1 Akaanung'una bhangu, mbala muimanyange kubhee akanahota bhitu bhoa ndendita kwalolekea nenga, nga maana bhoa bhakajombokanga maha bahali ja Shamu. 2 Bhoa bhakabatichwanga ili bhabhangange bhandu bhabhaakagula Amusa mu lyenilyela lihunde na mu jenijela bahali. 3 Bhoa bhakalyenganga chakulya chela chela cha chimboomo chichibhokile kunani kwa Annoongo, 4 na bhoa bhakangw'enganga ching'welo chela chela cha chimboomo chichibhokile kunani kwa Annoongo, kwa maana bhakang'wenganga kubhoka mu gonigola luhala lwa mboomo gubhakalongananabho, na gonigola luhala lukibha nga Akilisito. 5 Nambo bhandu bhanjingi bhangapangana genigala gabhagapala Annoongo, henela bhakajomokanga na mimele jabhenji jikajenela palikonja.

6 Nangocheni, hikubho heye yoa nga handa kulandanakia tu kwaachitu, kutendakutukelebhua twenga ili tukoto kulokolila kupangana hikubho hibohu handa bhenaangota chibhakalokolilanga. 7 Nkoto kubhee bhandu bha kuchalila hidimu handa bhangi pakati jabhenji chibhakatendanga, handa chiijandikwe mu Majaandiko ga Annoongo, "Bhandu bhakatamanga pahi kulyee na kung'wee, bhakajemanga kuhina handa bhandu bhangaamanya Annoongo." 8 Wala tukoto kutenda ngoongola handa bhangi pakati jabhenji chibhakatendanga na bhakajomokanga bhandu elupu ishilini na tatu kwa lichobha limo. 9 Tukoto kwaajiga Hangwana handa bhangi pakati jabhenji chibhatendanga, bhakajomokanga kwa kulumwa na majoka. 10 Bahi mwangota nkotokokolekanga handa bhangi pakati jabhenji chibhakakokolekanga, Annoongo akaatuma antumichi jwabhe jwa kunani jwa koma bhandu, akaakomanga.

11 Hikubho heye yoa hikaapatanga bhenaangota ili ibhee ngelebhuo kwa bhangi, na gakajandikwa ili kutujigana twenga bhatutama kubhandikila na kupela kwa chilambo.

12 Henela, jonojwe jwaaganikia ajemite maha mu kuhobhalela kwabhe, achilolekee ili akotokugwee kwa kupangana gabohu. 13 Malengelo gamugapatite ngabha gakulimba kwa bhandu. Annoongo nga jwakuhaminika, najombe ngalekelea nlengekwange kupeta machili ginunji. Nambo pannengekwanga atakwapekeanga ndela ja kuhimbalila ili mmokange monomwe maha.

14 Henela, akaaganja bhangu, nchibhekange kutali na kuchalila hidimu. 15 Nongela na mwangota, handa bhandu bhammilinge na malango, nchiagulilange akaachinabhene gangani gandendakunnobholelanga. 16 Bholi, patwaachukulu Annoongo kwa chikombe chela cha umbone, ngang'wee chikombe chimo na Akilisito? Nkate gonigola gutugumetula, ngalyee pamo na Akilisito? 17 Kwa kubhee nkate nga gumo, handa twenga chitubhile bhajingi nga mmele gumo, na bhoa tutendakuchikichana mu nkate gumo.

18 Mwalolange bhandu bha ku Isilaeli, bhenibhala bhabhalyenganga chichibhokilwe mbeeko bhatendakulondanikanga na meecha jenejo jijitekuhalakilwa ligongo lya kubhokea mbeeko. 19 Bahi nongele bholi? Kubhee chakulya chichitekubhokelwa hidimu nga chilebhe chammbone muno kupunda chakulya? Na yene hidimu, bholi, kweli nga chilebhe chammbone muno kupunda hidimu? 20 Hopo! Chinnongela nenga nga kubhee mbeeko hibhabhoanga bhandu bhangaamanya Annoongo bhatendakwabhokea mahoka, nambo ngabha Annoongo. Nenga mbalahopo mwangota nchikichanange na mahoka. 21 Ngakombolanga kung'wee chikombe cha Hangwana na hela hela kung'wee chikombe cha mahoka, ngakombolanga kuchikichana mu lichobha likolongwa lya Chakulya cha Hangwana pa mecha ja mahoka. 22 Bholi, tupala kujimua bwihu gwa Hangwana? Bholi, ng'anikianga twenga tukweti machili kupunda Hangwana?

23 Twenga twangatabhikwa kupangana kila chilebhe, nambo ngabha yoa nga yammbone. Hilebhe yoa nga yammbone nambo ngabha yoa hiitendakwaajangatila bhandu. 24 Mundu joajola akotokulolea gagabhile gabhe mwene, nambo kila mundu alolee genigala gagaajangatilanga bhangi.

25 Nlyangange nduli jijihuchwa kuchoko, pangali konya konya, ligongo lya kujogopa kuchihulaa ntima. 26 Kwa kubhee mu Majandiko ga Annoongo ijaandikwe, "Chilambo na yoa hiibhile nkati jabhe nga hilebhe ya Hangwana." 27 Mundu jwangahobhalela handa apakunnalikanga na mwangota handa nkonditinge kujaula, bahi, nlyangange yoa hiibhatekumpanganikianga pangali konya konya ligongo lya kujogopa kuchihulaa ntima. 28 Nambo mundu handa apakunnobholelanga, "Henje nduli jitekubhokekwa mbeeko kwa hidimu," bahi, nkotokulyenganga ligongo lya jonojwe jwaatekunnobholelanga henela, na ili nkotokuchihulaa mu mitima jinunji. 29 Pambani ndendakulongela ngabha ligongo lya kuhulaa genigala gang'anikiaga mwenga, chinongela nenga nga ligongo lya kuguhulaa ntima gwa jonojwe jwaatekunnobholela.

Mpakungonyanga, "Kwa niki gambala kupangana nenga gatendakulupalila kuganikia kwa mundu jongi? 30 Ikabhile nenga ndendakulyee chakulya chenecho kongo mmikwachukulu Annoongo, kwa niki nongelwe kwa malobhe gangali mmbone kwa kwaachukulu Annoongo kwa heche chibhatekumbekea?"

31 Bahi, choachela chintekupangananga handa kulyee au kung'wee, mpanganange yoa ligongo lya kwaalumbalila Annoongo. 32 Nkotokokwajambukianga Bhayahudi au Bhagiliki au hibhoga ya bhandu bhabhahobhalela Akilisito bhatendange mabohu. 33 Mmangange handa nenga, ndendakujiga kwaabhajila bhandu bhoa kwa kila ndela, kwa kubhee ngalolea hikubho yammbone ligongo lyangu namweene nambo nga ligongo lya bhajingi bhapatange kuhokolelewa.