1 Handa mundu atekupwatilana na anung'una jwahobhalela Akilisito ntendakutakiana nnongi ja bhandu bhangaamanya Annoongo, badala ja kutakiana nnongi ja bhandu bhabhaamanya Annoongo? 2 Bholi, ngaimanyanga kubhee bhandu bha Annoongo bhapakuhukumula bhandu bhangaamanya Annoongo? Na mwangota handa mpakwahukumula bandu bhangaamanya Annoongo, kwa niki ngakombolanga kuhukumula hata mu hilebhe hichokochoko ya kila lichobha mu umomi gwitu? 3 Bholi, ngaimanyanga kubhee, hata kwa kuhukumula mu hilebhe hichoko choko ya kila lichobha mu umomi gwitu, tupakwahukumulanga hata akaatumichi bha kunani kwa Annoongo? 4 Henela handa kubhii kupwatilananga pakati jinunji kwa ngani ja hikubho handa yenjeni, kwa niki ntendakuagulanga bhandu bhangatopelwa mu lilubhalo lya bhandu bhabhahobhalela Akilisito kubhee akaaliwali? 5 Nga honi kwinunji! Nga kulobhola jwakwa hata jumo pakati jinunji jwaakweti malango muno jwa kombola kutapulana bulwa pakati ja anung'una jumo na akaajabhenji? 6 Nambo chichipalikwa, anung'una jumo ampeleke nnyakwe kuchebule, kabhele nnongi ja bhandu bhangahobhalela Akilisito.

7 Konokwe kuhukumulananga akaachinabhenenji kwa akaachibhenenji kulangia kubhee ntekulepelanga! Bholi, hikabheehopo chikubho chammbone muno kwaachinunji kutendelwa gabohu? Hikabheehopo yammbone muno kwaachinunji kumpokonyola hilebhe yinunji? 8 Nambo badala jabhe, mwangota mwaakachinabhene ntendakutembanga na kwaatendela bhangi gabohu, kabhele ntendakwapokonyola hilebhe bhandu bhabhahobhalela Akilisito! 9 Bholi, ngaimanyanga kubhee bhandu bhangalimmbone ngalekelwa ukolo gwa Annoongo? Nkotokuchitembanga! Bhandu bhabhatamanga umomi gwa ngoongola, bhabhajopanga hidimu, bhaloloi, au akanalome bhabhagolokana akaachinabhene, 10 akaabwihi, bhailema, bhakukolelwa, bhakujegeja, bhandu bhabhapalanga hilebhe hijingi hibhee yabhe jika jabhe, bhenaangota bhoa ngajingilanga mu ukolo gwa Annoongo. 11 Bhandu bhangi pakati jinunji mwakibhanga henela, nambo nangocheni ntekujelejewa kubhoka mu mabohu, nkatendwanga kubhee bhandu bha Annoongo, na kutendwa bhakutungamanika na kondekwa na Annoongo kupetela Hangwana bhitu Ayesu Kilisito na kwa Mboomo ja Annoongo jitu.

12 Mundu akombola kulongela, "Kwaachangu nenga kila chilebhe nga chammbone." Nambo ngabha kila chilebhe nga chichipaalikwa. Eloo ndendakonda kubhee kila chilebhe nga chipaalikwa kwaachangu nambo ngaana kuhukumulikwa na chilebhe choachela. 13 Mundu jongi akombola kulongela, "Chaakulya nga kwa ligongo lya lutumbo, na lutumbo nga kwa ligongo lya chaakulya." Nambo Annoongo apakuhialibiana hibhele yoha hibhele. Mmele gwa amundu ngabha kwa ligongo lya ngoongola bali nga kwa ligongo lya lihengo lya kwaatumikila Hangwana, na bhena Annoongo atendakujilolekea mimele jitu na kujipekea chakulya. 14 Annoongo jwaakaayoa Hangwana Ayesu hela hela nga jwapakutuyoa twenga kwa machili gakwe.

15 Bholi, ngaimanyanga kubhee mimele jinunji nga yeega ya mmele gwa Akilisito? Bholi, ng'anikianga ngombola kutola chipande cha mmele gwa Akilisito na kugutenda kubhee chipande cha mmele gwa bhangoongola? Hata kachoko! 16 Handa chinchimanyanga mwangota, jwaakondekana pamo na mundu jwa ngoongola kubhee mmele gumo na jonojwe handa chiikajandikwa mu Majaandiko ga Annoongo, "Na bhenaangota bhabhele bhapakubhee mmele gumo." 17 Nambo jwaabhii pamo na Hangwana atendakubhee mboomo jimo na Hangwana. 18 Nchibhekenge kuatali na ngooongola. Mabohu gangi goha kuteendeka panja ja mmele nambo mundu jwa ngoongola atenda mabohu kupetela mmele gwabhe mweene. 19 Bholi, ngaimanyanga kubhee mimele jinunji nga Nyuumba ja Mboomo ja Annoongo jwaatama nkati jinunji, yakubhee mukampokelanga kubhoka kwa Annoongo? Mwangota bahi, ngabha mimele jinunji ngabha jinunji mwakaachinabhene ila nga jakwe Annoongo. 20 Kwa kubhee nkahemelwanga kwa bei ngolongwa. Henela, muitumiange mimele jinunji ligongo lya kwaalumbalila Annoongo.