1 Akaalongo bhangu, chimbala muno mu ntima gwangu, na kujopa kwangu kwa Annoongo nga ligongo lya Bhaisilaeli ajangu, bhaokolewange. 2 Kwa kubhee ngombola kulangia kupetela bhenaangota bhabhatenda kuchibhoanga muno kwaalolea Annoongo, nambo kuchibhoa konokwe ngabhokana na umanyo gwa kweli gwa Annoongo. 3 Bhenaangota bhangahimanyanga henela bhandu chibhakondekwa na Annoongo. Bhandu bhatekujiga kujemeka ndela jabhenji akaachinabhene na henela bhaikondangahopo ndela jenejo jijaatendanga bhandu bhakondekwe na jonojwe. 4 Akilisito pabhakahika atekugatenda Malagilo gakotokubhee chilebhe cha kulupalilwa kwa kwaatenda bhandu bhakondekwe na Annoongo ila bhandu bhakondekwa na Annoongo kwa ndela ja kwaahobhalela Akilisito.

5 Amusa atekujandika kwa ngani ja kondekwa na Annoongo jijibhokana na Malagilo kubhee, "Mundu joajola jwaapangana chiipalikwa na Malagilo apakutama kwa kukagula Malagilo genago." 6 Nambo kwa ngani ja kondekwa na Annoongo kwa ndela ja kuhobhalela, jitekujandikwa henela, "Nkotokulobholanga muntima gwinu, nga aganiki jwapakujenda mpaka kunani kwa Annoongo? Kulobhola henela nga handa kwaaleta Kilisito pahi, 7 au nga aganiki jwapakutuluka kujaula kwa bhabhawilinge?" Kulobhola henela nga handa kwaaleta Akilisito kubhoka kuchilambo cha bhabhawilinge. 8 Majandiko ga Annoongo gatendakulobhola henela, "Lyenilyela lilobhe lya Annoongo libhii kubhandikila na mwenga, libhile mu kang'wa na mu ntima gwinu." Na konokwe nga konikola kuhobhalela kututenda kutangacha. 9 Handa mpakulobhola kwa malobhe ginu mweene kubhee Ayesu nga Hangwana na kuhobhalela muntima gwinu kubhee Annoongo akaayoha, mpakuokoka. 10 Kwa kubhee mundu jwatenda kuhobhalela kwa ntima gwabhe atendakondekwa na Annoongo na handa apakulobhola kwa kang'wa jakwe kubhee Ayesu nga akolo, mundu jonojwe apakuokolekwa. 11 Handa chigalobhola Majandiko ga Annoongo, "Kila jwaahobhalela Ayesu ngatendwa kubhee na honi." 12 Ngani heje nga kwa bhandu bhoa, kwa kubhee kwaakwa kulengania pakati ja Bhayahudi na bhanga Bhayahudi, jonojwe nga Hangwana bha bhandu bhoa, jwabhii jwammbone kwa bhoa bhabhaajopa, 13 kwa kubhee Majandiko ga Annoongo galobhola, "Kila mundu jwapakwaakema Hangwana kwa kupala kujangatilwa, apakuokolewa."

14 Nambo bhapakwaajopa bholi bhenabho kongo bhabhi ngaahobhalela? Kabhele bhapakombola bholi kwaahobhalela bhenabho bhangannyoanga? Bhapakwaajohanikia bholi panga kutangachiwa na bhandu? 15 Na bhandu bhapakutangacha bholi handa bhangalagilwanga? Handa chigalobhola Majandiko ga Annoongo, "Nga chikubho chammbone muno kuhika kwa bhenibhala bhandu bhabhatangachanga Ngani Jammbone!" 16 Nambo ngabha bhandu bhoa bhabhapokile Ngani Jammbone. Jenje nga maana alondoi Aisaya alobhola, "Hangwana, nga aganiki jwahobhalile ngani jitu?" 17 Henela bahi, kuhobhalela kujemekela kwa kujoanikia Ngani Jammbone, na jene ngani jitenda kubhokana na lilobhe lya Kilisito.

18 Nambo ndendakukonya, bholi, bhangajijoha jene ngani? Kweli, bhakajijohanikia, handa Majandiko ga Annoongo chigalobhola,

"Bhandu bhatekutangacha Ngani Jammbone pachilambo poha,

na bhandu bhatekujoanga Ngani Jammbone pachilambo poha."

19 Nanenga ndendakukonya kabhele, komboleka bhandu bha ku Isilaeli bhangahimanyanga? Kubhee Amusa bhene nga bhabhakajemeka kujangula,

"Mbakwaatenda mwabhonelange bwihu,

bhandu bhanga bha chilambo changu,

mbakuntendanga mmi na lilaka,

bhandu bha chilambo cha bhandu bhabhangamanyanga chilebhe." 20 Kabhele alondohi Aisaya atendakulobhola panga bhoga

"Bhenibhala bhandu bhanganolea bhatekumbata,

ndekuchilangia kwabhenji kwa bhabhangakonyekea nenga." 21 Nambo atenda kulobhola kwa ngani ja bhandu bha ku Isilaeli,

"Muhi joha nakaapembeleanga bhandu bhangu bhakamulane mabhoko nanenga nambo bhakakananga kungagula bhenabho bhakibhanga mitau."