1 Nchimile kubhee na upalio, hela hela nchimilange kupatanga ngwahupa yengi kubhoka kwa Mboomo jwa Annoongo, muno ngwahupa ja kutangacha malobhe ga Annoongo. 2 Jwaalongela chilongelo chigeni ngalongela na bhandu ila alongela na Annoongo kwa kwakubhee jwakwa mundu joajola jwanhelewa. Jonojwe alongela kwa machili ga Mboomo jwa Annoongo hikubho ya Annoongo yangamanyikana. 3 Nambo jwakweti ngwahupa ja kutangacha malobhe ja Annoongo, kulongela na bhandu na kwalekelanga mitima mu kwahobhalela Akilisito, kwaatenda bhahachukange na kwalekelanga ntima. 4 Jwaalongela chilongelo chigeni achichenga mweene. Nambo jwaakweti ngwahupa ja kutangacha ngani ja Annoongo, achenga chibhoga cha bhangu bhabhahobhalela Akilisito.

5 Bahi, ngapaalite mwangota mwabhoa nnongelange chilongelo chigeni nambo ngapaalite muno mmangange na uwecho kutangacha malobhe ga Annoongo, kwa kubhee mundu jwakweti ngwahupa ja kutangacha malobhe ga Annoongo atendakujangatila muno bhandu kupunda jonijola jwalongela chilongelo chigeni. Nambo palikwa abhee mundu jwaapakuhatambula malobhe gagalongeleka, ili bhandu bhabhahobhalela Akilisito bhajangatilwange. 6 Nangocheni akaanung'una bhangu, handa nhikite kwaachinu na kulongela chilongelo chigeni mpakuhelewanga chiniki? Ngaajangatilanga chilebhe choachela, handa mbakunkongolelanga genigala gabhanangie Annoongo au umanyo au kutangacha malobhe ga Annoongo au majigano gangi penapo mbakunnyangatilanga muno.

7 Nga chiibhile kwa yombo yangabhee na umomi hiibhoa lilobhe handa pilimbi na ching'wenye ng'wenye, bholi, mundu akombolabholi kumanya nnyembo pagujembwa handa yombo yeneyo hiigombwa handa ngabhoa lilobhe lya nnyembo gugumanyikana paigombwa? 8 Kabhele handa lipenga ngapotwa kwa lilobhe lyangamanyikana nga ja niki, nga ganiki jwaapakuchibheka maha ligongo lya ngoondo? 9 Hela hela na mwangota, handa nnongilonge malobhe gangamanyikana mu luunda, mundu apakumanyabholi linnongelanga? Kwa kubhee malobhe ginunji gannongelanga gapakubhee ngamanyikana. 10 Hibhile hilongelo hijingi pachilambo, na jakwa hata jimo jangabhee na maana. 11 Bahi handa ngamanya maana ja lilobhe lyenelyo, mbakubhee ageni kwa jonijola jwalongela, na jonojwe apakubhee ageni kwangu nenga. 12 Hela hela na mwangota, kwakubhee mpalanga kubhee na ngwahupa ja Mboomo jwa Annoongo, nchimile kutendanga hikubho yeniyela hiijangatila chibhoga cha bhandu bhabhahobhalela Akilisito.

13 Henela, jwalongela chilongelo chigeni na ajope ili akombole kupata uwecho gwa kuhatambula. 14 Ligongo handa nyopite kwa chilongelo changu, mboomo jangu jitendakujopa, nambo luunda lwangu ngapata chenichela chindenda kulupalila. 15 Bahi ipakubhebholi? Pambakujopa kwa luunda lwangu na kujopa kwa mboomo jangu, kabhele mbakujemba kwa luunda lwangu. 16 Handa mwalumbalile Annoongo kwa mboomo jinu jika, apakumbolabholi mundu jongi jwabhile pakati jinunji kwaachalila Annoongo, kujeketela kujopa kwinu kwa kuchukulu kwa kulongela, "Hibhee henela", handa ngachimanya chinnongela? 17 Kujopa kwinunji kwaalumbalila Annoongo komboleka kubhee kwammbone muno, nambo kupakwajangalibholi bhangi.

18 Ndendakwachukulu Annoongo kubhee nenga ndendakulongela chilongelo chigeni kupunda mwangota bhoa. 19 Nambo mu hikomiti ya bhandu bhabhahobhalela Akilisito mbaya nnongele malobhe nhano gakumanyikana ili naajigane bhandu, nambo ngabha kulongela malobhe elupu ga chilongelo chigeni. 20 Akaanung'una bhangu, nkotokubhee handa bhana mu kuganikia kwinunji. Kwa ngani ja ubohu, mmangange handa bhana ilemba, nambo mu kuganikia kwinunji mmangange handa bhandu bhabhakolite. 21 Mu majaandiko ga Annoongo hijaandikwe,

"Hangwana alongela henela.

