1 Bahi, kwa ngani yeniyela hinikanyandikilanga, mwangota nnobholanga, nga yammbone handa mundu ngalombela. 2 Nambo kwa ligongo lya kujogoa kwa ngoongola, bahi, kila mwanalome na abhee na hanu jwabhe mwene, na kila mwikege abhee na hangwana jwabhe mwene. 3 Mwananalome apalikwa kwaatendela kila chilebhe chichipalikwa kwa hanu bhabhe, na bhena hanu mundu apaalikwa kwaatendela kila chilebhe chichipalikwa kwa hangwana bhabhe. 4 Hanu mundu jwangali malola kwa ngani ja mmele gwabhe, bali hangwana bhabhe abhinago, hela hela hangwana mundu jwangali malola kwa ngani ja mmele gwabhe, ila hanu bhabhe abhinago. 5 Kila mundu akoto kwaajima ajabhe, ila handa nkondikininge kwa machobha gantekondananga, ili nkombolange kuchibhoa mu kwaajopa Annoongo, kabhele mmujilanange ili Lichetani akoto kwaajiganga ligongo lya kulepela kuchiibhila kwinunji.

6 Gandendakunnobholelanga nangocheni nga genigala gang'anikia nenga jika, ngabha malagilo. 7 Ndendakupala bhandu bhoa bhabhangange handa nenga chinitama, nambo kila jumo akweti chipawa chabhe kubhoka kwa Annoongo, jumo chipawa chabhe chenjeni na bhangi chenichela.

8 Nangocheni kwa bhenibhala bhangalombelanga na bhenibhala akaawelwa ndendakunnobholela kubhee nga yammbone kubhee handa nenga chinitama. 9 Handa mundu ngakombola kuchihibhila, bahi na aloombele, kwakubhee nga mbaya muno kulombela au kulombwa nambo ngabha kulokolila.

10 Kwa bhenibhala bhabhatekulombelana ngweti malagilo, kabhele ngabha jangu, ila nga ja Hangwana, hanu na akotokulekana na hangwana bhabhe, 11 nambo handa bhalekininge na bhena, bahi bhaigale hiyoyo pangali kulombwa, handa ngabha henela, achikichane na hangwana bhabhe. Na jono hangwana akoto kwaajandikila na kwaapekea talaka hanu bhabhe.

12 Nambo kwa bhenaangota bhangi, gangani gandendakulongela ngabha Hangwana jwaatekunobholela ila nenga nga ndekulobhola handa anung'una jwaakweti hanu jwangahobhalela, na jono hanu akakoonda kutama pamo na jonojwe, bahi nkoto kwaapekea talaka. 13 Na, handa mwikege jwatekwaahobhalela Akilisito abhii na hangwana jwangahobhalela, na jono analome akakonda kutama nabho, bahi, akoto kwaapekea talaka hangwana jwabhe. 14 Kwa kubhee jonojwe hangwana jwangahobhalela Akilisito atendakondekwa kwa Annoongo kwa kulondanika na hanu bhabhe, na jono mwikege jwaangahobhalela Akilisito atendakondekwa kwa Annoongo kwa kulondanika na hangwana bhabhe. Handa ngabha henela bhana bhabhenji bhakakondikweehopo kwa Annoongo, nambo nangocheni bhabhilinge bhana bhakwe Annoongo. 15 Nambo handa jonijola jwangahobhalela apala kwaaleka ajabhe jwaatekwaahobhalela Akilisito, bahi, na bhaaleke. Penapo hangwana au hanu jwahobhalile Akilisito, apakutenda umomi gwabhe. Kwakubhee Annoongo atekunkemanga mwangota ntamange kwa kuhengwa. 16 Mwenga hanu jwamwahobhalela Akilisito, mpakombolabholi kuimanya handa mpakwahokoa hangwana bhinu? Au mwenga hangwana jwamwahobhalela Akilisito, mpakombolabholi kuimanya handa mpakwahokoa hanu jwinu?

