1 Mummpokelange jonijola jwangabhee na machili mu kuhobhalela, nambo nkotokupwatilana na kutaukananga kwa ngani ja kuganikia kwabhe. 2 Mundu jumo kuhobhalela kwabhe kutendakwalekelea kulyee kila chilebhe, nambo mundu jongi jwangabhee na machili mu kohobhalela alyee tu likoolo. 3 Mundu jonojwe jwaalyee kila chilebhe akotokwaabhelua jonojwe jwangalyee. Jonojwe jwaalyee likoolo akotokwahukumula jonijola jwaalyee kila chilebhe, kwa kubhee Annoongo atekwakoonda. 4 Mwenga nga aganiki mpaka mwahukumule antumichi jwa jongi? Handa ajemite au handa agwile lenelyo nga lihengo lya akolo bhabhe, eloo, apakujema maha, kwa kubhee Hangwana Ayesu akombola kwajemea.

5 Mundu jongi atendakuganikia kubhee lichobha lyengi nga lyammbone kupunda lyengi, popopo jongi aganikia kubhee machobha goha gatekulandana. Bahi kila jumo abhee na ukweli kwa ngani ja genigala gabhaganikia. 6 Jonojwe jwaganikia kubhee lichobha lyengi nga lyammbone muno kupunda lichobha lyengi, atenda henela ligongo lya kwaatopea Annoongo, na jonojwe jwaaleyee chakulya choachela atenda henela ligongo lya Hangwana atendakwaachukulu Annoongo. Na jonijola jwaaleka kulyee chakulya choachela atenda henela ligongo lya Hangwana, na jonojwe atenda henela kwa kwaachukulu Annoongo. 7 Jwakwa hata jumo jwitu jwaatama ligongo lyabhe mweene, wala jwakwa jwaajomoka ligongo lyabhe mweene. 8 Bahi, handa tutama, tutendakutama ligongo lya kwaabhajila Hangwana, na handa tutendakujomoka, tujomoka ligongo lya kwaabhajila Hangwana, henela handa kupakutama au tupakujomoka, tweenga nga bhandu bhabhe Hangwana. 9 Nga ligongo Akilisito akajomoka na kuyoka ili apate kubhee Hangwana bha bhandu bhoa, bhabhabhilinge bhamomi na bhabhatekujomoka. 10 Bahi, kwaniki mwenga ntendakwahukumula anung'una bhinu? Au kwaniki mwenga ntendakuwaabhelua anung'una jwinu? Kwa kubhee twenga twabhoa tupakujema nnongi ja chitengu chakuhumulila cha Annoongo. 11 Majandiko ga Annoongo galobhola,

"Handa chindendakutama, alobhola Hangwana,

kila mundu apakundindila majungwa,

na kila jumo apakulobhola kwa malobhe gabhe mweene kubhee nenga nga Annoongo." 12 Henela bahi kila jumo jwitu apakulongela ngani jabhe mweene nnoongi ja Annoongo.

13 Bahi, tuleke kwahukumulanga bhangi, nambo mmangange miho mundu akotokwaanyambukia jongi agwee mu mabohu. 14 Mu kulondanika na Hangwana Ayesu, ndendakuhimanyi kweli kubhee chaakwa chilebhe choachela chichipakundenda tukokondekwa kwa kwaachalila Annoongo, nambo handa mundu akaganikia kubhee chilebhe chengi chichitutenda twenga tukotokondekwa kwa kwaachalila, bahi, kwaachebhe twenga ngakondekwa kwaachalila. 15 Handa anung'una jwinu atenda kuhechuka ligongo lya chenichela chakulya chintenda kulyee, bahi hikubho yinu ngalongolelwa na Upaliho. Nkotokoonda hata kachoko chakulya chinu chibhee ligongo lya kuhobha kwa mundu jongi yakubhee Akilisito akajomoka ligongo lyabhe! 16 Bahi, nkotokoonda chenichela chilebhe chimuchibhona kwaachinunji nga chammbone, bhandu bhangi bhakotokuchibhelua. 17 Umwenye gwa Annoongo ngabha kwa chilebhe cha kulyee na kung'wee, nambo kutama kwa kupangana genigala gagabhajila Annoongo kutama kuhengwa na kuhangalala kwa kulondanika na Mboomo ja Annoongo. 18 Mundu joajola jwaatumikila Akilisito kwa namuna jenjeni, atendakwabhajila Annoongo na kondekwa na bhandu.

19 Henela na tuchimilange kugakamula genigala gagaleta kuhengwa na gagatujangatila kuchengana. 20 Bahi, nkotokuhalibiana lihengo lya Annoongo kwa mitau kwa ngani ja chakulya. Kwa kubhee yakulya yoha nga yammbone, nambo ngapalikwa kulyee chakulya chichipakuntenda mundu kulemwa. 21 Mbaya kuleka kulyee nduli, kung'wee divai, au kutenda choachela chichikombola kwaajambukia anung'una bhinu kulemwa kwa Annoongo. 22 Bholi, mwenga ntenda kuhobhalela? Konikola kuhobhalela kummi nako, mmee nako muntima gwinu na nnoongi ja Annoongo. Nga kuhangalala kupangana chenichela ching'anikia nga chammbone pangali kuchihukumula mwene. 23 Nambo mundu jwaabhile na lipamba na chakulya chibhalyee atekuhumulwa, kwa kubhee ngalyee kwa kuhobhalela. Choachela chibhapangana mundu pangali kuhobhalela chenecho nga chibohu.