1 Bahi tulobhole niki, kwa ngani ja aokolo bhitu Aaibulahimu, jonojwe akombwile bholi kuhimanya hikubho heye? 2 Handa Aaibulahimu akibha akondikwe nnoongi ja Annoongo kubhee jwammbone ligongo lya hikubho yabhe, bahi, akweti na chilebhe cha kuchipunila nnoongi ja Annoongo. 3 Majandiko ga Annoongo galobhola, "Aaibulahimu akaahobhalela Annoongo, na bhena Annoongo akaakonda kubhee jwammbone." 4 Nambo kwa mundu jwapangana lihengo, malepo gabhe ngabhalanganikwa kubhee nga gwahupa, ila kubhee nga ligambo. 5 Nambo mundu jwangakulupalila hikubho yabhe bhene, ila atenda kwaahobhalela Annoongo, jwabhalekelela akaabohu, bahi, Annoongo abhajilwa na jono mundu, na kondekwa na jono kubhee jwammbone. 6 Jono Adaudi akalobhola hela hela pabhakalobhola kwa ngani ja kuhangalala kwa mundu jonijola jwatekondeekwa na Annoongo kubhee jwammbone pangali kuhilola hikubho yabhe,

7 "Bhatendakuhangalala bhenibhala bhandu yakubhee Annoongo atekwaalekelelanga mabohu gabhenji

na mabohu gabhenji atekugahuta.

8 Apakuhangalala muno mundu jola yakubhee Hangwana ngakombokela mabohu gabhe."

9 Bholi, kuhangalala konokwe kubhakalobhola Adaudi nga ligongo lya bhenibhala Bhayahudi bhabhainitingwe jikajabhenji, au kabhele kwa bhenibhala bhangahinwangwa? Tukalobhola, "Aaibulahimu akaahobhalela Annoongo na kuhobhalela kwabhe Annoongo akaakonda Aaibulahimu." 10 Bholi, Aaibulahimu akakondeekwa kwa Annoongo tangu ja kuhinwa, au pabhakahinwa? Akaakondekwa abhitangu kwaahina, na ngabha pabhakahika. 11 Aaibulahimu akahinwa pagakapeta genago, na kuhinwa konokwe kukibha kulangia kubhee Annoongo akakoonda nnoongi jabhe kubhee jwammbone ligongo lya kuhobhalela kwabhe kubhakibha nako tangu ja kuhinwa. Henela, Aibulahimu atekubhee atati bha bhenibhala bhoa yakubhee hata handa bhakibhanga bhangahinwa nambo bhatekwaahobhalela Annoongo na akaatendanga kubhee bhammbone. 12 Hela hela Aaibulahimu nga atati bha bhenibhala bhabhatekuhinwa, nambo ngabha kwa kubhee bhatekuhinwanga, ila ligongo bhakagulanga ndela jelajela ja kuhobhalela yakubhee atati bhitu Aaibulahimu akajikagula tangu ja kuhinwa.

13 Annoongo akaalobholela Aaibulahimu na chibhelei chabhe kubhee chilambo chikabhee chabhenji. Akaalobholela henela ngabha kwa kubhee Aibulahimu akakonda Malagilo ga Amusa, ila kwa kubhee akahobhalela kubhee apakondekwa kwa Annoongo kubhee jwammbone. 14 Bhabhapekewa genago gabhakalobhola Annoongo nga kwa bhenibhala bhabhakagula Malagilo ga Amusa, bahi kuhobhalela kwanga maana kohakola, na genigala gabhalongile Annoongo ngabha chilebhe. 15 Malagilo ga Amusa galeta lilaka lya Annoongo, kwa kubhee panga Malagilo kwaakwa kulemwa.

16 Chikubho heche chitendakulupalila kuhobhalela, henela genigala gabhakalobhola apakutupekea gabhokana na umbone gwa Annoongo, na kubhee nga kweli genigala gabhakalobhola Annoongo apakutupekea nga ligongo lya bhoa, ngabha kwa bhenibhala tu bhabhagakamula Malagilo, ila kwa bhenibhala kabhele bhabhatamanga kwa kuhobhalela handa Aaibulahimu. Jonojwe nga atati bhitu twenga twabhoa. 17 Handa Majandiko ga Annoongo chigajandikwe, "Ndekummeka mme atati bha bhandu bha hilambo hijingi." Malobhe genego nga ga kweli nnoongi ja Annoongo yakubhee Aaibulahimu akaahobhalela Annoongo yakubhee atendakwaayoanga bhabhawilinge, na kwa kutenda hilebhe yangabhee hitenda kubhee. 18 Aaibulahimu akahobhalela na kulupalila hata handa kukongopala kwabhe kukaatenda kuhengeleka ntima, henela atekubhee atati bha bhandu bha hilambo hijingi, itekujandikwa mu Majandiko ga Annoongo, "Akaabhelei bhinu bhapakubhee bhajingi handa ndondwa!" 19 Aaibulahimu akibha anahota kubhandikila na yaaka mia jimo, nambo kwahobhalela kwabhe Annoongo kwangapongoa hata handa akagahimanya kubhee mmele gwabhe gukibha handa gutekuwee, na hata hanu bhabhe Asala, akibha ntoonga. 20 Nambo Aaibulahimu jwangabhee na lipamba kwa ngani jenijela jibhakalobholelwa na Annoongo, ila akalekelelwa machili mu kuhobhalela na kwaalumbalila Annoongo, 21 kongo abhikuhimanya kubhee Annoongo akibha na uwecho gwa kutenda genigala gabhaalobholile. 22 Chenecho nga chikubho chichikaatenda Annoongo kwakonda Aaibulahimu kubhee jwammbone. 23 Malobhe gangani, gagalobhola, "Annoongo akaakonda kubhee jwammbone." Gangajaandikwa ligongo lya Aaibulahimu jikajabhe, 24 ila nga ligongo litu tweenga twabhoa yakubhee Annoongo apakututenda tukondekwee na jonojwe, twenga twaahobhalela jonojwe jwatekwayoha Hangwana bhitu Ayesu. 25 Annoongo akaabhoka Ayesu ili akomekwe ligongo lya mabohu gitu, na akaayoa ili atutende tukondekwe na Annoongo.