1 Mwangota mwa bhandu bha ku Galatia, ntekubhee mwa bhandu akaajinga? Bholi nga aganikia jwaatennoganga. Ngani ja kubhambwa kwa Ayesu Kilisito panchalaba jitekubhonekana pandaa nnoongi jinunji. 2 Ndendakupala kuimanya tu chilebhe chimo kubhoka kwachinunji. Bholi, nkapokelanga Mboomo jwa Annoongo kwa kupangana genigala gagapalikwa na malagilo au ligongo lya kujijoa na kuhobhalale Ngani Jammbone? 3 Bholi, mwangota nga mwa bhandu mwakaajinga namuna jenejo? Mwangota nkajemekanga kutama umomi gwinunji guyono kwa kujangatilwa na Mboomo jwa Annoongo. Bholi, nangocheni mpalanga kujomola kwa machili ginunji mwaachinabhene? 4 Bholi, kulaga koha kunkalaganga mwangota kukibha hiyoyo tu? Hopo ngakomboleka! 5 Bholi, Annoongo atendakumpekeanga Mboomo jwabhe na kutenda hikubho yakangachika pakati jinunji ligongo ntekamulanga Malagilo ga Amusa, au ligongo ntendakujoanga Ngani Jammbone na kujihobhalela?

6 Majandiko ga Annoongo galobhola, "Abulahimu akaahobhalela Annoongo, na kwa kuhobhalela kwabhe, Annoongo akaakonda kubhee bhammbone." 7 Mpalikwanga kuhimanyanga yakubhee bhandu bhabhatekwahobhalela Annoongo, bhenabho nga bhana bha Ablahamu. 8 Majandiko ga Annoongo kubhokela lolo gatekulangia kubhee Annoongo apakwateendanga bhandu bhanga Bhayahudi kubhee bhandu bhabhakondekwa na Annoongo kwa ndela ja kwahobhalela Akilisito. Henela Majaandiko ga Annoongo gatekulongolela kuntangachia Ablahamu Ngani jammbone ja Akilisito, "Kupetela mwenga bhandu bhanga Bhayahudi bhoa gapakutendelwa gammbone." 9 Bahi, bhenibhala bhabhaahobhalela Annoongo bhapakutendelwa gammbone pamo na Ablahamu jwaahobhalile Annoongo.

10 Na bhoha bhabhakulupalila kuokolewa kwa kupangana gagapalikwa na Malagilo ga Amusa, bhenabho bhatekulaniwa na Annoongo. Ligongo, Majaandiko ga Annoongo gatekulobhola, "Joajola jwangagakamula na kugakwela goha gagajandikwe mu Malagilo ga Amusa, jonojwe atekulaaniwa na Annoongo." 11 Nga kweli kubhee kugakagula Malagilo ngantenda mundu kondekwa nnongi ja Annoongo, kwa kubhee Majaandiko ga Annoongo gatekulobhola, "Mundu jwakondekwa nnoongi ja Annoongo apakutama kwa kutandaikwa mu kwahobhalela Annoongo." 12 Nambo malagilo ngakulupalila kuhobhalela, ila mu Majaandiko ga Annoongo galobhola, "Mundu joajola jwaatama kwa kulupalila Malagilo apakutama kwa kupangana genigala gagapalikwa na Malagilo."

13 Akilisito akatukomboa kubhoka mu laana ja Malagilo kwa kuchitolela laana hejo ligongo litu, maana Majaandiko galobhola, "Atekulaaniwa mundu joajola jwaatekubhwamba panchalaba." 14 Chikubho heche chikateendeka ili gammbone gabhaatendilwe na Ablahimu gabhaahikilange bhandu bhanga Bhayahudi kupetela Akilisito, na kwa kuhobhalela, twaapokele jonijola Mboomo yakubhee Annoongo akatulobholela kubhee apakutupekea.

