1 Hibhii ngani ya kuaminika kubhee jibhii ngoongola pakati jinunji, nga ngoongola jibohu yakubhee jangabhokela hata pakati ja bhandu bhangaamanya Annoongo. Ndekulobholelwa kubhee jumo jwinunji atama na hanu bha atati bhabhe! 2 Nkombolanga bholi kuchipuna? Wala mwangajoanga mitima kubhina ili kupala mundu jwaatendite chikubho hecho abhoke pakati jinunji. 3 Nenga, kwa upande gwangu, hata kwa mmele ndekubhee kutali na mwangota, hata henela kwa mboomo mii penapo pamo na mwangota, handa henela hibhii penapo, ndekujomola kwaahukumula mundu jonojwe jwaatendite chikubho chenecho cha honi. 4 Pamkondekananga pamo kwa kwaachalila Hangwana Ayesu, na nenga mbakubhee pamo na mwangota kwa mboomo, na kwa ukolo gwa Hangwana bhitu Ayesu, 5 munkamuange kwa Lichetani mundu jonojwe ili agupote mmele gwabhe na kuntenda mundu jonojwe aleke mabohu gabhe ila mboomo jabhe jikombole kuokolewa mu lichobha lyela lya Hangwana.

6 Kuchipuna kwinunji kwangali maana! Bholi, ngaimanya kubhee ngedule kachoko jikombola kutumungua libonge lyoa lya ukobha gwa ngaano? 7 Mmekange mitima jinunji kubhee chwaapi ligongo lya kwaachalila Annoongo, mummoange jonijola mundu jwaapangana gabohu ili mkombolange kubhee libonge liyono lya ukobha gwa ngaano lyangalekelwa ngedule handa chimpalikwanga kubhee, kwakubhee Akilisito, Pasaka jitu, atekubhokekwa kubhee mbeeko. 8 Henela tutende lichobha likolongwa ngabha kwa ngedule jenijela ja lolo, ngedule jangalimmbone na jibohu, ila kwa nkate gwangalekelwa ngedule, nga ntima nchwaapi na kweli.

9 Mu balua jangu nakannyandikilanga kubhee nkotokuchikichana pamo na bhangoongola. 10 Henela nangannobholelanga nkotokuchikichana na bhandubhoa bha pachilambo, bhandu bha ngongola, au bhandu bhakulokolila, au bhabhapokanga hilebhe na bhabhajopanga hidimu. Henela handa mpalanga kubhee kutali na bhena bhandu mkapalikwa kubhoka mu chilambo heche! 11 Chinakannyandikilanga nga chenjeni, nkotokuchikichana na anung'una jwaatekwahobhalela Akilisito jwaatenda ngoongola, bhailema, bhabhajopa hidimu, jwaakololekea akaajabhe, jwakolelwa na jwaapoka hilebhe. Mundu handa jonojwe hata kulyee nkotokulyee pamo nabho.

12 Bholi, nga lihengo lyangu kwahukumulanga bhandu bhabhangahobhalela Akilisito? Bhenaangota Annoongo apakwahukulanga. Bholi, ngati mpalikwa kwahukumulanga bhandu bhenabho bhabhahobhalela Akilisito bhabhabhilinge pakati jinunji? 13 Mwangota mummengange mu chibhoga chinunji jonojwe abohu.