1 Akaalongo bhangu, panga lipamba mpakugamanyanga gangani gandenda kulongela, maana ndenda kulongolea na bhandu bhabhagamanyanga Malagilo ga Amusa. Malagilo gabhii na machili penipala mundu pabhabhee jwamomi. 2 Kwa kulandanikia, mwikege jwaatekulombwa atenda kutabhwa na Malagilo machobha goha hangwana bhabhe pabhabhee jwamomi, nambo hangwana bhabhe pabhapakujomoka, gena Malagilo ngabhee na machili kabhele kwa jono mwikege. 3 Henela bahi, handa jono mwikege apakulombwa na mwanalome jongi kongo hangwana bhabhe abhi tangu jwamomi, apakemwa alolohi. Nambo hangwana bhabhe handa ajomwike, jono mwikege ngatabhwa kabhele na Malagilo ga ulombela, na handa apakulombwa na mundu jongi ngakemwa alolohi. 4 Kwa ndela jojojo mwangota akaalongo bhangu, kabhele nkabhekwanga kutali na Malagilo na umundu gwinu gwa lolo pagukibha handa gutekujomoka pamo na Akilisito. Nangocheni mwangota nga bhabhe joni jola jwaayokite, twabhoa nga bhakwe ili tupangane hikubho yammbone ya kwaabhajila Annoongo. 5 Patukibha tutenda kutama handa chibhatamanga bhandu, kulikola kubohu kukajambukiwa na Malagilo kukatenda lihengo mu mmele jitu, na tukatenda hikubho hiitupeleka kujomoka. 6 Pena lolo tukatabhwa na Malagilo, nambo nangocheni tutekujomoka pamo na Akilisito, na henela tutekujogolekwa kubhoka mu Malagilo. Nangocheni ngantumikila Annoongo kwa ndela ja lolo ja kukamula Malagilo gagajandwike, nambo tutendakwaatumikila Annoongo kwa ndela jiyono ja kutandaikwa na Mboomo jabhe.

7 Bholi, ngocheni tulobhole chiniki, tulobholole Malagilo nga mabohu? Ngabha hopo! Nambo, panga Malagilo, nenga ngamanyitehopo mabohu nga chilebhe niki, kwa kubhee ngamanyitehopo kulokolila nga chilebhe niki handa Malagilo gakalobwilehopo, "Nkotokulokolila." 8 Nambo pangahimanya Malagilo haga, kulikolila kubohu kukejemeka kujimua nkati jangu, kwa kubhee panga Malagilo mabohu gangali machili. 9 Tangu nangagamanya Malagilo ndenditakutama handa chimbala, nambo panakagamanya Malagilo chigapala, nakamanya kubhee nenga nkola mabohu. 10 Nakagabhona genigala Malagilo gagaleta umomi, na Malagilo gatekunnetela hukumulo ja kujomoka. 11 Henela, mabohu gakandemba kwa ndela ja jene amuli na kunnetela hukumulo ja kujomoka.

12 Henela jilangia kubhee Malagilo gabhokite kwa Anoongo mwene. Malagilo genago nga gammbone kabhele gabhile handa chiipalikwa. 13 Bholi, chenichela chichibhii chammbone chitekunnetela hukumulo ja malilo? Hopo! Nambo ili mabohu gamanyike kubhee mabohu, gakaleta hukumulo ja kujomoka kupetela chenichela chichibhii chammbone, ili kwa ndela ja amuli, mabohu gakabhonekana pandaa kubhee gangali mmbone muno.

14 Tuhimanyi kubhee Malagilo nga hikubho ya chimboomo, nambo nenga nga mundu jika nakibha ndekuuchwa ku ubhanda bha mabohu. 15 Ngachimanya chinichitenda, kwa kubhee lyenilyela linilipala kutenda, ngalitenda, nambo chindendakuchichimwa nga chinichitenda. 16 Bahi handa ndenda kutenda lyenilyela nangalipala kutenda, nga kubhee ndendakoonda kubhee Malagilo nga gammbone. 17 Nambo, ngabha nenga nilitenda lyenilyela nangalipala ila nga genigala gabohu gagatama nkati jangu nga gaganyambukia nenga kupangana genago. 18 Niimanyi yakubhee nkati jangu, ngatama lilobhe lilibhii lyammbone, kwa kubhee hata ndendakupala kupangana chikubho chammbone, nambo ngakombola kulitenda. 19 Lyenilyela lyammbone linilipala, ngalitenda, ila lyenilyela libohu lyanangalipala nga ndenda kupangana. 20 Bahi handa ndenda kupangana lyenilyela nangalipala kupangana, ngabha nenga kabhele jumbangana henela, ila nga genigala mabohu gagatama nkati jangu.

21 Bahi, ndekumanya penipala pambala kupangana chikubho chammbone, chikubho chichibhii chibohu nga chindenda kuagula. 22 Malagilo ga Annoongo ndendakugapala kwa ntima gwangu goa. 23 Nambo ndekumanya kubhee nkati jangu kubhii na Malagilo gangi gagapwatilana na kuganikia kwangu kwammbone, Malagilo genago gandenda nenga kubhee abhanda bha mabohu mu mmele gwangu. 24 Chikubho chenecho chinyambukia nenga kuhechuka muno! Nga aganiki jwambakulamia kubhokana na gongo mmele gwa malilo? 25 Ndendakwaachukulu Annoongo kwa ndela ja Ayesu Kilisito, Hangwana bhitu!

Henela nga chimile, nenga namwene kwa luunda lwangu, ndendakutumikila Malagilo ga Annoongo, nambo kwa umundu gwangu ndendakuhuutwa kupangana mabohu.