1 Bahi ndendakonya, bholi, Annoongo bhatekwaakananga bhandu bhakwe? Hopo! Nenga namwene nga mundu jwa ku Isilaeli, kabhele ubhelei gwa Aaibulahimu kubhoka likabila lya Abenjamini. 2 Annoongo bhangakananga bhandu bhakwe, yakubhee bhenabho bhakaamanyanga kubhoka kandahi. Bholi, ngamanyaga genigala majandiko gagaakongolela alondohi Aelia? Henela chibhakaakokolekela Annoongo kwa ngani ja bhandu bha ku Isilaeli, 3 Aelia akalobhola, "Hangwana Annoongo, bhena bhandu bhatekwaakoma akaalondohi bhinu na kuibomolana pakubhokea mbeeko, nanenga ndekuhigalila jika jangu, na bhenaangota bhapalanga kungoma." 4 Nambo Annoongo akaalobholela, "Ndekuhigalilwa na bhandu elupu chaba bhabhangatindibhala majungwa kwaachalila Baali jwabhakaakema Annoongo." 5 Henela nga chiibhile nangocheni, bhabhile bhabhatekuagulikwa bhangi kwa umbone gwa Annoongo. 6 Handa bhatekuhagulikwa kwa umbone gwa Annoongo, na ngabha kwa kulola hikubho yabhenji hibhatekuhitendanga. Handa Annoongo bhakaagulanga kwa kupetela hikubho ya bhandu hibhatekuhitendanga, penapo umbone gwabhe gukabhiihopo umbone kabhele. 7 Tulobhole chiniki nangocheni? Chenichela chilebhe chibhatekuchilolea bhandu bha chilambo cha ku Isilaeli bhangachipatanga, nambo bhabhatekuagulikwa bhakachipatanga na bhandu bhangi bhabhakahigalila bhakatendekwa bhakotokuelewanga ngani ja Annoongo, 8 handa chijikaajandikwa mu Majandiko ga Annoongo, "Annoongo bhakabhatendanga handa bhandu bhabhatekugoloka, akabhapekea miho nambo bhakotokulola, na machikilo nambo bhakoto kujoanikianga mpaka leleni." 9 Kabhele Adaudi akalobhola,

"Lichobha lyabhenji likolongwa lya kulyee chakulya libhee ntambo gwa kwaatangilanga,

Bhagwelange na kupotekwa. 10 Macho gabhenji galekelelwe lubhendu ili gakoto kulola.

Ming'ongo jabhenji jipende kwa kulaga machobha goa."

11 Bahi, ndendakonya, Bholi, penipala Bhayahudi pabhakakobhanduka na kugwee, bholi ngakombolanga kujema kabhele? Hopo! Nambo ligongo lya kulemwa kwabhenji, kuokolewanga kutekwaahikilanga bhandu bhanga Bhayahudi, ili kwaatendanga Bhandu bha chilambo cha ku Isilaeli bhabhonange bwihu. 12 Bahi, kwa kulemwa kwabhenji Bhayahudi kutekwaatendanga bhandu bha hilambo yengi bhapanganikiwe gammbone. Kabhele kwa kulemwa kwabhenji kwa ngani ya chimboomo kutekuleta kupanganikiwa hikubho hiijingi yammbone kwa bhandu bhanga Bhayahudi, bholi Bhanyahudi bhajingi handa bhapakwaabhujila Annoongo, bahi jitekulangia kubhee Bhayahudi bhajingi bhatekupanganikiwa gammbone gajingi.

13 Nangocheni ndendakulobhola na mwangota bhandu mwanga Bhayahudi. Kwa henela ndekubhee andundame kwa bhandu bhanga Bhayahudi, ndendakuchipunila lihengo lyangu, 14 ili kwaatendanga Bhayahudi akaajangu bhabhabhonelange bwihu henela ngombole kubhaokoanga bhangi. 15 Handa kanikwa kwabhenji kukatenda bhandu bha pachilambo bhakamulane mabhoko na Annoongo, hipakubhee bholi pabhapakondekwa na Annoongo? Ipakubhee bholi penipala pabhapakoondekwa na Annoongo? Bhabhawilinge bhapakuyokanga!

16 Handa chipande cha kujemeka cha nkate chichibhokita kwa Annoongo, bahi nkate goha gupakubhee gwa Hangwana Annoongo, kabhele handa mikega ja mikongo jibhokita kwa Hangwana, na nyaambi jakwe jibhee nga ja Hangwana. 17 Penapo nyaambi yengi ya nkongo gwa nzeituni kubuchitani hikaheketwa, na maali pakwe nyaambi ja nzeituni gukapandikilwa. Mwangota bhandu bha hilambo yengi ntendakulandana na nyaambi lya nkongo gwa nzeituni gwa kumanyahi, na nangocheni ntendakutumia machili na malelalela ga nzeituni kubuchitani. 18 Bahi, nkotokwabhelua bhenibhala bhabhatekuheketwa handa nyaambi. Handa mpakwaabheluanga, nkombokelange kubhee ngabha mwangota mujijangatila mikega, nambo mikenga nga jitendakunnyangatilanga mwangota.

