1 Mbala mwangota mummanye anning'una bhitu Afoibe, yakubhe nga antumichi mu lilubhalo lya bhandu bhabhahobhalela Akilisito bha ku Kenikelea. 2 Mumpokelange ligongo atendakunhobhalela Hangwana handa chiipalikwa kupokelewa bhandu bha Annoongo. Munnyangatile choachela chibhapakunnyopanga, kwa kubhee atekunyangatila nenga pamo na bhandu bhajingi kabhele.

3 Ndendakwaachalimianga akaatumichi ajangu mu Kilisito Ayesu, Apilisika pamo na Aakila. 4 Bhenangota bhakakoonda kujomoka ili bhaguokoange umomi gwangu. Ndendakwaachukulu bhenaangota, ngabha tu nenga jika jangu, ila kabhele kubhoka mu malubhalo ga bhandu gagaahobhalela Akilisito ga bhandu bhanga Bhayahudi. 5 Chalamu jangu kabhele kwa lilubhalo lya bhandu bhabhahobhalela Kilisito bhabhakongana mu nyuumba yabhenji.

Mukaapekee chalamu aganja bhangu Aepeineto, jwaakibha jwakujemeka kunhobhalela Akilisito konokwe kuchilambo cha ku Asia. 6 Mukaapekee chalamu Amalia, jwatendite lihengo likolongwa ligongo linunji. 7 Mukaapekee chalamu jangu Anduloniko na Ayunia, bhenabho nga akaalongo ajangu, bhabhakatabhwa mu nyuumba ja kutabhila bhandu pamo nanenga, akaandundame bhitu bhatendakwaamanyanga bhandu bhenabho, kabhele bhakaakagula Ayesu tangu jangu nenga.

8 Mukaapekee chalamu Aampiliato, aganja jwangu kwa kubhee atendakwahobhalela Hangwana Ayesu. 9 Mukaapekee chalamu aganja bhangu junampala Aulubano, jwaapangana lihengo mu kwaatumikila Akilisito, kabhele munpekee chalamu jangu aganja jwangu Asitaku. 10 Mukaapekee chalamu jangu Aapele jwakaalengwa na kondekwa na Akilisito. Mukaapekeange chalamu jangu kwa bhoa bhabhabhile munyuumba ja Aalisitobulo. 11 Mukaapekee chalamu alongo ajangu Ahelodioni, na kwa akaalongo bhoa bhabhabhile munyuumba ja Analikisi bhabhachilondanike mu Hangwana. 12 Mukaapekee chalamu Atilifaina na Atilifosa, bhenibhala akahikege bhatekupangana muno lihengo lya Hangwana bhitu Ayesu Kilisito. Kabhele Munchalimiange Apesisi junampala, jonojwe nga mwikege jongi jwaatekupangana muno lihengo lya Hangwana bhitu Ayesu Kilisito. 13 Mwapekeange chalamu jangu Alufo. Mundu jwaatekuhagulikwa na Hangwana Ayesu, na anyongo jwabhe, hela hela kabhele nga anyongo jwangu. 14 Mwapekeange chalamu Asinkilito, na Afulegoni, na Ahelume, na Apatuloba, na Aheluma, pamo na bhandu bhoa bhabhahobhalela Hangwana bhabhabhilinge pamo nabho. 15 Mwaapekeange chalamu Afilologo na Ayulia, na Anelea na alombo bhabhe, na Aolimpa, pamo na bhandu bhoa bha Annoongo bhabhabhilinge pamo nabho.

16 Mchalimianange mwangota kwa mwangota kwa kulangia kubhee ntenda kupalana. Malubhalo goha gagaahobhalela Kilisito gatendakunchalimianga mwangota.

17 Nangocheni akaalongo bhangu mmangange miho na bhenibhala bhandu bhabhannyambukia kutaukana na kwaatendanga bhandu bhangi bhalepelange kuhobhalela kwa majigano gagataukana na genigala gantekuchijigana. Nchibhekange kutali na bhandu bhenabho! 18 Bhandu handa bhenaangota ngamtumikila Kilisito Hangwana bhitu, ila bhabhatendanga kwa kuchipala hilebhe, kwa malobhe gabhenji gakunyenga bhatendakwatembanga bhandu. 19 Kila mundu atekujoa kwa ngani ja kukoonda kwinu, nanenga ndendakuhangalala muno ligongo linunji. Nambo ndendakupala mmangange na luunda mu hikubho yammbone na nkotokutendanga hikubho hibohu. 20 Annoongo jwaampekeanga kuhengwa ngakabha apakwaatimba Lichetani na kumpekanga machili ga kwapeta.

Umbone gwa Hangwana bhitu Ayesu Kilisito gubhee na mwangota. Na hibhee henela.

21 Kabhele Atimoteo, jwaapangana lihengo na nenga, atendakunchalimianga. Hela hela Alukio na Ayasoni na Asosipateli, Bhayahudi akaajangu na hela hela bhatendakunchalimianga.

22 Nenga Atelitio, jundendakujandika balua jenjeni, ndendakunchalimianga mu lina lya Hangwana.

23 Agayo, mundu jwaatekumandikia kwaachabhe, pamo na bhandu bhao bhabhahobhalela Akilisito bhabhatekongana kwaachabhe atendakunchalimianga. Aelasito, jwaajemelela ulohi gwa chilambo heche, pamo na Akwalito anung'una bhitu jwahibhalale mu Hangwana kabhele atendakunchalimianga. 24 Umbone gwa Hangwana bhitu Ayesu Kilisito gubhee pamo na mwangota bhoa. Na hibhee henela.

25 Bahi, nangocheni na twaalumbalile Annoongo! Jonojwe jwaakombola kuntendanga mwangota bhakuhimalika mu kuhobhalela kwinu kupetela Ngani Jammbone jindekujitangacha kwa ngani ja Ayesu Kilisito, ngani jenejo jikachiiya kwa yaaka hijingi. 26 Nambo, nangocheni ukweli gonogwe gutekuhunulikwa kwa ndela ja Majandiko ga akaalondohi, na kwa Malagilo ga Annoongo gwa machobha goha pangali kupela gatekubhonekana kwa bhandu bha hilambo yoa ili bhandu bhoa bhakombole kwahobhalela na kwaakonda.

27 Annoongo jwaabhile jwa jika jabhe na jwaabhile na malango goha, alumbalilwe kupetela Ayesu Kilisito machobha goa pangali kupela! Na hibhee henela.