1 Akaanung'una bhangu, kwa ngani ja ngwahupa ya mboomo ya Annoongo.

Mbala muimanyange maha hikubho heye. 2 Mmanyanga kubhee pamwakibha tangu mwangaamanya Annoongo, nkatawaliwanga na kutembwanga na hidimu yangalongelanga. 3 Bahi, muimanyange kubhee mundu joajola jwaatandaikwa na Mboomo ja Annoongo ngakombola kulongela, "Ayesu alaaniwe!" Hela hela jwakwa mundu jwaakombola kulongela, "Ayesu nga Hangwana," handa jwangatandaikwa na Mboomo ja Annoongo.

4 Bahi hibhile ngwahupa yengi yengi ya Mboomo jwa Annoongo, nambo Mboomo nga jola jola jumo jwaabhoa ngwahupa yeneyo. 5 Hela hela kubhii na namuna hijingi ya kwaatumikila Annoongo, nambo Hangwana jwaatumikilwa nga jumo. 6 Kubhii na namuna yengi yengi ya kupangana mahengo ga Annoongo, nambo Annoongo nga jwaatujangatila kupangana gena mahengo. 7 Ngwahupa ja Mboomo jwa Annoongo bhatupekie twenga ili kwaajangatilanga bhandu bhoa. 8 Mboomo kumpekea jumo lilobhe lya malango, jongi lilobhe lya umanyo kwa Mboomo jojojo. 9 Mboomo jojojo kumpekea jumo uwecho nkolongwa gwa kuhobhalela, na atendakumpekea jongi ngwahupa cha kulamia. 10 Jongi atendakumpekea ngwahupa cha kutenda yakangachika, jongi ngwahupa ja kutangacha ngani ja Annoongo, jongi ngwahupa ja kulekania ngwahupa hiibhoka kwa Annoongo au ngabha, jongi atenda kumpekea ngwahupa ja kulongela chilongelo chigeni, na jongi ngwahupa ja kuhatambula yene higeni. 11 Genago goa nga mahengo ga Mboomo jojojo jumo, na jono Mboomo kummetulila kila mundu, handa chibhapala mwene.

12 Handa henela mmele chigubhile gumo na gubhii na yeega hijingi, na yeega yeneyo yoa kugutendea mmele gumo, nga chiibhile kwa Akilisito. 13 Ligongo mu Mboomo jonojwe jumo bhoa tukabatichwa mu mmele gumo, handa nga Bhayahudi au bhandu bhanga Bhayaudi, handa nga akaabhanda au bhandu bhabhatekulekelelwa, na twenga twabhoa tukapekewa tung'wee Mboomo jono jumo.

14 Bahi mmele ngabha chiega chimo, bali nga yeega hijingi. 15 Handa lukongono lukalongile, "Kwa kubhee nenga ngabha lubhoko, bahi nenga ngabha mmele," bholi, kulongela henela nga kupakutenda lono lukongono gukotokubhee chiega cha mmele? 16 Handa lichikilo likalongile, "Kwa kubhee nenga ngabha lio, bahi nenga ngabha lya mmele," bholi, kwa kulongela henela lene lichikilo likabhilehopo chiega cha mmele? 17 Handa mmele gwoa kugabhii lio, kujoa kukabhile koji? Na handa mmele gwoa kugabhii lichikilo, mundu akakombwilebholi kunua? 18 Nambo handa chiibhile, Annoongo akahalakia kila chiega pakwe mu mmele handa chibhakapala mweene. 19 Handa yoa hikabhii chiega chimo, mmele gukabhile koji? 20 Ukweli nga kubhee, hibhile yeega hijingi nambo mmele nga gumo.

21 Bahi, lio ngakombola kugulobholela lubhoko, "Ngampala mwenga" wala mutwe ngakombola kugalobholela makongono, "Ngampalanga mwangota." 22 Nambo badala jakwe, yeniyela yeega ya mmele hibhonekana yangali machili, nga hiipalikwa muno, 23 na yeniyela yeega ya mmele hiituibhona yangatopela, nga hiituitopea muno, yeniyela yeega ya mmele yangahalala muno, nga tutendakuitopea muno, 24 penipala yeniyela yeega hiitekubhajila ngapalikwa. Nambo Annoongo aibhekite pamo yeega ya mmele na akaitopea muno yeniyela hiitekupongokewa. 25 Annoongo akatenda henela ili kukotokubhee na mpwilingano mu mmele, bali yeega yoa hitende mahengo kwa kuchikichana. 26 Handa chiega chimo chitendakulala yoa hitendakuhulala pamo na chenecho. Handa chiega chimo chitendakulumbalilwa, bahi yeega yoa hitendakuhachuka pamo na chenecho.

27 Bahi, mwangota mwabhoa nga mmele gwa Akilisito, kila jumo jwinunji nga chiega cha gono mmele. 28 Mu chibhoga cha bhandu chichahobhalela Akilisito, Annoongo abhekite kila chilebhe pakwe, bhakajemekanga akaandundame kabhele akabheka akaalondohi bhabhe, kabhele akabheka bhabhajigana, ngapena akabheka bhenibhala bhabhakweti ngwahupa ya kutenda yakangachika, kulamia bhandu na kujangatila, akachilongola na bhabhakombolanga kulongela hilongelo higeni. 29 Bholi, bhoa nga akaandundame? Bholi, bhoa nga akaalondohi? Bholi, bhoa nga bhabhajigana? Bholi, bhoa bhakweti ngwahupa ja kutenda yakangachika? 30 Bholi, bhoa bhakweti ngwahupa ja kombola kulamia? Bholi, bhoa bhakweti ngwahupa ja kombola kulongela chilongelo chigeni? Bholi, bhoa bhatendakutambula hilongelo? 31 Bahi, nnokolilange kupatanga ngwahupa ngolongwa. Na nenga mbakunnangianga ndela jammbone ja kupata yene ngwahupa.