1 Bahi, tweenga tutubhile tututekomala mu kuhobhalela tupalikwa kwaajangatila bhenibhala bhangakomala mu kuhobhalela. Tukotokuchilola twenga akaachinabhene tu. 2 Tupalikwa kwaajangatila bhangi kupangana hikubho yammbone, ili kwatendanga bhakolange mu kuhobhalela. 3 Hata Akilisito jwangachibhajila mweene, ila handa chijijaandikwe mu Majandiko ga Annoongo, "Kokoleka kubhatekunkokolekea mwenga kumbatite nenga." 4 Goha gagatekujandikwa mu Majandiko ga Annoongo, gatekujandikwa ligongo lya kutujigana tweenga ili kubhee kwa kulekelelwa ntima na kuhachukanga tutukupatite kubhoka mu Majandiko ga Annoongo ili tukombole kuhobhalela. 5 Annoongo mwene nga jwaatujangatila tubhee bhakuhimbalila na nga jwaatutenda mitima jitu jipole, henela ndendakunyopelanga ili Annoongo antendange kutama mu chibhoga chimo ligongo ntendakwakahgula Akilisito Yesu, 6 ili mwangota mwabhoa, kwa pamo na kwa lilobhe limo, mwaalumbalile Annoongo na Atati bha Hangwana bhitu Ayesu Kilisito.

7 Bahi, mpokelanange mwangota kwa mwangota, handa Akilisito chibhampokelanga mwangota ili kwaaletela Annoongo ukolo. 8 Ndendakunnobholelanga, Akilisito akaatumikilanga Bhayahudi ili kulangia ukweli gwa Annoongo, na genigala gabhakalobhola Annoongo kubhee apakwapekeanga akanahota bhitu gapate kweela, 9 kabhele ili bhena bhandu bhanga Bhayahudi bhakombolange kwaalumbalila Annoongo ligongo lya kiha jabhe. Handa chigalobhola Majandiko ga Annoongo,

"Henela mbakunnumbalila mwenga pakati ja bhandu bhanga Bhayahudi.

Mbakujemba mijembo ja kunnumbalila."

10 Kabhele Majandiko ga Annoongo galobhola,

"Nhachukange mwa bhandu mwanga Bhayahudi,

nhachukange pamo na bhandu bhabhe."

11 Kabhele,

"Mwangota bhandu mwanga Bhayagudi, mwalumbalile Hangwana,

mwe bhandu bhoa, mwaalumbalile Hangwana!"

12 Kabhele alondohi Aisaya alobhola,

"Apakupitila mundu mu chibhelei cha Ayese,

jonojwe apakwatawala bhandu bha hilambo yoa,

na bhandu bhanga Bhayahudi bhapakwakulupalila kubhee jonojwe apakwahokoanga." 13 Annoongo nga jwaakulupalilwa, ampekeange kuhachuka kujingi na kuhengwa kubhokana na kuhobhalela kwinu, ili kulupalila kwinunji kukombole kujonjokeka kwa machili ga Mboomo ja Annoongo.