Kwa kupetela akaachinabhene kulongela chilongelo chigeni,

na kwa kang'wa ya akaageni

mbakulongela na abha bhandu,

hata henela, nganyonikianga."

22 Bahi, ngwahupa ja kulongela chilongelo chigeni nga chilolelo, ngabha ligongo lya chibhoga cha bhandu bhabhahobhalile Akilisito, bali nga ligongo lya bhandu bhangahobhalelanga Akilisito, nambo ngwahupa ja kutangacha ngani ja Annoongo nga ligongo lya bhenibhala bhabhahobhalilinge Akilisito na ngabha ligongo lya bhandu bhangahobhalela Akilisito.

23 Bahi, bhandu bhoa bhabhahobhalela Akilisito pabhakongananga, na bhoa bhakajemekanga kulongela chilongelo chigeni, handa bhahikitinge bhandu bhangahobhalela Akilisito, bholi, bhapakulobholanga kubhee mwangota nga mpangai? 24 Nambo, bhoa bhakibha bhatendakutangachanga ngani ja Annoongo, handa ahikite mundu jwangahobhalela Akilisito, goa gabhapakugajoa gapakunnangia ubohu gwabhe mwene, na goa gabhapakugajoa gapakwajingila na kwaatindigana. 25 Genigala gangamanyikana mu ntima gwabhe gapakubhekwa pandaa, na jonojwe apakutindibhala majugwa na kwaachalila Annoongo abhikulongela, "Kweli Annoongo abhi pamo na mwangota."

26 Akaanung'una, bahi tulobhole chiniki? Pankongananga pamo kwaachalila Annoongo, jumo ajembe nyeembo, jongi ajigane, jongi jwakuatambula genigala gabhapatite kubhoka kwa Annoongo, jongi atumie ngwahupa ja kulongela kwa chilongelo chigeni na jongi ahatambule gagalongelwa. Goa nga ligongo lya kwaajangatila bhandu bhabhahobhalela Akilisito. 27 Handa bhabhilinge bhandu bhabhakweti ngwahupa ja kulongela kwa chilongelo chigeni, bhalongelange bhabhele au bhatatu, ngabha muno, kabhele jumo jumo, na abhee mundu jwa kuhatambula gagalongelwa. 28 Nambo handa jwaaakwa mundu jwaakombola kuhatambula, bhena bhandu na bhatamange jii mu malubhalo ga bhandu bhabhahobhalela Akilisito na bhalongelange na mitima jabhenji bhene na Annoongo. 29 Kwa ngani ja bhabhakweti ngwahupa ja kutangacha ngani ja Annoongo, bhalongelange bhabhele au bhatatu, na bhangi bhajohanikiange malobhe gabhenji. 30 Handa jumo atendakuendelea kulongela na jongi jwa kujohanikia na kuhatambula genigala gabhapatite kubhoka kwa Annoongo, bahi, jonijola jwaalongela na akotoke. 31 Ligongo bhoa nkombolanga kutangacha ngani ja Annoongo, jumo baada ja jongi, ili bhoa nkombolange kuchijigana na kulekelwa ntima. 32 Ngwahupa ja kutangacha malobhe ga Annoongo nga jipalikwa kujemelelwa na jonojwe jwaakweti na ngwahupa jenejo.

33 Ligongo Annoongo ngabha Annoongo bha mpwato, ila nga Annoongo bha kuhengwa. 34 Handa chiiyobhalilike mu malubhalo goa ga bhandu bhabhahobhalela Akilisito, akaahikege bhatamange jii mu hikomiti ya bhandu bhabhahobhalile Ayesu. Ngapaalikwa kulongela, ila bhakondange handa chigalongela malagilo. 35 Handa bhapala konyanga kwa ngani ja chikubho choachela, bhakaakonyange akanalome bhabhenji kwaachabhenji. Ligongo nga honi kwa mwikege kulongela mu chibhoga cha bhandu bhabhahobhalile Akilisito.

36 Bholi, ng'anikianga lilobhe lya Annoongo libhokite kwaachinu mwangota au litekuhika kwaachinunji ligongo lya mwangota jikajinunji? 37 Handa mundu joajola aganikia kubhee jonojwe atekulagikwa na Annoongo au akweti ngwahupa ja Mboomo, na aimanye kubhee gangani gananyandikilanga mwangota nga malagilo ga Hangwana Annoongo. 38 Nambo mundu jwangaimanya genago, bahi, nkotokunyoanikianga mundu jonojwe.

39 Henela akaanung'una bhangu, mpalikwa kulokolila kutangacha lilobhe lya Annoongo, nambo nkotokunkanikia mundu kulongela kwa chilongelo chigeni. 40 Henela goa gateendeke handa chiipalikwa.