1 Anyahudi apakupata chiniki muno? Au kutekubhee na chikubho niki chammbone chibhapata mundu kwa kuhinwa? 2 Nga kweli, kubhee Anyahudi kutekubhee nga chikubho chammbone chikolongwa, kwa kubhee, Annoongo akaakamuanga oti Bhayahudi malobhe gakwe. 3 Nambo hipakubhee bholi, handa Bhayahudi bhangi ngahobhalelanga? Bholi, kwa kuleka kuhobhalela kwabhenji kupakwaatenda Annoongo akotokulupalilwa? 4 Hopo! Annoongo nga jwa kulupalilwa machobha goa, hata handa kila mundu nga anami. Handa Majandiko ga Annoongo chiijaandikwe mu Majandiko ga Annoongo,

"Muda goa pannobhola malobhe ginu nga ga kweli,

mu kuhukumulwa mwenga ntendakuchinda."

5 Handa ubohu gwitu gupakulangia kubhee Annoongo atenda gagapalikwa, tupakulobhola chiniki? Bholi, Annoongo handa apakutuhukumula tupakulobhola kubhee atendakutubhonela? Pambani ndendakulongela handa mundu. 6 Hopo! Handa Annoongo akibhaopo jwa kulupalilwa, akakombwile bholi kwahukumulanga bhandu bha pa chilambo?

7 Kabhele bhandu bhakongombola kulongela kubhee, kutokuhobhalelwa kwitu kwaatenda bhandu bhangi bhalolange ndaa kubhee Annoongo nga jwakuaminika, na bhenaangota bhapakupunda kwaatukucha. Nangocheni kwaniki tangu tutenda kuhukumulwa handa tupangana mabohu? 8 Kono nga kulobhola kubhee, "Tupalikwa kupangana mabohu ili gammbone gahike?" Bhandu bhangi bhatendakutukopokea kwa kutuhukumula kubhee tutekujiganwa henela. Bhenaangota bhapalikwa kuhukumulwa kubhokana na mabohu gabhenji.

9 Bahi tulobhole chiniki, bholi, twenga Bhayahudi nga bhammbone kupeta bhangi? Ngabha hopo! Handa chindekunnobholelanga kubhokela kandahi kubhee Bhayahudi na bhanga Bhayahudi bhoa bhabhi pahi ja utabhala gwa mabohu. 10 Handa Majaandiko ga Annoongo chigalobhola,

Jwakwa hata jumo jwaapangana gagaabhajila Annoongo,

11 Jwaka mundu hata jumo jwabhii na luunda,

wala jwaannolea Annoongo.

12 Bhandu bhoa bhatekwaaleka Annoongo,

bhoa bhabhi handa bhatekubhola,

jwakwa jwaatenda gagapalikwa na Annoongo,

jwaka hata jumo.

13 Malobhe gabhenji nga ga unami handa likabuli lyangawekelwa,

lulimi lwabhenji lutwelile unami,

mu kang'wa yabhenji gabhoka malobhe gagabhii na uchoongo handa ga lijoka.

14 Kang'wa yabhenji hitwelile malobhe ga kulaani na ga kwaahulaa bhangi.

15 Bhena bhandu bhatendanga chindema kujaula kwakomanga akaajabhe,

16 Poha pala pabhajenda bhatenda kualibiana hilebhe na bhatendakwaalekanga bhandu na hibhini,

17 wala ngakombola kutama bhandu bhangi kwa kuhengwa.

18 Wala ngaatopea Annoongo hata kachoko.

19 Nangocheni tuhimanyi kubhee choachela chichibhii mu Malagilo ga Amusa, gatenda kwakongolela bhandu bhabhapokilinge Malagilo genago, hata ngakombolanga kubhee na chikopokeo choachela, na chilambo choa chibhii pahi ja hukumulo ja Annoongo. 20 Bhakwa mundu bhoa bhala bhabhakondekwa na Annoongo kwa kugakamula Malagilo ga Amusa, lihengo lya Malagilo nga kunangia mundu kubhee bhatendite mabohu.

21 Nambo nangocheni, ndela ja Annoongo ja kwaakondeka bhandu kubhee bhammbone jibhekitwe pandaa, kabhele pangali kulupalila Malagilo. Malagilo ga Amusa na Majandiko ga akaalondohi bha Annoongo galangia chikubho chenecho. 22 Ndela jenejo nga ja kwahobhalela Ayesu Kilisito, Annoongo atenda henela kwa bhoa bhabhahobhalela, kwaakwa kubagulana pakati ja Bhayahudi na bhanga Bhayahudi, 23 kwa kubhee bhandu bhoa bhabhatenditinge gabohu na kupongokelwa kutopelwa na Annoongo. 24 Nambo kwa ngwahupa ja Annoongo bhandu bhoa bhakondekwa kubhee bhammbone kwa ndela ja Ayesu Kilisito jwatekutukomboa. 25 Annoongo akaapia Ayesu, ili kwa mihai jabhe, abhee ndela ja kwaabhokea bhandu mabohu gabhenji kwa kuhobhalela kwabhenji. Akatenda henela ili akombole kulangia kubhee jonojwe nga jwammbone. Pena lolo Annoongo akibha bhakuchitimalika akachitenda handa ngalola kulemwa kwa bhandu. 26 Akatenda henela ili kulangia chibhabhile jwammbone nangocheni, ili abhee jwaammbone na abhatendange bhandu bhakondekwange na ndela ja Ayesu Kilisito.

27 Bahi, tukombola kuchipunila chiniki? Chaakwa chakuchipunila! Kwa niki? Bholi, ligongo lya kugakamula Malagilo? Ngabha! Ila kwa ndela ja kwaahobhalela Ayesu Kilisito. 28 Maana Annoongo atenda kunkonda mundu kubhee jwammbone nnoongi jabhe kwa kwahobhalela Ayesu, wala ngabha kwa kutenda chiipalikwa na Malagilo. 29 Bholi, Annoongo nga Annoongo jwa Bhayahudi jikajabhe, au jwa bhandu bhanga Bhayahudi? Eloo, jwa bhandu bhanga Bhayahudi kabhele. 30 Annoongo nga jumo, na jonojwe apakwakondanga Bhayahudi kubhee bhammbone nnoongi jabhe kwa kuhobhalela kwabhenji, na bhandu bha hilambo yeengi apakwaakonda kwa kuhobhalela kwabhenji. 31 Bholi, ng'anikia kubhee tubhoa malagilo na kubheka kuhobhalela kongoni? Ngabha hopo! Kwa kuhobhalela kupaangana chenichela chichipalikwa na Malagilo.