1 Nangocheni, kwa ngani jenijela ja kwaachangilanga bhandu bhabhaahobhalela Akilisito, ntendange handa chingalagia kwa chibhoga cha bhandu bhabhahobhalela Akilisito bha ku Galatia. 2 Kila lichobha lya juma pili, jumo jwinunji abheke nnyeenje mbiya kachoko kubhokana na chenichela chibhapata, ili kukotokubhee na kuchangilana kabhele mu machobha genigala pambakuhika. 3 Penipala pambakuhika kwaachinunji, mbakwatumanga bhenibhala bhambakwaahagula pakati jinunji bhapelekange balua na yeniyela hibhatekuchangilanga ku Yelusalemu. 4 Handa ipakubhee yammbone na nenga nyaule, bahi, bhapakulongana pamo na nenga.

5 Mbakuhika kwaachinunji pambakujomola kupetela ku Makedonia, ligongo mbala kwatyangilanga bhandu bha konokwe ku Makedonia. 6 Komboleka mbakutama kwaachinunji kwa machobha teno, au komboleka mbakutama pamo na mwangota machobha goa ga malili, ili nkombolange kunyangatila kuendelea mu ulendo gwangu koakola kunyaula. 7 Mbalitehopo kupeta kwaachinunji chindemachindema na kuendelea na ulendo. Mbala kutama kwinunji kwa machobha gajingi, handa apalite Hangwana.

8 Nambo mbakutama pambani pa Efeso mpaka lichobha lya Pentekosite. 9 Annoongo ambekie upenyo nkolongwa gwa kupangana lihengo likolongwa pambani, na konokwe bhabhilinge bhandu bhajingi ngakoonda mbangane lihengo helyo.

10 Atimotheo handa ahikite kwaachinunji mumpokelange maha, nnolange akotokubhee na bhoga goagola pabhapakubhee pamo na mwangota, ligongo atendakupangana lihengo lya Hangwana handa nenga. 11 Henela mundu joajola akotokummeluanga, ila munyangatilanange aendelee na ulendo gwabhe kwa kuhengwa ili akombole kubhuja kwaachangu, ligongo nenga pamo na akaanung'una bhangu tutendakwaalendela.

12 Bahi kwa ngani ya akaanung'una bhitu Aapolo, ndekwapembelea muno ahike kwaachinunji pamo na akaanung'una bhangi, nambo ngaachukila hata kachoko kuhika nangocheni ila apakuhika penipala pabhapakupata upenyo.

13 Ncheange, nyemange maha mu kuhobhalela, na wala nkotokujogopanga. 14 Kila chintendanga ntendange kwa kupalana.

15 Aakaanung'una bhangu, ntendakwamanyanga bhandu bha kaaja kwa Asitefana, bhenaangota nga bhandu bhabhakajemeka kwahobhalela Akilisito konokwe ku Akaya, na bhetekuchitolea kwatumikilanga bhandu bha Annoongo. Ndendakumpembeleanga muno mwangota akaanung'una bhangu, 16 ipalikwa mwatopeange bhandu handa bhenabho, ntendange genigala gabhankongolelanga, hela hela mwatopeange bhandu bhabhaatumikila Annoongo pamo na bhenaangota.

17 Ndendakuhachuka muno kubhee Astefana na Afotunato na Aakaiko bhatekuhikanga, ligongo bhenaangota bhatekumbekeanga genigala gagatekupongoka. 18 Kwa kubhee bhatekuguhachua ntima gwangu hela hela handa chibhatekuntendanga mwangota kuhachuka. Henela nga yammbone kwaamanyanga bhandu handa bhenaangota.

19 Mabhoga ga bhandu gabhahobhalela Akilisito bha ku Asia bhatendakunchalimianga. Aakila na Apilisika pamo na libhoga lya bhandu lilyahobhalela Akilisito bhabhabhilinge mu nyuumba yabhenji bhatendakunchalimianga muno mu kulondekana na Hangwana. 20 Bhandu bhoa bhabhahobhalela Akilisito bha pambani bhatendakunchalimianga. Na mwangota nchalimianange mmi kulangia kubhee ntandakupalana.

21 Nenga Apaulo ndendakunchalimianga, mii kujandika kwa lubhoko lwangu mweene. 22 Joajola jwangaapala Hangwana, na alaaniwe. Malanata maana jakwe Hangwana bhitu, nhike!

23 Ndendakwaajopa Hangwana Ayesu antendelange hikubho yammbone. 24 Ndendakumpalanga mwangota mwabhoa muntekulondanika na Ayesu Kilisito.