1 Nangocheni, kwa kubhee tutekondekwa nnoongi ja Annoongo kwa kuhobhalela, mmangange na kuhengwa na Annoongo kwa ndela ja Hangwana bhitu Ayesu Kilisito. 2 Kwa kwahobhalela Ayesu, Annoongo atupekie umbone gwabhe. Nangocheni tutendakutama mu umbone gwabhe. Tutendakuhangalala muno kwa kubhee tutendakulupalila kubhee tupakubhee pamo na Annoongo mu ukolo gwabhe. 3 Ngabha henela tu, ila tutenda kuhangalala kabhele mu kulaga, ligongo tuhimanyi kubhee kulaga kuleta kwanga kujogopa, 4 kwanga kujogopa kututenda tubhee na machili ga kuhobhalela na machili ga kuhobhalela galeta kuhobhalela, 5 kulupalila konokwe ngatuhengela ntima, ligongo Annoongo atekutupekea mu mitima jitu upalyo gwabhe kupetela Mboomo ja Annoongo.

6 Patukalepela kuchihokoa akaachinabhene, nambo machobha pagakahika, Akilisito akawee ligongo litu twenga tutubhii na mabohu. 7 Kweli, nga kulimba muno mundu joajola kuwee ligongo lya mundu jwammbone, nambo itendakomboleka mundu kujiga kuwee ligongo lya mundu jwaatenda hikubho yammbone. 8 Nambo Annoongo atekulangia upalyo gwabhe kwaachitu kubhee, patukibha na mabohu, Akilisito akawee ligongo litu. 9 Nangocheni tutekondekwa nnoongi ja Annoongo kwa ndela ja mayahi ja Akilisito, jilangia pandaa kweli kubhee apakutuokoa mu lilaka lya Annoongo. 10 Patukibha tangu akaapwati bha Annoongo, Annoongo akatutenda tukamulane mabhoko na jono kwa malilo ga mwana jwabhe, na patupakujomola kukamulana mabhoko na jono apakutuokoa kwa ndela ja umomi gwabhe. 11 Pamo na genago, tutenda kuhangalala kwa Annoongo kupetela Hangwana bhitu Ayesu Kilisito yakubhee atutendite tukamulane mabhoko na Annoongo.

12 Henela, kupetela mundu jumo bhandu bhoa bhatendakubhelekwa na mabohu na kwa mabohu genago bhandu bhatendakujomokanga. Kujomoka kutekwaahikila bhandu bhoa, kwa kubhee bhoa bhatenditinge mabohu. 13 Tangu ja kuhika Malagilo ga Amusa pachilambo, mabohu gakibha pachilambo. Nambo handa gakwa Malagilo, mabohu gangamanyikana handa mabohu. 14 Hata henela, tangu machobha ga Aadamu mpaka machobha ga Amusa, kujomoka kukibha kwa bhandu bhoa hata kwa bhenibhala bhangatendanga mabohu handa henela Aadamu pabhakaabhelua Annoongo, yakubhee akibha atekulandana na jonijola jwapakuhika. 15 Nambo kulemwa kwa Aadamu ngakomboleka kulandana na ngwahupa ja Annoongo. Handa ikibha kulemwa kwa jonijola mundu jumo bhajingi bhakajomokanga, kupunda muno umbone gwa Annoongo, na uwecho gugubhii mu umbone gwabhe Ayesu Kilisito gutekupunda ligongo lya bhenibhala bhajingi. 16 Kutekubhee na kulekanilana pakati ja ngwahupa ja Annoongo ngalandana na mabohu ga mundu jola jumo. Kwa kubhee pabhakalemwa mundu jumo, Annoongo akaahukumula, nambo pabhakalemwanga bhandu bhajingi, Annoongo akaapekeanga ngwahupa jabhe kwa kwatenda bhakondekwange. 17 Kweli, kwa mabohu ga mundu jumo, bhandu bhakajemeka kujomoka ligongo lya jonijola mundu jumo, nambo, nga kweli kubhee chibhakachitenda jonijola mundu jumo, yakubhee nga Ayesu Kilisito, nga chammbone muno. Bhoa bhapokelanga umbone gonogwe na ngwahupa jenejo ja kondekwa nnoongi ja Annoongo, bhapakutawalanga mu umomi kwa ndela ja jono jumo, Ayesu Kilisito. 18 Henela, handa kulemwa kwa mundu jumo kukaleta kuhumulwa kwa bhandu bhoa, hela hela chikubho chammbone chibhatendite mundu jumo chitekwaatendanga bhandu bhoa bhakondekwange nnoongi ja Annoongo na kutupekea ngwahupa ja umomi. 19 Kuleka kujeketela kwa mundu jumo bhandu bhajingi bhakabhonekena kubhee bhakolite mabohu, hela hela kujeketela kwa mundu jumo kupakwaatenda bhajingi bhakondekwange nnoongi ja Annoongo. 20 Malagilo ga Amusa pagakaletwa gakajambukia kujonjokeka mabohu. Nambo mabohu pagakajonjokeka, umbone gwa Annoongo gukajonjokeka muno. 21 Handa henela mabohu pagakibha na machili kwajambukianga bhandu kujomoka, hela hela na umbone gwa Annoongo gutendakwatendenga bhandu bhakondekwange nnoongi ja Annoongo na kwaletelanga umomi gwa machobha goha gangapela kwa ndela ja Ayesu Kilisito Hangwana bhitu.