19 Bahi, mpakulobhola, "Nyaambi jela jikaheketwa ili nenga mbandikilwe mu gonogwe nkongo." 20 Bahi, jenjeni nga kweli nyaambi hikaheketwa ligongo lya kutokuhobhalela, ila mwenga nnyeme kwa kuhobhalela kwinu. Nambo nkotokuchipuna, ila nchilolekeange. 21 Handa Annoongo jwangaabhonela kiha Bhayahudi yakubhee nga bhakibhanga handa nyaambi kubhokela kandahi, bholi, ntendakuganikiha apakunkolela kiha mwenga? 22 Nnole, bahi Annoongo chibhabhile jwammbone na jwakalipa. Jonojwe nga jwammbone kwa bhenibhala bhandu bhabhatekugwee, na nga jwammbone kwaachinu handa mpakupunda mu kutenda gagabhi gammbone gakwe, handa ngabha henela na mwenga mpakuheketwa. 23 Bhenaangota Bhayahudi kabhele handa bhakalekanga kwanga kuhobhalela kwabhenji, bhapakupandikilwa kabhele mu nkongo, maana Annoongo akombola kunpandikianga kabhele mu gono nkongo. 24 Mwangota bhandu mwanga Bhayahudi, mwangota mmi handa nyaambi ya nkongo gwa mizeituni gwakumanyahi, nambo mmokikwe konokwe, bhakanpandikianga mu nzeituni kubuchitani chehemu yakubhee kubhokela lolo kwanga kwaachinunji. Nambo Bhayahudi bhalandana na nzeituni gwa kubuchitani, na hipakubhee nga kujojoka muno Annoongo kwaabhujianga mu nkongo gwabhenji bhene.

25 Akaalongo bhangu, mbala mugumanye ukweli gugutekuchiiya, kwa helye nkotokuchibhona mwa bhandu bhaluunda muno. Kulimba kwa mitima ja Bhayahudi gukibha nga gwa machobha kachoko tu, mpaka bhandu bhanga Bhayahudi pabhapakwahobhalela Annoongo. 26 Henela nga bhandu bha ku Isilaeli chibhapakuokolewa, handa chiijandikwe mu Majandiko ga Annoongo,

"Akombohi apakuhika kubhoka ku chilambo cha Sayuni,

apakukubhoa ubohu gwabhenji kwa bhabhabhelikwe kwa Ayakobo.

27 Helyelye nga lilagano limbapakulitenda na bhenaangota

chimbapakugabhoa mabohu gabhenji."

28 Bhayahudi bhatendakujikananga Ngani Jammbone, bhatekubhee akaapwati bha Annoongo ligongo linu mwangota mwanga Bhayahudi. Nambo konikola kuhagulikwa na Annoongo, tangu nga akaaganja bhabhe ligongo lya akaanahota bhabhenji, 29 kwa kubhee Annoongo abhikwaapekea bhandu ngwahupa jabhe na kwaagula ngaakokoleka. 30 Pena lolo mwangota mwa bhandu mwanga Bhayahudi mwangaakonda Annoongo nambo nangocheni mpatite kiha jabhe ligongo lya kutokujeketela kwabhenji. 31 Helahela, bhena Bhayahudi bhatendakwaakana Annoongo nangocheni ili na bhenaangota bhapokelange kiha ja Annoongo. 32 Annoongo atekwaatabha bhandu bhoa mu kulemwa kwabhenji ili abhabhonelange kiha bhoa.

33 Eloo, Annoongo akweti hilebhe hijingi yakuhalala! Malango gabhe na umanyo gwabhe ngapela. Jwaakwa jwaakombola kongolela henela Annoongo chibhatendakuamua, na jwaakwa jwakombola kumanya henela Annoongo chibhatenda hikubho yabhe.

34 Handa Majandiko ga Annoongo chigalobhola,

"Nga aganiki jwatekukumanya kuganikia kwa Hangwana?

Nga aganiki jwakombola kwajangatila Annoongo kuhukumula?

35 Au nga aganiki jwaampekie Annoongo chilebhe choachela,

ili abhujikiwe kabhele chilebhe hecho?"

36 Hilebhe yoha hibhoka kwaachabhe, hiibhi kwa ukolo gwabhe na kabhele ligongo lyabhe, ukolo gwabhe gubhee machobha goha gangapela! Na hibhee henela.