1 Nangocheni kwa ngani ja yaakulya hiibhokilwe chadaka kwa hidimu, tuimanyi kubhee, "Twenga twabhoa tubhii na umanyo," nambo kumanya konokwe kwaatenda bhandu bhachipunange, nambo upalio gututenda twaajangatilange bhangi. 2 Mundu joajola jwaaganikia kubhee atendakumanya chilebhe, jonojwe ngachimanya choachela handa chibhapalikwa kumanya. 3 Nambo jwaampala Annoongo, Annoongo atendakummanya mundu jonojwe.

4 Henela, kwa ngani ya chakulya chichibhokelwa chadaka kwa hidimu, tuimanyi kubhee hidimu ngabha chilebhe pamba pachilambo na tuimanya kubhee Annoongo nga jumo jika. 5 Hata handa bhabhilinge bhabhakemwanga, "Minongo," kunani kwa Annoongo au pachilambo, na hata handa kweli bhabhilinge "minongo," na "akaangwana," bhajingi, 6 henela, kwaachitu twenga abhile Annoongo jumo jika, Atati, jwaalakie yoha, na ligongo lyabhe twenga tubhile. Kabhele abhile Hangwana jumo jika, Ayesu Kilisito, kwa kupetela jonojwe hilebhe yoha hikaahalakilwa, na twenga tutendakutama ligongo lyabhe.

7 Nambo ngabha kila mundu jwaachimanya chikubho heche. Bhena bhandu tangu bhatekuyobhalela kubhee mpaka nangocheni pabhalyanganga chakulya kuchibhona handa chakulya chichitekubhokelwa chadaka kwa hidimu. Kwa kubhee kuganikia kwabhenji kuchoko, bhachibhonanga bhatendanga chikubho changakondekwa nnoongi ja Annoongo. 8 Nambo chakulya ngakombola kutupeleka kubhandikila muno na Annoongo. Handa tulekite kulyee ngapongokewa chilebhe, handa tulile ngajonjokewa chilebhe kwa Annoongo.

9 Nambo nnolange gongoni ukolo gwinunji gukoto kwaachimwanga bhenibhala bhabhangabhee na machili mu kuhobhalela bhatendange mabohu. 10 Kwakubhee, mundu jwangakomala mu kuhobhalela, handa amweni mwenga junkweti umanyo ntendakulyee yakulya yeneyo nkati ja nyuumba ya hidimu, bholi, mundu jonojwe ngakulumikilwa kulyee chakulya chichitekubhokelwa chadaka kwa hidimu? 11 Henela, anang'una jwangakomala mu kuhobhalela yakubhee Akilisito akajomoka ligongo lyabhe, apakuhobha ligongo lya umanyo gwinu. 12 Pamwajambukianga kupangana mabohu akaanung'una bhinunji kwa ndela jenejo na kwahulaa mu kuhobhalela kwabhenji kwangakomala, mpakwalemwa Akilisito. 13 Henele, handa chakulya chipakwaatenda anung'una jwangu kutenda mabohu, ngalyee nyama ng'o, ndendakujogopa kwajambukia anung'una jwangu kutenda mabohu.