17 Nambo kila mundu atame handa chibhatekulobholelwa na Hangwana, na handa chibhatekemwa na Annoongo. Hele nga lilagilo lyangu kwa hibhoga ya bhandu bhabhaahobhalela Ayesu. 18 Handa mundu akakemwa kongo abhii ahinitwe, bahi akotokuchikopokea kubhee jwangahinwa, na handa pabhakakemwa abhii tangu kuhinwa, bahi na akotokuhinwa. 19 Kwa kubhee kuhinwa au pangalikuhinwa ngabha chilebhe, chichibhii chammbone nga kugajoanikia malagilo ga Annoongo. 20 Bahi, kila jumo jwinunji na aigalilee handa chibhabhile penipala pabhakakemwa. 21 Bholi, mwenga mwakibha abhanda pankakemwa? Elo, nkotokubhee na lipamba, nambo handa mpatite upenyo gwa kulekelelwa, mugutumie. 22 Kwa kubhee jonojwe jwaakemitwe na Hangwana abhii abhanda jonojwe kubhee mundu jwangabhee na mabohu kwa Hangwana. Hela hela jonojwe jwaakemitwe abhii mundu jwangabhee na mabohu, kubhee abhanda kwa Akilisito. 23 Mwabhoa ntekuhemelwanga kwa bei ngolongwa, nangocheni nkotokubhee kabhele akaabhanda bha bhandu. 24 Akaanung'una bhangu bhamwahobhalela Akilisito, kila jumo jwinunji na aigalile na Annoongo handa chiikabhee lolo penipala pabhakakwemwa.

25 Bahi kwa ngani ja akaahenja na akaamwali bhangalombelwanga, nenga nangali amuli kubhoka kwa Hangwana, nambo ndendakuganikia kubhee kwa kiha jabhe Hangwana mpalikwa kunhobhalela.

26 Bahi, kubhokana na ngani jijibhile nangocheni, nga yammbone nhigalange handa chimmilinge. 27 Bholi, nnombile? Bahi, nkotokuganikia kulekana na hanu bhinu. Bholi, mwangaloombela? Bahi, nkotokulolea mwikege. 28 Nambo handa nnombile, mpakubhee mwangatenda mabohu, na mwaali handa alombwite, apakubhee jwangatenda mabohu, nambo bhenibhala bhabhapakulombelananga bhapakupatanga ukomu nnyingi mu umomi gongoni, na nenga mbala genago gakotokumpatanga mwangota.

29 Akaanung'una bhangu bhamwahobhalela Akilisito mbala kulongela henela, muda guguhigalile nga nnyipinyipi. Na kubhokela nangocheni bhenibhala bhabhalombilinge na bhatamange handa henela bhangalombelananga, 30 bhabhagutanga bhabhee handa ngagutanga hopo, na bhabhahachukanga bhabhee handa ngahachukanga hopo, bhabhahemelanga bhabhee handa ngahemelanga chilebhe, 31 bhoa bhabhabhilinge na lihengo pachilambo pani bhabhee handa bhangali lihengo. Kwakubhee chilambo cheni, handa chitumanya chipakupeta.

32 Chimbala nenga mwangota nkotokubhee na lipamba. Mundu jwangalombela apakupangana lihengo lya Hangwana henela chibhapakwabhajila Hangwana. 33 Nambo analome jwaalombile apangana hilebhe ya pachilambo, ili ammajile hanu mundu, 34 na jono kuganikia kwabhe kutekumetunika pabhele. Mwikege jwangalombelwa au ahenja atendakuchibhoa mweene ligongo lya kupangana lihengo lya Hangwana. Nambo mwikege jwaalombwite atendakupangana hilebhe ya pachilambo pani ili ammajile hangwana mundu.

35 Ndendakunnobholelanga gangani kupala kunnyangatilanga mwangota, na ngabha kunhibhilanga. Mbala ntamange maha, ili muntumikile Hangwana mitima jinunji joa.

36 Handa mundu joajola atendakuganikia kubhee ngaatendela gammbone handa ngannombela jono mwikege jwaatekwaaloa, kongo yaaka ya jono mwikege pahipunda kujonjokeka na jono mundu kulikolila kwabhe, bahi apangane handa chibhapala, ngapenda bhalombelanange tu. Jonojwe apakubhee jwangapanga mabohu, bhapaalikwa bhatoolane tu. 37 Nambo handa jono mwanalome handa apaalite mweene mu ntima gwakwe ngaloombela pangali kulumikilwa na mundu joajola, na handa akoombola kuchitandaa mweene, bahi atenda maha pangali kunnombela jono mwikege ahenja. 38 Kwa malobhe gangi, jonijola mwanalome jwaamua kulombela atenda yammbone na jonijola jwaamua kutama pangali kulombela atenda yammbone muno.

39 Mwikege jwaalombwite atabhitwe na malagilo ga ulombela kwa machobha goa hangwana bhabhe pabhabhee jwamomi. Nambo hangwana mundu handa atekujomoka, mwikege jonojwe ngatabhwa na malagilo ga hangwana mundu, na handa apaalite kulombwa na analome jongi joajola jwaapalite, ila hipaalikwa abhee mwanalome jwaahobhalela Akilisito. 40 Nambo chimmona nenga, apakuhachuka muno handa apakuhigalila hiyoyo handa apakutama pangali kulombwa kabhele na mwanalome joajola. Genago ngabha gang'anikia nenga, na ngweti Mboomo jwa Annoongo.