1 Tulobhole chiniki nangocheni? Bholi, tupunde kutame mu kutendanga mabohu ili umbone gwa Annoongo gujonjokeke? 2 Hopo hata kachoko! Tweenga yakubhee ngatabhaliwa kabhele na mabohu, tukombolabholi kutama kabhele mu kupangana mabohu? 3 Ngahimanyanga kubhee twenga twabhoa tutekubatichwa mu Akilisito Ayesu, tukabatichwanga na kulondanika na kujomoka kwabhe. 4 Patukabatichwa tukalondanika na kujomoka kwabhe, tukachikwa pamo na bhenabho, ili handa henela Akilisito pabhakayokekwa kwa machili ga ukolo gwa Atati, twenga kabhele tukombole kutama mu umomi guyono. 5 Handa tutekulondanika na jonojwe mu malilo gabhe, hela hela tupakulondanika na jonojwe kwa kuyoka kwabhe. 6 Tuhimanyi kubhee umundu gwitu gwa lolo gukajomoka na kubhambwa panchalaba pamo na Akilisito, ili machili ga mabohu gakotokututawala, na twenga tukotokubhee kabhele akaabhanda bha mabohu. 7 Mundu handa ajomwike kwa namuna jenejo abhekitwe kutali na mabohu. 8 Bahi, handa tutekujomoka pamo na Akilisito, tutenda kuhobhalela kubhee tupakutama kabhele pamo na jonojwe, 9 kwa kubhee tuhimanyi kubhee Akilisito atekuyoka na ngajomoka kabhele, malilo ngabhee kabhele na mamulaka nnani jabhe. 10 Akilisito akajomoka gunakamo tu, akagapeta machili ga mabohu, na kutama kwabhe atendakwabhajila Annoongo. 11 Mwangota hela hela, mwangota mpalikwa nchibhonange kubhee ntekujomoka kwa ngani ja mabohu, nambo nchibhonange bhandu bhantamanga pamo na Annoongo kwa kwahobhalela Ayesu Kilisito. 12 Bahi, mabohu gakotokuntawalanga kabhele mu mimele jinunji jijijomoka, na nkotokoonda mabohu gahumukumule mimele jinunji. 13 Wala nkotokubhoanga hata yeega jimo ja mimele jinunji kubhee handa chilebhe cha kutendelanga mabohu. Nambo mpalikwanga nchibhoange mwakaachina bhene kwa Annoongo handa bhandu bhabhayokite, nchibhoange mwakaachinabhene ligongo lya kutenda gagabhajilwa na Annoongo. 14 Mabohu ngantawalanga kabhele kwa kubhee mwangota ngalongolelwanga na Malagilo kabhele nambo ntenda kulongolelwanga na umbone gwa Annoongo.

15 Bahi, tulobhole niki? Tutendange mabohu kwa kubhee nangocheni tubhihopo pahi ja Malagilo au pahi ja umbone gwa Annoongo? Hikombolekahopo! 16 Bholi, muhimanyitinge kubhee panchibhoanga kwa mundu joajola handa akaabhanda na kwakonda mundu, mpakubhee kweli akaabhanda bha mundu jonojwe, handa nchibhohitinge mwakaachinabhene kubhee akaabhanda bha mabohu kupela kwabhe nga kujomoka au handa nchibhohitinge mwakaachinabhene kwa kwakonda Annoongo mpakondekwa nnoongi jabhe. 17 Nambo tutendakwaachukulu Annoongo, hata handa mwangota mwakibhanga akaabhanda bha mabohu lolo, nangocheni ntekondanga kwa mitima jinunji joha kwa genigala majigano gampokilinge, 18 na pankabhekwa kutali na mabohu, ntekubhee akaabhanda bha kutenda hilebhe hibhaipala Annoongo. 19 Ndekulongela na mwangota kwa kulandanikia na abhanda, ili nkombolange kuelewanga chindendakulongela, lolo nkibhanga akaabhanda bha mabohu kwa kuchibhoa mwakaachinabhene kubhee yoombo ya kutenda gabohu, na mabohu ginunji gakajonjokeka muno, nambo nangocheni mpalikwa nchibhoange kwa Annoongo mu umomi gwinunji gwoa, mmangange akaabhanda bha hikubho hiiyabhajila Annoongo ili nkombolange kujelejekwa na Annoongo mwene.

20 Pankibhanga akaabhanda bha mabohu, na wala mwangaganikianga kutenda hikubho hiyaabhajila Annoongo. 21 Nambo mpatitinge chiniki machobha gala kubhokana na hikubho yela yakubhee nangocheni muhibhonelanga honi? Kupela kwa hikubho heyo nga kujomoka. 22 Nambo nangocheni kwa kubhee ntekulekelwanga kubhoka mu ubhanda gwa mabohu nangocheni mmilinge akaatumichi bha Annoongo na ntekubhee bhandu bhabhe na kupela kwa yoa nga kupata umomi gwa machobha goha gangali kupela. 23 Handa mpakutumikila mabohu muhimanye kubhee mpakujimoka, nambo handa mpakubhee bha Hangwana bhitu Ayesu Kilisito, Annoongo apakumpekeanga ngwahupa ja umomi gwa machobha goha gwangapela mu kulondanika na Hangwana bhitu Ayesu Kilisito.