1 Henela, nangocheni Annoongo ngahukumulanga bhandu bhenibhala yakubhee mu umomi gwabhenji bhatekulondanika kupetela Kilisito Ayesu. 2 Kwa kubhee Malagilo ga Mboomo ja Annoongo gagaleta umomi mu kulondekana na Akilisito Yesu tekunekelela kubhoka mu Malagilo ga mabohu gagaleta malilo. 3 Annoongo atekutenda chenichela chikubho chakubhee Malagilo ga Amusa gangakombola kupangana, ligongo lya umundu gwitu gwangali machili, Annoongo akaatuma Mwana jwabhe kongo abhi na mmele handa twenga chitubhile ili kwa mmele gwabhe gonogwe atekubhee chadaka ja kutubhokea mabohu gitu, 4 Annoongo akapangana henela ili tukombole kupangana genigala gagalagikwa na Malagilo, kwa kujihobhalela Mboomo jwa Annoongo nambo kwa kulupalila mimele jitu. 5 Maana bhenibhala bhabhatamanga kwa kuhikagulanga hikubho ya mmele bhatendakuganikianga hikubho ya mmele, ila bhenibhala bhabhahikagula Mboomo bhatendakuganikianga hikubho ya Mboomo ja Annoongo. 6 Kuganikia kukutandaikwa na mmele kuleta malilo, ila kuganikia kukutandaikwa na Mboomo kuleta umomi gwa machobha goa na kutongamanika. 7 Konikola kutandaikwa na kuganikia chimmele kutenda kupwatilana na Annoongo, na kwa kubhee kuganikia konokwe ngajeketela Malagilo ga Annoongo, wala ngakombola kujeketela. 8 Bhenibhala bhandu bhabhakagula hikubho ya mmele gwa mabohu, ngakombolanga kwaabhajila Annoongo.

9 Nambo mwangota ngatama kwa kugakagula gagapalikwa na mmele, nambo kujaulilana na gagapalikwa na Mboomo, tutendakutandaikwa na Mboomo ja Annoongo tu atama nkati jinunji. Henela mundu joajola jwabhiiopo na Mboomo ja Akilisito, jonojwe ngabha jwa Akilisito. 10 Nambo handa Akilisito abhii nkati jinu, henela hata handa mimele jinu jibhii handa jijaula kukuwee ligongo lya mabohu, nambo Mboomo ja Anoongo nga umomi ligongo lya kondekwa na Annoongo. 11 Handa Mboomo ja Annoongo jwaatekwaayoha Ayesu, atama nkati jinunji, jonojwe jwaatekwaayoha Akilisito Ayesu apakuipekea umomi mimele jinunji jijijaula kukukuwee, apakutenda henela kwa ndela ja Mboomo jabhe jwaatama nkati jinunji.

12 Henela bahi, akaalongo bhangu, tukweti na lihengo, ngapalikwa kutama kagulana handa mimele jitu chiipala. 13 Kwa kubhee handa mpakutama kutenda handa mimele jinunji chiipala, kweli mpakujomokanga, nambo handa mpakulekanga hikubho hibohu ya mmele kwa Mboomo ja Annoongo, penapo mpakulamanga. 14 Bhandu bhoa bhabhalongolelwa na Mboomo ja Annoongo bhenabho nga bhana bha Annoongo. 15 Mwangampokela Mboomo ja Annoongo jwaantendanga mwangota akaabhanda kabhele na kunnekelelanga lipamba, nambo ntekumpokelanga Mboomo jwaantenditinge mwangota bhana bha Annoongo, na kwa Mboomo jonojwe, twenga twaakema Annoongo, "Aba, nga kulobhola, Atati." 16 Mboomo mweene atendakongoloka pamo na mboomo yitu kubhee twenga nga bhana bha Annoongo. 17 Bahi, kwa henela twenga nga bhaana bha Annoongo, tupakupokela Annoongo apakutupekea gammbone bhandu bhabhe bhoa, na tupakupokela hikubho heyo kubhoka kwa Annoongo pamo na Akilisito, kweli handa tupakulaga pamo na jonojwe Akilisito, tupakupata ukolo gwabhe.

