila mpaka kupela, ili nkotobhonekananga handa nnemwitinge lichobha lyalela lya Hangwana bhitu Ayesu Akilisito. 9 Annoongo bha kuaminika, jonojwe akaankemanga mwangota mmangange pamo na Mwana jwabhe Ayesu Akilisito Hangwana bhitu.

10 Ndendakumpembeleanga akaanung'una bhangu, mu lihina lya Hangwana bhitu Ayesu Akilisito, mmangange pamo mu ngani yoa hiinnongelanga, ili pakotokubhee na mpwilingano pakati jinunji. Mmangange chilebhe chimo na kuganikila kumo. 11 Akaanung'una bhangu bhamwahobhalela Akilisito, ngani hiniipatite kubhoka kwa bhandu bhangi na kwa akaalongo bha Akaloe, hitendakulangia kubhee gubhii bulwa pakati jinunji. 12 Mbala kulongela henela, kila mundu pakati jinunji alongela chaakwe. Jumo kulongela, "Nenga ndendakwakonda Apaulo," jongi, "Nenga ndendakwakonda Apolo," jongi, "Nenga ndendakwakonda Akefa," na jongi, "Nenga ndendakwakonda Akilisito." 13 Bholi, Akilisto atekumetunika mu hibhoga hibhoga? Bholi, Apaulo nga jwaakabhambwa panchalaba ligongo linunji? Bholi, nkabatichwanga ili mmangange bhabhachijigana bha Apaulo?

14 Ndendakwaachukulu Annoongo kubhee nangabaticha mundu joajola pakati jinunji ila nakaabatichanga Akilisipo na Agayo. 15 Henela jwakwa pakati jinunji jwaakombola kulongela kubhee akabatichwa ili abhee jwaachijigana jwangu. 16 Eloo ndekombokela, nakabaticha na akaalongo bha Asitefano, nambo kupunda bhenaangota ngakombokela handa nakabaticha mundu jongi joajola. 17 Akilisito jwanganduma kubaticha, ila andumite kutangacha Ngani Jammbone, kabhele ndangache pangali kulupalila malango ga bhandu bhangi, ili machili ga malilo ga Akilisito panchalaba gakotokubhonekanga ngabha chilebhe.

18 Kwa kubhee malagilo kwa ngani ja kujomoka kwa Akilisito panchalaba nga chilebhe changalimaana kwa bhenibhala bhabhabhilinge mu nkutuli gwa kuhobha, nambo kwaachitu twenga tutubhii mu ndela ja kuokoka, malagilo genago nga machili ga Annoongo. 19 Kwa kubhee Majaandiko ga Annoongo galobhola,

"Mbakugahalibia malango gabhenji bhabhakwetinge malango

na umanyo gwa bhabhabhilinge na umanyo mbakugutenda ngabha chilebhe."

20 Abhikoji, jwaabhii na malango? Abhikoji jwaamanya Malagilo? Na abhikoji jwaakombola kulongela hilebhe hijingi? Annoongo agatendite malango ga pachilambo kubhee ngabha chilebhe.

21 Annoongo nga jwaabhile na malango, na bhandu ngakombolanga kwaamanya Annoongo kwa kulupalila malango gabhenji akaachinabhene. Ila Annoongo atukutumia malobhe ga Hangwana Ayesu kwahokoanga bhandu, malobhe gagabhonekana kwa bhandu bhangi handa ngabha chilebhe, nambo bhenibhala bhabhahobhalela malobhe genago gatutangacha bhatendakuhokolewanga. 22 Bhayahudi bhaloleanga hilolelo ili bhakombolange kuhobhalela, na Bhagiliki bhaloleanga malango ili bhakombolange kuhobhalela, 23 nambo twenga tutendakuntangacha Ayesu jwaakabhambwa panchalaba, kwa Bhayahudi chilebhe chenjeni nga chiibhilo, na kwa Bhagiliki nga kupelela malango. 24 Nambo kwa bhenibhala bhabhakemwitinge na Annoongo, bhabhee Bhayahudi au Bhagiliki, Akilisito nga machili na malango ga Annoongo. 25 Henela, chichibhonekana ngabha chilebhe kwa Annoongo chibhile na malango muno kupunda malango ga bhandu, na kukabha kwa Annoongo kujangula gubhii na machili muno kupunda machili ga bhandu.

26 Akaanung'una bhangu, nkombokelange penipala pankakemwanga na Annoongo, bhajingi pakati jinunji mwakibhanga mwangali malango hata kwa maganikilo ga chimundu, bhajingi mwakibhanga mwangali machili na bhajingi mwakibhanga mwangabhelekwanga mu akaalongo bhabhakolotinge malola. 27 Nambo Annoongo akahagula hilebhe hiibhonekana ngabha chilebhe pachilambo ili abhalekelange honi bhandu bhabhakolitinge malango, Annoongo akaiyagula hilebhe yanga machili pachilambo ili abhalekelange honi bhandu bhabhabhilinge na machili. 28 Annoongo atekugaagula genigala yakubhee kwa maganikilo ga bhandu bha pachilambo nga hibhonekana ngabha chilebhe na hiibhelulikwa, na hilebhe yene yakwa, ili kwa genago agahutile kutali genigala yakubhee kwa maganikilo ga bhandu nga hibhonekana hilebhe yammbone muno. 29 Akatenda henela ili mundu joajola akotokuchilumbalila nnongi ja Annoongo kubhee akweti malango au nga jwaambone muno. 30 Ila Annoongo mwene nga jwaatekunnondekana mwangota na Akilisito Ayesu, Annoongo antendite Akilisito abhee malango gitu. Kupetela jonojwe twenga tutendakondekwa na Annoongo, tutendakubhee bhandu bhabhe Annoongo bheene na kuokolewa. 31 Bahi, handa chigalobhola Majaandiko ga Annoongo,

"Jwaajola jwaapala kuchipuna,

na achipunile lihengo lya Hangwana libhatendite."