15 Akanung'una, mbakunnandanakia kubhoka mu umomi gwitu gwa kila lichobha. Nng'anikiange kwa chibhatekulagana bhandu bhabhele. Handa malagano gapakupanganika kwa bhandu bhabhele jwaakwa mundu jwaakombola kugabheka nnyenje au kujonjokea chilebhe. 16 Bahi, Ablahamu akapekewa lilagano pamo na ubhelei gwabhe. Majandiko ga ngalobhola, "Na ubhelehi gwabhee," libhi na maana ja bhandu, ila galobhola, "Na mmelei jwakwe." Nga jumo, na jonojwe nga Akilisito. 17 Chimbala kulobhola nga chenjeni, Annoongo akatenda lilagano lyabhe, akalongola kweli, malagilo gakabhokela gajikapeta yaaka makomi komi ncheche na chelachini nnoongi jabhe, ngakombola kulitendebhua lyene lilagano na wala kugabhoa genigala gabhakalobhola Annoongo kubhee apakutupekea. 18 Maana, handa ngwahupa ja Annoongo jikulupalila Malagilo, bahi, ngakombola kulupalila kabhele genigala gabhakalobhola Annoongo kubhee apakutupekea. Nambo Annoongo kwa umbone gwabhe akampekea Ablahamu genigala gabhakalobola kubhee apakutupekea.

19 Kwaniki bahi gabhee Malagilo? Malagilo galabhekwa ligongo lya kulemwa mpaka chibhapakuhika jonijola mmelei jwa Ablahamu, jwaakakemwa mu genigala gabhakatulobholela Annoongo kubhee apakutupekea. Malagilo ga Amusa gakaletwa na antumichi jwa kunani kwa Annoongo, kwa ndela ja mundu jwaatenda bhandu bhakamulane mabhoko. 20 Nga kweli, jwaatenda bhandu bhakamulane mabhoko ngapalikwaopo ikibha chikubho cheene nga cha mundu jumo, nambo Annoongo nga jumo.

21 Bholi, malagilo gatendakanana na genigala gabhatulobholile Annoongo kubhee apakutupekea? Hata kachoko! Kwa kubhee handa Malagilo gagatekubhokekwa gangakombola kwaapekea bhandu umomi, bahi kondekwa nnoongi ja Annoongo kukapatikine kupetela Malagilo. 22 Nambo ngabha, Majaandiko ga Annoongo gatekulobhola kubhee chilambo chibhi pahi ja utabhala gwa mabohu, ili genigala gabhatekulobhola Annoongo kubhee apakutupekea kwa ndela ya kunhobhalela Ayesu Kilisito, bhenibhala bhakombolange kupekewa bhenibhala bhabhahobhalela Ayesu Kilisito.

23 Tangu kuhobhalela kongoni kwangahika, Malagilo gakatutenda kubhee akaatabhwa, tubhikulendela kuhobalela konokwe kutuhunukulikwe. 24 Bahi, gena Malagilo gakibha nachilongola ja kwaahikila Akilisito, ili tukombole kondekwa nnoongi ja Annoongo kwa kuhobhalela. 25 Nambo kwa kubhee konikola kuhobhalela kutekuhika, ngatandaikwa kabhele na Malagilo.

26 Kwa ndela ja kuhobhalela, mwangota mwabhoa ntekubhee bhana bha Annoongo mu kulondanika na Akilisito. 27 Mwangota mwabhoha mwantekubatichwa na kulondekana na Akilisito, nga handa ntekwaawala Akilisito. 28 Henela, kwaakwa kabhele kulekana pakati ja Bhayahudi na bhanga Bhayahudi, abhanda na mundu hulu, hanalome na haikege. Mwabhoa nga chilebhe chimo mu kulondanika na Akiisito. 29 Hikibha mwangota nga mwabhandu bha Akilisito, bahi mwangota nga bha ubhelehi gwa Ablahamu, na mpakupokelanga genigala gabhalobhwile Annoongo kubhee apakwaapekea.