1 Ndenda kulobhola kweli mu Kilisito Ayesu, wala ngalongela unami, Mboomo ja Annoongo atendakulangia mu ntima gwangu kubhee ndendakutandaikwa na Mboomo jabhe, 2 nambo ntima gwangu gutendakumina muno kwa hibhini yangajomoka. 3 Ngambola kulokolila hata nenga kulaaniwa na kubhekwa kutali na Akilisito ligongo lya akaalongo bhangu kwa mmele, 4 nga bhandu bha ku Isilaeli yakubhee Annoongo atekwaagula bhabhee bhana bhabhe, atekwahunukulila gonigola ukolo gwa Annoongo, gonigala gubhakalagananabho, na bhabhakaapekea Malagilo gabhe, na bhabhakaajigana namuna ja kwajopa na hilebhe hijingi hibhakaalobholela kubhee apakwapekea. 5 Bhena Bhaisailaeli nga ubhelehi gwa hiyokolo, yakubhee kubhoka kwabhenji Kilisito akahika handa mundu, jonojwe yakubhee nga Annoongo jwaabhii panani ja yoha, jwaalumbalilwa machobha goha pangapela! Na hibhee henala.

6 Ngalongela kubhee Annoongo atekulepela kwapekeanga genigala gaatekwalobholelanga kubhee apakwapekeanga, kwa kubhee ngabha bhandu bhoa bha ku Isilaeli nga bhabhatekuagulikwa na Annoongo. 7 Ngabha hibhelei yoa ya Aaibulahimu nga bhana bhabhe bha kweli. Nambo, handa chigalobhola Majandiko ga Annoongo, "Hibhelei yakwe ipakubhokana na Aisaka." 8 Jenje jilangia kubhee, ngabha bhenibhala bhabhabhelekwa handa bhandu bhangi chibhabhelekwa, ila nga bhana bhabhabhelikwe handa henela Annoongo chibhalongile. 9 Nambo chenichela chibhalongile Annoongo nga chenjeni, "Mbakubhuja kabhele machobha handa gangani manicha, na Asala apakubheleka mwana mwanalome."

10 Ngabha henela jika, hela hela Alebeka na jono apakubheleka mabhela kwa atati jumo, nga atati bhitu Aisaka. 11 Nambo, ili Annoongo abhonekane kubhee abhii na ukolo gwa kuagula, hata tangu bhenibhala bhana bhangabhelekwa na kombola kulimanya lyammbone na libohu, 12 Alebeka akalobholelwa kubhee jonijola mwana kwa kujemeka apakuntumikila jonijola nchoko. Henela kuagula kwa Annoongo kukagulana handa chibhakema mwene, na ngabha hikubho ya mundu. 13 Handa Majandiko ga Annoongo chigalobhola, "Ndekubhajilwa na Ayakobo, nambo Aesau nakaachimwa."

14 Bahi, tulobhole chiniki? Bholi, Annoongo ngatenda chiipalikwa? Hopo! 15 Annoongo akaalobholela Amusa, "Mbakwabhonela kiha mundu joajola jumbala kwabhonela kiha, mbakwalolea kiha joajola junaapalite." 16 Henela, genago goa kulupalila kiha ja Annoongo, ila ngabha chibhapala mundu. 17 Majandiko ga Annoongo galobhola henela kwa ngani ja Afalao, "Nakantenda amwenye ili kupetela mwenga, naangie machili gangu, na lina lyangu litangachwe pachilambo poha." 18 Bahi, handa nga henela, Annoongo atendakwabhonela kiha mundu joajola jwaapala kwaabhonela kiha, kabhele handa apaalite kuntenda mundu abhee mitahu atenda henela.

19 Komboleka upakungonya, "Handa nga henela, bahi kwa niki Annoongo atenda kutukokoleka? Nga aganiki jwaakombola kukana genigala gabhapala Annoongo?" 20 Nambo, mwe mwamundu, mwe mwa aganiki hata mpala kwaakonya Annoongo? Bholi, chibhega chikombola kwaakonya jwaabhomba, "Kwaniki utekunhalakia henela?" 21 Jwaabhomba hibhega akombola kugutumia undopi handa chibhapala na kubhomba hibhega hibhele kwa undopi golagola, chimo chibhee chakutopea na chengi chibhee changammbone.

22 Henele nga chiibhile kwa Anoongo. Akapala kulangia lilaka lyabhe na kulangia ukolo gwabhe. Bahi, akibha atendakulendela kwa kuimbilianga bhenibhala bhabhakapalikwa kongana na lilaka lyabhe bhenibhala bhandu bhabhakapalikwa komekwa. 23 Annoongo akapala kabhele kulangia kujimbika kwa ukolo gwabhe jwaakapala kutubhonela kiha, twenga jwaatekutubheka ili tubhee pamo na jonojwe mu ukolo gwabhe. 24 Twenga nga bhenabho jwaatekutukema, ngabha kubhoka pakati ja Bhayahudi tu ila kabhele kubhoka kwa bhandu bhanga Bhayahudi. 25 Handa henela Annoongo chibhalobhola mu chitabu cha alondohi bha Annoongo Ahosea,

"Bhenibhala bhabhakibhanga, ‘Ngabha bhandu bhangu,’

mbakwaakema, ‘Bhandu bhangu!’

Na jonojwe, ‘Ngampala’

mbakunkema, ‘Junampala!’

26 Na penipala pabhalobholilwe,

‘Mwangota ngabha bhandu bhangu’

penapo bhapakemwa,

‘Bhana bha Annoongo bhabhabhii bhamomi.’"

27 Nabhena alondohi Aisaya akakwea lilobhe kwa ngani ja Bhaisilaeli, "Hata handa hibhelei ya ku Isilaeli nga hijingi handa nhanga gwa kumbwani, nga bhachoko jikajabhe bhabhapakuokolewa, 28 kwa kubhee Hangwana apakuchihukumula chilambo choa pangali kukabha." 29 Handa alondohi Aisaya pabhakalobhola pena kandahi, "Hangwana jwaabhile na uwecho goa handa akatuleekilehopo bhana bhangi bha ku Isilaeli, tukajomwike handa ku Sodoma, na tukajomwike handa ku Gomola."

30 Bahi tulobhole niki? Bhandu bhanga Bhayahudi bhangaloleanga kondekwa na Anoongo, nambo bhakombwile kondekwa kwa ndela ja kuhobhalela, 31 kongo bhandu bha ku Isilaeli yakubhee bhakaloleanga kwa machili Malagilo ga kwaatenda bhakondekwe na Anoongo kupetela Malagilo, nambo bhangakondekwanga. 32 Kwaniki? Ligongo bhakakulupalila hikubho yabhenji na ngabha kuhobhalela. Bhandu bha ku Isiaeli bhabhilinge handa bhandu bhabhakobhanduka paliganga lyela lya kobhanduka. 33 Handa chigalobhola Majandiko ga Annoongo,

"Ndendakubheka konokwe ku Sayuni liganga lya kobhanduka,

mwala gugupakutenda bhandu bhagwee.

Nambo jwaapakwahobhalela ngabhona honi!"