1 Bahi, aganja handa ntenda kwaahukumula bhandu bhangi, ngombola kuchitetela, hata nkibha mwenga nga aganiki. Kwa kwaahukumula bhangi, ntenda kuchihukumula mwe mwachinabhene kwa kubhee namwenga ntenda galagala chinhukumula bhangi. 2 Tuhimanyi kubhee hukumulo ja Annoongo kwa bhenibhala bhabhatendanga hikubho handa yeneyo nga hukumulo ja kweli. 3 Nambo mwenga chintendakwahukumulanga bhenibhala bhabhatenda hikubho handa yeneyo kubhee na kongo mwenga ntenda helahela, bholi ng'anikia mpakuchibheka kutali na hukumu ja Annoongo? 4 Au mwenga ntenda kugubhelua umbone nkolongwa gwa Annoongo, kuchitimalika kwabhe na kulendela kwabhe, nkoto kuhimanya kubhee umbone gonogwe gwa Annoongo gutenda kunhuta nkombole kuleka mabohu na kwaatendebhukila Annoongo. 5 Nambo mwenga ngajoa na ntendakana kuleka mabohu. Ntendakuchibhekela lilaka, kwa lichobha lyela lya lilaka na uhunukulo gwa hukumu ja kweli ja Annoongo pajipakulangikwa. 6 Lichobha lyenelyo Annoongo apakwaalepa kila mundu kubhokana na hikubho yabhe. 7 Annoongo apakumpekeannga umomi gwa machobha goa gwangapela, bhenibhala bhabhachitahidi kutenda gammbone, kwakubhee bhalolea kutopewa na ukolo na umomi gwangapela. 8 Nambo bhenibhala bhangi bhabhabhilinge na uchinabhene, bhabhii na kukananga hikubho ya kweli na kukagula ubohu, Annoongo apakwatumbalila na kwaalagianga handa chiipalikwa. 9 Kupakubhee kulaga na kubhina kwa mundu joajola jwaatenda mabohu. Kupakwaapatanga Bhayahudi oti na kabhele kwa bhandu bhanga Bhayahudi. 10 Nambo Annoongo apakwatendanga bhalumbalilwe na kwatenda bhatopelwange na kutongamanika kwa bhenibhala bhabhatendanga gammbone, Bhayahudi oti, kabhele bhandu bhanga Bhayahudi, 11 kwa kubhee Annoongo atendakuhukukumula bhandu henela chiipalikwa. 12 Bhandu bhoa bhanga Bhayahudi bhabhatendanga gabohu panga kugamanya Malagilo ga Amusa bhagapekiwe na Annoongo bhapakuhumulwanga hata handa ngamanyanga Malagilo genago. Na bhenibhala bhandu bhabhatendanga gabohu kongo bhagamanyanga Malagilo ga Amusa bhapakuhukumulwa kupetela Malagilo genago. 13 Ngabha bhenibhala bhabhajohanga Malagilo nga bhabhakondekwa na Annoongo. Nambo bhenibhala bhabhagakamula na kujeketela Malagilo nga bhabhakondekwa na Annoongo kubhee bhammbone. 14 Bhandu bhanga Bhayahudi bhakwetingehopo Malagilo, nambo pabhatendanga kwa hikubho hiipalikwa mu malagilo, bhenabho akaachinabhene bhatendakubhee malagilo hata handa bhagamanyaopo malagilo ga Amusa. 15 Hikubho yabhenji hilangia kubhee gagapalikwa mu malagilo gatekujandikwa mu mitima yabhenji. Mu mitima jabhenji jilangia handa jenejo nga kweli, kwa kubhee kuganikia kwabhenji kutenda kwalangia handa bhatendanga gammbone au bhatendanga gangali mmbone. 16 Henela, kagulana na jenje Ngani Jammbone jinitendakuntangachianga, nga chiipakubhee machobha gala Annoongo pabhapakuhukumula hikubho ya bhandu hiitekuchiiya, kwa ndela ja Ayesu Kilisito.

17 Mwenga mwabhene nchikema Anyahudi, ntenda kugakulupalila Malagilo na kuchipunila kubhee mundu jwa Annoongo, 18 kwa kujiganwa na malagilo mugamanyi gabhapala Annoongo na nkombola kuhagula chikubho chichipalikwa kupanganwa, 19 mwenga nchibhona kubhee anachilongola bha bhabhangalola na nhana kwa bhenibhala bhabhabhile mu lubhendu, 20 nchibhona kubhee bhannyigana bha akaajinga na bhannyigana bha bhenibhala bhandu bhangamanyanga ukweli gwa kuhobhalela, kwa kubhee mmi na umanyo gwa ukweli gwa malagilo genago. 21 Bahi, mwenga ntenda kwajigana bhangi, kwa niki ngachijigana mwachinabhene? Ntenda kwatangachianga bhangi bhakoto kujibha, nambo mwabhene ntenda kujibha? 22 Mwenga nnobhola, "Nkoto kutendanga ngongola," na kongo mwenga ntenda hela hela, ntenda kuhichimwa hidimu ya minnoongo kongo mwenga mwabhene ntenda kujibha hilebhe kubhoka mu nyuumba ya kuchalila minnoongo jenejo? 23 Ntendakuchilumbalila kubhee nkweti Malagilo ga Annoongo, nambo ntendakwaabhelua Annoongo kwa kuleka kujeketela Malagilo gabhe? 24 Majandiko ga Annoongo galobhola, "Bhandu bha hilambo yeengi bhatendakwatukana Annoongo ligongo linunji Bhayahudi." 25 Kuhinwa kwinu kupakubhee kwammbone handa mpakugakamula malagilo, nambo handa ngakamulanga Malagilo, mbaya nkatamitinge panga kuhinwa. 26 Handa mundu jwanga Anyahudi jwangahinwa handa atamite kwa kukagula Malagilo ga Amusa, Annoongo atendakwaakonda handa atekuhinwa. 27 Bhandu bha hilambo yeengi bhapakunhukumula mwenga mwa Anyahudi handa nnekite kugakagula malagilo, hata handa nkweti majandiko ga malagilo na ntekuhinwa, nambo bhenaangota bhatenda kugajeketela malagilo kongo bhabhi bhangahinwanga. 28 Henela, ngabha kila mundu jwaabhelikwe na Anyahudi apakubhee Anyahudi bha kweli na mundu ngakombola kubhee Anyahudi bha kweli kwa kuhinwa payega. 29 Mundu jwaakondekwa nnoongi ja Annoongo nga jonijola jwaatenda gabhagapala jonojwe, na kuhinwa kwa kweli nga konikola kukutendwa muntima na Mboomo ja Annoongo ngabha kwa kukagula Malagilo. Mundu handa jonojwe atendakulumbalilwa, ngabha kubhoka kwa bhandu, nambo kubhoka kwa Annoongo.