18 Henela, ndendakuibhona heye hibhini ya nangocheni kubhee ngabha chilebhe, handa gonigola ukolo gwa Annoongo gugupakuhunukulikwa kwaachitu. 19 Hiyuumbe yoa hitenda kulendela kwa kulokolila muno kupala kulola kuhunukulilwa kwa bhana bha Annoongo, 20 kwa kubhee hiyuumbe yoa hibhekitwe mu kupoganikwa, ngabha handa chiikapalanga yeene, ila hikatendekwa henela handa chibhakapala Annoongo. Hata henela gabhile gakulupalila, 21 kwa kubhee hiyuumbe yeene yoa hipakuokolewa kubhoka mu ubhanda bha ubohu na kupekewa ukolo gwa bhana bha Annoongo. 22 Tuhimanyi kubhee mpaka nangocheni, hiyuumbe yoa hitendakubhobhola kwa hibhini handa ga kuchijogola mwana. 23 Ngabha hiyuumbe jika jabhe hata na twenga twaachinabhene tutubhii na bhena Mboomo ja Annoongo, jwaabhile ngwahupa ja kujemeka ja Annoongo, na twenga kabhele tutendakubhobhola mu mitima jitu, kongo tubhikulendelela tupanganwe bhana bha Annnoongo, na mimele jitu jikombolewe. 24 Kwa kulupalila genago twenga tukombolilwe. Nambo kulupalila konokwe kwanga maana handa tutenda kulola chenichela chitutendakulupalila. Henela nga aganiki jwaakulupalila chenichela chibhachibhona? 25 Handa tutendakulupalila kupata chenichela yakubhee twangachibhona tangu, tutenda kuchilendelela kwa kuimbilila.

26 Hiyoyo, hata handa tweenga tutekupongokewa na machili nambo Mboomo ja Annoongo atendakutujongekea machili penipala patupongokewa na machili kwa kubhee twangahimanya kujopa handa chiipalikwa. Nambo Mboomo mweene atenda kutujopela kwa Annoongo kwa lilobhe lya kiha lyangalobholeka. 27 Annoongo jwaalola mpaka nkati ja mitima ja bhandu, atenda kugamanya gabhaganikia jono Mboomo, kwa kubhee jono Mboomo atenda kwaajopela bhandu bha Annoongo kagulana handa henela chibhapala.

28 Twenga tutenda kuhimanya yakubhee mu hikubho yoa Annoongo apangana lihengo pamo na bhoa bhabhaapala, mu kwaapekeanga gammbone, nga bhenibhala bhabhatekemwa ligongo lya lihengo lyabhe. 29 Bhenibhala Annoongo bhabhatekwahagula kubhokela kandahi, kabhele jwaatekwabhekanga bhapatange kulandana na Mwana jwabhe, ili abhee abhelehi bha kujemeka pakati ja akaalongo bhajingi. 30 Bhenibhala bhabhakahagulikwa na Annoongo nga bhenabho bhabhatekwamekanga, na bhenibhala bhabhakemite nga bhenabho bhabhakakoondekwa nnoongi jabhe na bhenabho bhakaakonda nnoongi jabhe nga bhenabho bhabhapakutama nabho machobha goa.

31 Bahi, tulobhole niki kwa ngani ja gangani? Handa Annoongo akibha upande gwitu, nga aganiki jwaapakombola kutukana? 32 Handa Annoongo jwangaabhilila Mwana jwabhe jwa jika, ila akaabhoa ligongo litu twenga twabhoa. Handa atendite henela, bholi, ngatupekea gammbone goha? 33 Nga aganiki jwaapakwatakia bhenibhala bhandu bhabhahagulikwe na Annoongo? Annoongo mwene nga jwabhakondanga kubhee bhammbone. 34 Aganiki jwaapakunhukumulanga kubhee tulemwite? Jwakwa! Kwa kubhee Akilisito nga jwaajomwike, kabhele akayoka, na jonojwe abhii upande gwa mamulaka kwa Annoongo, kabhele nga jwaatenda kutujopela. 35 Aganiki jwaakombola kutulekania na upaliho gwa Akilisito? Bholi, nga kulaga, au nga hibhini au njala, uwocho gwa ngobho, au kupotekwa, au kujomoka? 36 Handa chiijaandikwe mu Majandiko ga Annoongo,

"Ligongo linu, malilo gatendakutulolea muhi na kilo,

tutenda kupanganwa handa ngondolo jwa kuchenjwa."

37 Nambo, mu hikubho heye yoa, tutendakujangatilwa na Ayesu jwaatupalite. 38 Ndekuhimanya kweli kubhee chakwa chilebhe chichipakombola kutulekania na upaliho gwa Annoongo, ngabha malilo wala umomi, na ngabha akaatumichi bha kunani kwa Annoongo, na ngabha machili gangi ga kunani kwa Annoongo, na ngabha gagabhokela nangocheni, na ngabha gagapakubhokela nnoongi, na ngabha bhabhakweti mamulaka, 39 ngabha gagabhile nnani, na ngabha gagabhile pahi, na ngabha chiumbe chengi choachela ngakombola kulekana na upaliho gwa Annoongo gugubhii mu Kilisito Ayesu Hangwana bhitu.