14 Akaalongo bhangu, nenga namwene ndendakuhobhalela kubhee mpangananga hikubho hijingi yammbone, na mmilinge na umanyo nnyingi, kabhele nkombolanga kujigananga mwakaachinabhene. 15 Nambo ndekunyandikilanga kwa ngani ja hikubho hijingi pangali bhoga, ili konkombokeanga kwa ngani ja umbone gwa Anoongo gubhatekumbekea, 16 gwa kubhee antumichi bha Ayesu Kilisito kwa bhandu bhanga Bhayahudi. Lihengo lyangu lya chikung'i kujitangacha Ngani Jammbone ja Annoongo ili bhandu bhanga Bhayahudi bhakombolange kubhee mbeeko jikondekwa na Annoongo, mbeeko ligongo lya Annoongo bhabhatekuhagulikwa na Mboomo ja Annoongo. 17 Henela mu kulondanika na Ayesu Kilisito, ngombola kuchipunila lihengo lyangu ligongo lya Annoongo. 18 Ngapalikwa kulobhola chilebhe choachela kupunda chenichela yakubhee Akilisito achitendite kwa kunagia nenga ili bhandu bhanga Bhayahudi bhakombolange kwaakonda Annoongo. Bhatekutenda henela kwa malobhe na hikubho, 19 kwa machili ga kupangana hilolelo na yakangachika, na kwa ukolo gwa Mboomo jwa Annoongo. Bahi, kwa kujaula koha koha, kubhoka konikola ku Yelusalemu mpaka kuchilambo cha Iluliko, ndekutangacha maha Ngani Jammbone ja Akilisito. 20 Lihengo lyangu litekubhee kujitangacha Ngani Jammbone penipala yakubhee bhandu bhangakombolanga kujoanikia kwa ngani ja Akilisito, mbangana henela ili ngoto kubhujila kujemeka lihengo penipala yakubhee mundu jongi atekupangana. 21 Nambo handa Majandiko chigatekujandikwa,

"Bhandu bhoa bhabhangalobholelwanga ngani jabhe bhapakulola,

na bhenibhala bhabhangakombolanga kujoa bhapakumanyanga."

22 Kubhokela na genago mala hijingi nikakanikiwa kuhika kwaachinunji. 23 Nambo nangocheni ndekujomola lihengo lyangu mu hilambo heye ngocheni mbala kuhika kwaachinunji handa chiindekulokolila kwa yaaka hijingi, 24 ndendakulupalila kuntyangilanga mwangota penipala pambakubhee mu ulendo kujaula ku Hisipania. Na mbakubhee na mwangota kwa muda nchoko. Mbakuhachukanga na mwangota, penapo mbakujangatilwa na mwangota mu ulendo gonogwe. 25 Nambo nangocheni, ndenda kujaula kupangana lihengo lya Annoongo kwa bhandu bhanga Bhayahudi bha konokwe ku Yelusalemu. 26 Kwa kubhee malubhalo ga bhandu gagaahobhalela Akilisito bha chilambo cha ku Makedonia na ku Akaya, gatekuamua kubhoa nchango gwabhenji kwaajangatila bhandu bha Annoongo bhabhabhile akaahocho, konokwe ku Yelusalemu. 27 Bhenaangota bhatekuamua kutenda henela, nambo kwa kweli, lyenelyo nga lihengo lyabhenji ligongo lya bhena bhandu bhanga Bhayahudi, kwa maana, handa bhandu bhanga Bhayahudi bhatekupatanga gammbone ga Bhayahudi, bhapalikwa kabhele kwaatumikilanga Bhayahudi mu hilebhe ya pammele hibhaipalanga. 28 Pambakujomola kutenda lihengo helyo na kwaapekeanga nchango gonogwe gugutekukumbwa ligongo lyabhenji, mbakuntyangilanga mwangota pambakubhee nndela kujaula kuchilambo cha ku Hisipania. 29 Ndenda kuhimanya yakubhee handa mbakuhika kwaachinu Akilisito apakuntendelanga hikubho hijingi yammbone.

30 Bahi, akaalongo bhangu, ndendakunnyopanga kwa lina lya Hangwana bhitu Ayesu Kilisito na kwa upaliho guguletwa na Mboomo jwa Annoongo, nchilondanikange na nenga mu kunyopela kwa Annoongo. 31 Choonde nnyopange ili ngombole kubhoka pangali kuulala pakati ja bhenibhala bhandu bhabhangahobhalelanga Ayesu bhabhabhile ku Yudea, na lyene lihengo lyangu likombole kondeekwa na bhandu bha Annoongo bhabhabhile konokwe ku Yelusalemu. 32 Handa apalite Annoongo mbakuhika kwaachinu kwa ntima gwa kuhachuka, ngapomolele pamo na mwangota. 33 Ndenda kwajopa Annoongo jwaaletite kuhengwa abhee pamo na mwangota mwabhoa. Na hibhee henela.