1 Kila mundu apalikwa kwajeketelanga akanachilongola bha chilambo, kwa kubhee jwakwa mundu jwakombola kutawala handa Annoongo jwangaaleka atawale, Annoongo jika jabhe nga jwaapekeanga bhandu bhabhatawala machili ga kutawala. 2 Henela jwagakana mamulaka ga akaachilongola atendakana lilagilo lya Annoongo, na bhenaangota bhabhatendanga henela bhapakuhumulwa. 3 Bhatawala ngaatichianga bhandu bhenibhala bhabhatendanga gammbone ila bhabhatenda mabohu. Bholi, mpala nkotokwaajogopa jwabhi na mamulaka? Bahi ntendange genigala gagabhiile gammbone na jonjo apakunnumbalila mwenga, 4 kwa kubhee jonojwe nga antumichi jwa Annoongo jwaapangana mahengo ili kunnyatila mwenga. Nambo handa mpakupangana mabohu, mpalikwa kwaajogopa, kwa kubhee akolite uwecho gwa kunhukumula. Jonojwe nga antumichi jwa Annoongo, jwaalangia lilaka lyabhe kwa bhenibhala bhabhatenda mabohu. 5 Henela hipalikwa kwaajeketelanga bhabhabhilinge na ukolo, ngabha kwa kujogopa lilaka lya Annoongo lilipakuhika, ligongo ntendakumanyanga kubhee chenecho nga chammbone kupangana henela.

6 Kubhokana na genago mwangota ntendakulepanga kodi, kwa kubhee akaachilongola bhenabho bhaatumikila Annoongo pabhatenda lihengo lyabhenji. 7 Mumpekee kila mundu chibhapalikwa kupekewa. Handa ntendakulongwa kodi, nnepange kodi, handa nga uchulu, nnepange uchulu, jwapalikwa kujogopwa, mwaajogope, jwaapalikwa kutopewa, mwaatopee.

8 Nkotokulongwa na mundu joajola chilebhe choachela, ila tu nnongwange kupalananga. Kwa kubhee jwaampala nnyakwe, atekugajeketela Malagilo goga. 9 Malagilo gangani gagalobhola, "Nkotokutenda ngongola, nkotokukoma, nkotokujibha, nkotokulokolila na malagilo gangi goha," gabhile mu lilagilo limo, "Mwaapale ajinu handa chinchipala mwabhene." 10 Jwampala nnyakwe ngaatendela gabohu. Bahi, kupalana nga kujeketela Malagilo goha. 11 Bahi, mwangota ntendange henela, kwa kubhee mmanyanga muda gwa kujimuka kubhoka mulugono gutekuhika, na nangocheni kuokolewa kwitu kutekubhandikila muno kupunda penipala kandahi patukajemeka kuhobhalela. 12 Kilo chipetite na kutekuchee. Tuhilekange hikubho yoha hibohu hitutendite mulubhendu, tutendange hikubho yammbone ya panhana. 13 Tutende kwa kutopea handa bhandu chibhatama muhi, na ngabha kwa kulyee muno na kukolelwa, ngabha kutenda ulolohi na kulepela kuchihibhila kulokolila hilebhe hibohu, ngabha kwa bulwa na bwihu. 14 Bahi, ng'anikiange na kupangana handa Hangwana bhitu Ayesu Kilisito, nnekange kukagula kulokolila kubohu kwa mimele jinunji.