1 Nenga Apaulo nga jundendakujandika balua heje, ndekubhee andundame ngabha kwa kuhagulikwa na bhandu, wala ngabha kwa machili ga mundu, nambo ndekuhagulikwa na Ayesu Kilisito na Annoongo Atati jwaakayoa Ayesu. 2 Nenga na akanung'una bhoha bhabhabhilinge pamo na nenga tunchalimianga mabhoga ga bhandu bhabhahobhalela Akilisito bhammilinge konokwe ku Galatia. 3 Tutendakunnyopelanga umbone na kuhengwa kubhoka kwa Annoongo Atati bhitu na kubhoka kwa Ayesu Kilisito.

4 Akilisito akabhoa umomi gwabhe ligongo lya kuhuta mabohu gitu na kwa upalio gwa Annoongo Atati bhitu, ili akombole kutuokoa mu chilambo heche chibohu cha nangocheni. 5 Annoongo alumbalilwe machobha goa pangali kupela! Na hibhee henela.

6 Ndendakangacha muno kubhee munnekitinge chindema, henela jonojwe juntekumkemanga kwa umbone gwa Akilisito na kujikagula Ngani Jammbone jengi. 7 Nambo jakwa Ngani Jammbone jengi. Ukweli nga kubhee bhabhilinge bhandu bhabhanhangabhananga mwangota, bhandu bhabhapala kujigalambua Ngani Jammbone ja Akilisito. 8 Nambo, hata ikibha jumo jwitu au bhatumichi bha kunani kwa Annoongo, bhapakuntangachianga Ngani Jammbone jengi na kuleka jenijela tujitekutangachanga twenga, bahi Annoongo apakuntenda mundu jonojwe ahikilwe na chikubho chibohu! 9 Patukajomola kulobhola, na nangocheni nobhola kabhele. Handa mundu johajola atendakuntangachianga Ngani Jammbone jengi, jijilekanile na jenijela jimujipokelinge, Annoongo apakuntenda mudu jonojwe ahikilwe na chikubho chibohu! 10 Bholi, nangocheni nolea kondekwa na bhandu au Annoongo? Au mbala kwaabhajila bhandu? Handa ngateendite henela, nenga ngabhileopo na antumichi jwa Akilisito.

11 Akaanung'una bhangu, mbala muimanyange kubhee Ngani Jammbone jinakantangachianga ngabhoka kwa bhandu. 12 Nangapokela Ngani Jammbone kubhoka kwa bhandu wala nangajipata kubhoka kwa mundu joajola. Ayesu Kilisito mweene nga jwaatekunangia.

13 Mwangota ntekujoanga ngani ja chingatama lolo panddendita kuhobhalela mu genigala gabhayobhelile kupangana Bhayahudi, henela chinakalilagia kwa machili libhoga lya bhandu bhabhahobhalela Akilisito na kupala kulikoma. 14 Kweli, nakaapeta bhenibhala bhanakabhelekwa chaka chimo kwa kupotanila genigala gagayobhelilike kutendeka na Bhayahudi, nakachimila muno kupokela majigano kubhoka kwa akaatati bhitu.

15 Nambo Annoongo, kwa umbone gwabhe, akibha atekuhagula hata tangu nangabhelekwa, akangema naatumikile. 16 Ng'ang'anu tu atekunangia Mwana jwabhe henela chibhabhile ili ndangache Ngani Jammbone jabhe kwa bhandu bhangi bhanga Bhayahudi. Nenga nangaakonya mundu joajola, 17 na panga kwela kujaula ku Yelusalemu kwa bhenibhala bhabhapatitinge kubhee akandundame tangu jangunenga, ngajaula oti ku Alabia, ngapena nakabhuja kabhele ku Damasiko. 18 Pajikapeta yaaka hitatu tu, ngapena nakajaula ku Yelusalemu nakakongana na Apetulo,* ngatama kwachabhe machobha komi na nhano, 19 konokwe nangaabhona andundame jongi ila nga Ayakobo, anung'una jwabhe Ayesu.

20 Gangani ganannyandikilanga, Annoongo amanya kubhee, nobholaopo unami.

21 Machobha gannoongi nakajaula ku chilambo cha Silia na ku Kilikia. 22 Nambo, nenga nangamanyikana kwa chibhoga cha bhandu bhabhahohalela Akilisito bha konokwe ku Yudea. 23 Bhenaangota bhakajoanga tu kubhee, "Mundu jola jwaakatulagia penapo kandai, nangocheni atangacha Ngani Jammbone jelajela jibhakapala kujitinia." 24 Bahi, bhakaatukucha Annoongo ligongo lyangu.