1 Annoongo atekututuma twenga tukaalobholelange bhandu malobhe gabhe yakubhee jwangaalobholela mundu joajola. 2 Chichipalikwa kwa mundu joajola jwaatekupekewa lihengo lya kwaatangachianga bhandu apalikwa kubhee jwaakuaminika. 3 Nambo kwangu nenga nga chilebhe chichoko muno handa bhandu bhapakunhukumula handa mbangine lihengo maha au nangapangana lihengo maha, au mbakuhukumulwa na chebule joajola ja bhandu, na wala ngachihukumula nenga namwene. 4 Nenga ngajogopa chikubho choachela, nambo jenejo ngalaangia kubhee nangalemwa. Hangwana jika jabhe nga jwanhukumula. 5 Henela nkotokuhukumulanga mundu joajola machobha gakwe tangu gangahika, nnendelange mpaka Hangwana pabhapakuhika. Jonojwe apakuileta panhana hilebhe yeniyela hiitekuchiiya palubhendu na kubheka palugwinjili na genigala gabhaganikianga bhandu mu mitima jabhenji. Ngapena kila jumo apakulumbaliwa muno na Annoongoo.

6 Bahi akaanung'una bhangu, hikubho heye niitendite kubhee kulandana na nenga na Apolo ili gannyangatilange mwangota, mbala mugajeketelange genigala gagajandikwe, "Mugakoondange gagajaandikwe." Pakati jinunji pakoto kubhee na mundu joajola jwaachipunila mundu jumo na kwaabhelua bhangi. 7 Bholi, nga aganiki jwatekuntenda mwenga kubhe nkolongwa? Chilebhe niki chimwangapekewa? Na handa mpekiwe na Annoongo kwa niki nchipune?

8 Nangocheni mminago genigala goha gampalanga? Nangocheni ntekubhee akaakola hilebhe hijingi? Ntekubhee akaakolo, kabhele pangali twenga? Elo, ikabhee maha handa kweli nkabhilinge akaamwenye, ili na twenga tubhee akaamwenye pamo na mwangota. 9 Ng'anikianga Annoongo atutendite twenga akaandundame tubhee bhandu bha kubhelulilwa muno, handa bhandu bhabhahukumulikwe komekwa, kwakubhee tutekubhee handa bhandu bha kuekea nnongi ja bhandu bhoa bha pachilambo choa, nnongi ja akaatumichi bha kunani kwa Annoongo na bhandu. 10 Twenga tubhonekana ngabha chilebhe ligongo lya Akilisito, nambo mwangota nga akaakola malango mu kulondekana na Akilisito! Twenga twangali machili, nambo mwangota nga ntekola machili. Mwangota ntendakutopelwa, nambo twenga tutendakutubhelulikwa. 11 Mpaka nangocheni tubhii na njala na nyota, twangali ngobho, tupotwa mapalamanda ga kumio na pakwa pakugoloka. 12 Kabhele tutendakulaga na tutenda mahengo kwa mabhoko gitu twakaachinabhene. Handa bhapakututukana na twaatendelanga gammbone, handa bhapakutubhelua tutendakuhimbalila, 13 bhandu pabhatukopokeanga, tutendakujangula kwa kutopea. Mpaka nangocheni tutekutendwa handa uhakwa gwa pachilambo, na pamiho ja bhandu twenga tubhonekana ngabha chilebhe!

14 Ngannyandikilanga hilebhe yenjeni ligongo lya kuntendanga mwangota mmangange na honi, nambo nga ligongo lya kwaajigananga bhana bhangu bhanaapalanga. 15 Hata handa mmi na bhabhajigana elupu komi mu Akilisito, nambo mwangali akaatati bhajingi. Nenga ngibha naatati bhinu kwa kubhee nga junakaannetelanga Ngani Jammbone.

16 Henela ndendakumpembeleanga mwangota, mmangange handa nenga chimile. 17 Nga maana naatumite Atimoseo kwaachinunji. Jonojwe nga mwana jwangu junaapala na jwakuaminika mu kulondekana na Hangwana. Apakwakombokeanga ndela jiniikagula mu kulondekana na Akilisito, ndela jininyigana koha mu hibhoga ya bhandu bhabhahobhalela Akilisito.

18 Bhangi pakati jinunji bhajemikinge kubhee bhatekuchilibhalila bhabhikuganikianga kubhee ngahika kabhele kwaachinunji. 19 Nambo Hangwana anabhapalite, mbakuhika kwaachinunji na popopo nga pambakuchibhonela mwene, ngabha chenichela chibhakombolanga kulongela bhenaangota bhabhachipuna, nambo kabhele chenichela chibhakombolanga kutenda. 20 Kwakubhee ukolo gwa Annoongo ngabha ngani ja kulongela tu, ila kubhee na machili ga Annoongo. 21 Mpalanga bholi? Nhike kwaachinunji na luyakato, au nhike na ntima gwa upalio na liele?